¹ Hilame likumu la Tila atomali tuke djande atie Salomo, la ebili ate aokali ate wamomunolali mata la owumi likumu la ebete e sango, la ebili ate Hilame adjaakali engele kpaa omobali Davidi. ² Salomo amowongoselali Hilame mwendi ate: ³ Owe amene oewi ate wawa, Davidi atiengali omomaeli Yawe, Mwengei onde monguta, la kole e wita winge mitone mande wamolengaali tee Yawe awabatali sese e makolo mande. ⁴ Sikandjo Yawe, Mwengei o mbai, ahekeli mbai ohomi wiati kpaa; mwamaleli te moikima ati kine, ema te eesi ebe etikelana kine! ⁵ Dhenda, idjei la mamungwene omai munguta mwesi e kombo e Yawe, Mwengei o mbai, ndji ndenge Yawe amoaselali Davidi wawa o mbai ate: Monga mo owe ongo okomobata mbai la ebete e owe likolo la ngbelengo e owe e okumu, ekodjaa inde nde akomeele nkombo e mbai monguta. ⁶ Watoma wato ate watenele mbai wasedele e Liba. Tuke dja mbai wakodja mongindji la wango wa owe, ikooputa liputi e tuke dja owe la otutei enge ekoasa owe, la ebili ate eti la moto tweti atie iso ongo oewi oteni mite nda wato wa Sidonia. ⁷ Ango eokali Hilame djinge wingbundu dja Salomo, aemeleli nee, aasali alidji ate: Yawe apambwame keke ehele la ndenge emohekeli inde Davidi mana mwesi o lokenge adje likumu e wa wato ngbii! ⁸ Hilame amowongoselali Salomo ate: Ioki mwendi mungo etomeli owe mbai. Ikokele enge kpaa ekoemelese owe la kole e mite ma sedele koto la mite ma sipele. ⁹ Tuke dja mbai wakodjimba maho olongoyi la Liba tee la ewale, mbai koto la mokombe mo mbai ikonanga maho la ewale tee la ebete enge ekoinya owe mbai, ikotokola maho ongo, owe koto okotota djaho. Enge ebali mbai nda liputi, edjei ate owahekele wato wa monguta mo mbai wihoo wilakake. ¹⁰ Hilame amohekeleli Salomo mite ma sedele la mite sipele la ndenge eemeleseli Salomo mite ma sedele la mite ma sipele ndji ndenge eyemeleli Salomo la maho. ¹¹ Salomo amohekeleli Himene kolosi nkoto ntuku iwale dja bule la owongeli monguta monde la kolosi ntuku iwale dja maita ma olibe enge etangani; djaho nde Salomo adjaakali omohekeli Hilame elanga la elanga. ¹² Yawe amohekeleli Salomo lokenge, ndenge emouwonelali. Logooo edjaakali ndondo e Hilame la Salomo, iwo waala watenali ambeya. ¹³ Likumu Salomo alongosali la Isalayele kpaapele kpaa pele dja tomu tetelake, wadjaakali wato nkoto ntuku isato. ¹⁴ Awatomali ongo la Liba, ndebo la ndebo pele nkoto liomu, wato la wato la mokombe mowu; wadjaakali okeli ndebo eesi ongo la Liba, koto ndebo iwale ewau. Adonilama nde adjaakali awamaleli wato wango wawelanali la okeli tomu tetelake. ¹⁵ Salomo aumali la wato nkoto ntuku nsambo wango wadjaakali okpali mikpali militake koto wato nkoto ntuku mwambi wango wadjaakali obuki mabukeli la mokoli, ¹⁶ longose wakapita, wango wadjaakali motio nkoto nkama isato wango Salomo awahekeleli mokpali mo oyamaleli tomu koto osindjeli wato wa otomu. ¹⁷ Likumu awatomali ate wapumbese mabukeli mango masungu koto mango mawongi la opoti ogindi monguta. ¹⁸ Wato wamikpali wa Salomo, la wango wa Hilame, koto la wa Gibilia wabukali mabukeli, koto wawongelali mite koto mabukeli la ogindi monguta.