¹ Salomo akelali ogemeiyani wo liwala mongindi la Palao, likumu la Ezipito. Amoyikali moli moseka Palao, akeeli la inde la gbata e Davidi, tee engele enge esesali inde omai monguta monde, monguta mo Yawe, koto le etutu e lopango e Yelusalema. ² Wato wadjaakali ohekeli mbeka ndi la wibete winge wiyadjambaali, la ebili ate tee la enge engele etimaanaliyo monguta la kombo e Yawe. ³ Salomo amobalali Yawe, ndji ndenge edjaakali inde otutei pui dja sango Moize. Ase edjaakali ndji la wibete winge wiyadjambi nde edjaakali inde otumbi mbeka koto la malasi. ⁴ Likumu akeeli la Gabaona etumbi mbeka ongo, la ebeli ate edjaakali ebete esungu e wibete winge wiyadjambali. Salomo aahekelali mbeka tumbake nkoto eesi likolo la etumbeli. ⁵ Yawe amopumbelali Salomo la saki ongo la Gebaona, Mwengei amoaselali ate: Oongo ema enge ebali owe ate iyohekele. ⁶ Salomo awongosali ate: Owe moto oenesi motema molamu mosungu atie motuke mo owe Davidi, wawa o mbai, la ndenge esombaali inde liwoso la owe ndondo e ogemei ndji owe, ndondo e omeemene, ndondo e onanwani wo motema liwso la owe, otutiali omoeneseli inde motema molamu mosungu, omohekeli koto mana ongo oyabati likolo la ngbelengo e okumu wonde, ndenge ekoeneneke keke. ⁷ Sikandjo, Yawe Mwengei o mbai, omoumesi motuke mo owe likumu la ebete e Davidi wawa o mbai; mbai ongo edjei yo mana mokeke, itiewaka ndenge e opumbi la ndenge e olingeli. ⁸ Motuke mo owe adjei ndondo e wato wango owe owaonoli, wato ngbii, wango waengiti oewani motio, la ebili ate wadjei ngbii. ⁹ Mohekele motoke mo owe lokenge la osambesi wato wa owe, la oewi olamu la obe! La ebili ate ndai okoenga owasambesi wa wato, wa wato wasungu? ¹⁰ Woongi wuho wo Salomo womoemeseleli Yawe. ¹¹ Mwengei amoaselali ate: Nda eongi owe wungo loyi, nda ndenge etionge owe odjei oumoyi la moki, oongiti koto odjei la ogumake, ongiti koto milimo ma mitone ma owe, oongia lokenge la osobesi sambo sambesake, ¹² dhenda, ikokela ndji ndenge easi owe. Ikoohelele motema mo lokenge koto mo kandela, la ndenge ate liwoso la owe etidjaali la moto koto mbuse e owe etidjaa kine la moto ongo okokuana la owe. ¹³ Ikoohekele koto, djinge kpaa itionge owe, edje ogumake koto la otwa, la ndenge ate etidjaa la moto moikima ndondo e makumu mango makodjaa nda owe ndondo e masio ma owe kpaa. ¹⁴ Inga osomba la mboka dja mbai, la otemei pui dja mbai koto tomaka dja mbai, ndenge edjaakali sangwa Davidi okeli, ikoguala masio ma owe. ¹⁵ Ango esuswali Salomo, dhenda edjaakali nde saki. Salomo awongwali la Yelusalema, ayasumali liwoso la sanduki e ogemeiyani e Yawe. Ahekeleli wambeka tumbake koto makao ma wookani, awakelelali koto tuke djande kpaa lipati. ¹⁶ La engele eho, wali waale wa ndumba wdjaali atie likumu, wayamalali liwoso lande. ¹⁷ Mwesi o wu aasali ate: Limbesa mbai likumu, mbai la oholo moli tokoyabataka la monguta moikima, iwotali ahue la inde la monguta. ¹⁸ Mbuse e masio masato, oholo moli koto awotali. Tokoabataka ebete eikima, modjidji tweti adjei mongindji la iso la monguta, idjaali ndji iso waale. ¹⁹ Mana o oholo moli aguali la likolo, la ebili ate amolangelali. ²⁰ Ayamalali ndondo e likolo, amototali mana o mbai ngambo e mbai, ndji yo motuke mo owe akolangalaka, amolangeyali la mokpoto monde; mana onde ongo oguali, amolangeyali la mokpoto mo mbai. ²¹ Ango eyamalali mbai boo laate imonungese mana o mbai, dhenda, aguali. Imodhendali olamu boo; dhenda, atidjaakali mana o mbai ongo omootali mbai. ²² Moli oho odji aasali ate: Eti ndjongo! Mana o mbai nde otoni, koto mana o owe nde ogui. Ase ongo o poo awongosali ate: Eti ndjongo! Mana o owe nde ogui, koto mana o mbai nde otoni. Ndjongo nde edjaakali iwo oasi liwoso la likumu. ²³ Likumu aasali ate: Mwesi akoasaka ate: Mana o mbai nde otoni, koto mana o owe nde ogui; odji koto aasia: Eti ndjongo! Mana o owe nde ogui, mana o mbai nde otoni. ²⁴ Likumu aasali alidji ate: Djeeleni mbai la ewuni. Wadjaali la ewuni liwoso la likumu. ²⁵ Likumu aasali ate: Motenani mana ongo otoni la wisuki wiale, hekeleni esuki eesi la moli mwesi koto eeti esuki la moli odji. ²⁶ Moli ongo mana onde atonoli aokali solo djande ingbumia la kole e mana onde, aasali la likumu ate: Ndjimbesa mbai, likumu o mbai, mohekele mana ongo otoni, otimoole kine. Ase ongo oeti aasali ate: Atidjaa o mbai atidjaa koto o owe; motenani! ²⁷ Likumu awongosali, la oasi ate: Mohekeleni moli o poo mana ongo otoni, otimooleni kine, inde nde odjei nango. ²⁸ Isalayele kpaa waokali eteneli e lisambesi linge litotali likumu. Waumali omowangi likumu, la ebili ate waeneli ate lokenge wo Mwengei wadjei la inde la kole e ototi witeneli wa masambi mande.