¹ Likumu Salomo adjaakali likumu la Isalayele eesi bii. ² Dhenda maumu mango wadjaakali omokeleli. Azalia monga nganga-Mwengei Zadoke, ³ Eliholepe la Akiya wana wa Sisa, wadjaakali wadhingi, Yosapata monga Asilude, adjaaakali mobanei waahala; ⁴ Benaya monga Yehoyada adjaakali mosombesi wamasaze, Zadoke la Abiatale wadjaakali wanganga-Mwengei; ⁵ la Azalia monga Natane adjaakali likumu o wasombesi wa sambo, Zabude monga Natane, adjaakali mosombesi sambo dja ongala, adjaakali koto miino o likumu; ⁶ Asisale adjaakali likumu e monguta mo likumu; koto Adonilama monga Abida adjaakali waputesi mamelo. ⁷ Salomo adjaakali la wato Liomu la iwale wango wadjaakali osombesi sambo la Isalayele kpaa. Wadjaakali omohekeli likumu la wato wa monguta monde wiho wilakake, adjaakali la mokpali mo ohekeli wiho wilakake la ndebo eesi e elanga. ⁸ Dhenda kombo djau. Monga Hule, ngo l;a mokoli o Epalaime. ⁹ Monga Dekele, ongo la Makatasi, la ongo la Salabime, la ongo la Betesemese, la ongo la Elone koto la ongo la Betehanane. ¹⁰ Monga Hesede, ongo la Alubote, adjaakali koto oyamaleli Soko la moki mwesi bii mo Hepele. ¹¹ Monga Abinadabe ongo la liwange eesi bii e mokoli mo Dole. Tapata moseka Salomo aumali moli onde. ¹² Baana monga Silude ongo la Tanasi la Meguido, koto Betesane mwesi kpaa enge esukani la Zalatane sese e Yizelele, olongoyi Betesana tee ongo la Abele-Mehola, oyeti tee ongo la Yokomame. ¹³ Monga Gebele, ongo la Lamote e Galade; adjaakali moamaleli miki ma hema dja Yaile monga Manase enge edjei la Galade; adjaakali oyamaleli koto moki mo Alagobe enge edjei la Basane, gbata wisungu tuku motoba winge widjei la winangeli koto la mabende ma ailani. ¹⁴ Ahinadabe monga Ido, ongo la Mahanaime. ¹⁵ Asimate, ongo la Nepitalia, Amoikali Basimate, moseka Salomo. ¹⁶ Baana, monga Husikai, ongo la Asele koto la Beyalote. ¹⁷ Yosapata, monga Paluasi, ongo la Isakale. ¹⁸ Simei, monga Ela, ongo la Bezamina. ¹⁹ Gebele, monga Uli, ongo la moki mo Galade; asukanali la Sihone likumu o Waamola, koto la Oge, likumu e Basane. Edjaakali la mosombesi sambo saa mwesi la moki muho. ²⁰ Yuda la Isalayele wadjaakali ngbii, nda ngene djinge idjei kelekele e ewale. Wadjaakali olaki, okengi koto oemeli. ²¹ Salomo adjaakali oyamaleli miki kpaa oongoyi ewale tee la moki mo Wapilisitia koto tee la molelo la Ezipeto; wadjaakali odji la sambo la omokeleli Salomo masio kpaa ma mokalo monde. ²² Masio kpaa Salomo adjaakali olaki: Mipunee ntuku isato e pulele e moteke koto mipunee ntuku motoba e moteke, ²³ ngbombe liomu djine itami, ngombe ntuku iwale djinge ikolakaka wisoki wa elanga, la mpata nkama eesi, longose pange, la maluwe, la daima, koto la mbulu djinge ititame. ²⁴ Adjaakali olangali la miki kpaa e ngambo eeti e ewale, olongoyi Tipasasi tee la Gaza, likolo la makumu kpaa e ngambo eeti e ewale. Adjaakali la logoo la miki mande kpaa iyati la iyati. ²⁵ Yuda la Isalayele, olongoyi Dane tee la Beleseba, wayabatali la logoo, moto la moto sese e mote monde mo bino koto sese e mote monde mo pigi, wiengele kpaa wa Salomo. ²⁶ Salomo adjaali la mapango nkoto ntuku inei e wapunda la kole e makalo mande, koto wato nkoto liomu la iwale wango wakosombaka la punda. ²⁷ Wasombesi samobo dja moki waho wadjaakali odji moto la moto la ndebo ende la wiho wilakake la kole e wihoo wilakake e likumu e likumu. Watidjaakali owosani ema teeti. ²⁸ Wadjaakali koto okpali olodje koto la ndele la kole e wapunda koto la wato wango wadjaakali okpali mikpali la wibete kpaa widjaakali oki likumu, moto la moto otutei tomaka djinge imohekeleli iwo. ²⁹ Mwengei atutiali omohekeli Salomo lokenge, la mayele masungu, la motema moewake sambo ngbii nda ngene djinge idjei kelekele e ewale. ³⁰ Lokenge lo Salomo edjaakali olekeli lokenge e wana kpaa wa elongweli e liwusa wuse koto lokenge e wato wa Ezipito. ³¹ Awayetali wato wadji kpaa wa lokenge, amoyetali Etane, mo Ezilasite, la Hemane, Kalakola koto Dalada, wana wa Makole; etemeiya ende eyaandiali la miki kpaa minge midjaali ahue. ³² Aengali opumbesi masekpe nkoto isato, koto opumbesi lembo nkoto ntuku itano. ³³ Adjaakali oaseli mite, opoti la sedele enge edjei la Libania tee la mote mo izope mungo mokopumbaka la etutu; aaselali koto nama, mbulu, ndjoo, koto nsuu. ³⁴ Wato wadjaakali olongoyi la witondo kpaa la ooki lokenge wo Salomo, atie makumu kpaa wa mbume wango waokali lokenge wonde.