¹ Masio ma Davidi mayandongbali ahue e logo wonde, amohekeleli monga monde Salomo tomaka ate: ² Ikokeeke la mboka e wato kpaa. Yatetelesa, djaa koto moto pele! ³ Ewongi oengese mokpali mo owe atie Yawe, Mwengei o owe, la osombi la mangalala mande, la otemei koto pui djande, tomaka djande, la witeneli djande dja lisambesi la demu djande, ndenge edhingani ndodo e pui dja Moize, laate olonge la sambo kpaa djinge ikokela owe la wibete kpaa djinge ikosomba owe, ⁴ la ebili ate Yawe aengese engbundu ende enge easali inde likolo la mbai ate: Inga wana wa owe wahua la mboka ewu, la osombi liwoso la mbai la omeemene, la motema mowu kpaa, la molimo mowu kpaa, otidjanga te wuse moto ongo okootuteya la ngbelengo e okumu wo Isalayele. ⁵ Oewi enge Yoaba monga Zeluya kakelali mbai, la djinge ikelali inde makumu maale ma wamasaze ma Isalayele, ndenge emokelali inde Abinele monga Nele, koto la Amasa monga Yetele. Ango owaolali inde; asuali makila mango mawongoli osuakani ndi la engele e wita, abatali koto makila ma wita la moliki mungo modjaakali la libele lande koto la wikpokpo djinge idjaakali la makolo msnde. ⁶ Okodjaa okele ndenge ebali lokenge wo owe, otidhee ate nsue djande bubake iyadjimbe logoo ongo atie wato wagbaake. ⁷ Owongi owaeneseli wana wa Balazilai moto o Giladite motema molamu, waongi odjei ndondo e wato wango wakolakaka la mesa ma owe; laate ango nde eyandongbali iwo atie mbai otilali mbai liwoso la maangwa Abusalome. ⁸ Dhenda, Simei monga Gela, Mobezamina ongo olongoyi la Wasilimi adjei la owe mongindi. Inde nde abumakolali mbai la mbumakolo mbe djinge ikookesaka mbai odjidji la wuse wungo wodjaakali mbai okii la Mahanaima. Ase ayadjimbali la ogbotoni la mbai la Yolodani, ndjongo mbai imolapelali ndai la kombo e Yawe ate: Itiola owe kine la ewuni. ⁹ Sikandjo, otimodhee kine ate adjange eguele, la ebili ate owe odjei moto o lokenge, oewi koto ndenge ekomokela owe. Okodjimba la makila ongo atie wato waguake nsue djande bubake. ¹⁰ Ndjongo Davidi alangalali ebete eikima la watata wande, aombanali la gbata e Davidi. ¹¹ Masio mango Davidi ayamalelali Isalayele edjaali wilanga ntuku inei: Ayamalelali ongo la Hebolone wilanga nsambo, koto la Yesusalema ayamalelali wilanga ntuku isato la isato. ¹² Ndjongo Salomo ayabatali la ngbelengo e okumuwo sango Davidi, wokumu wonde womaanali la bolo. ¹³ Adoniya monga Agite akeeli atie Bateseba nango Salomo. Bateseba amoaselali ate: Wodjii wo owe wodjei wo logoo? Awongosali ate: Wodjei wo logoo. ¹⁴ Ateleyali alidji ate: Idjei la loi wo oaseli owe. Bateseba aasali ate: Asa! ¹⁵ Atutiali aasali ate: Owe amene oewi ate wokumu wodjaakali e mbai, koto wato wa Isalayele kpaa wabatali maiso mawu atie mbai laate iwume likumu. Ase wokumu woyakukolali,, woumali wo manima, la ebili ate Yawe amohekeleli eho. ¹⁶ Sikandjo, ikoongoko ema esi: Otitonele mbai eho! Bateseba aasali la inde ate: Asa! ¹⁷ Aasali alidji ate: Iyakongi la owe, moewesa likumu Salomo laate inde atiotonela owe woho ate ahekele mbai Abisage Mosinamita adje moli o mbai. ¹⁸ Bateseba aasali ate: Wolamu! Mbai amene ikomoasela likumu la kole e owe. ¹⁹ Batesaba alingelali atie likumu Salomo, laate akpomesane la inde la kole e Adoniya. La mbala kikima likumu ayamalali la oki ogbotoni la inde, amaali mauli liwoso la Bateseba, mbuse ayabatali la ngbelengo e okumu wonde. Atomali wamobatele nango likumu ngbelengo, inde koto ayabatali ngambo e ewo e lilome e likumu. ²⁰ Bateseba aasali ate: Idjei la ma ema eesi ekoongoko mbai owe! Otitonele mbai eho! Likumu amoaselali ate: Ima oongo eho, laate itiotonela owe eho. ²¹ Bateseba aasali ate: Dhee ate Abisage Mosinamita ahekelne la maangwa Adoniya laate adje moli onde. ²² Likumu Salomo amoongoselali nango ate: Lande ekomoongoko owe Abisaga Mosinamita adje moli o Adoniya? Moongela koto wokumu, la ebili ate adjei manima eloko, koto la kole ende, la kole e nganga-Mwengei Abiatale, koto la kole e Yoaba monga Zeluya! ²³ La eho, likumu Salomo alapali ndai la kombo e Yawe ate: Dhee ate Mwengei akele mbai ndenge ebali inde la otetelake wonde kpaa, inga etidje la motio mo mokalo monde nde Adoniya aaseli ehele engbundu! ²⁴ Sikandjo, nda edjei Yawe la mokalo, inde ongo omai mbai la otetelake abati koto mbai likolo la ngbelengo e okumu e Davidi, wawa o mbai, koto inde ongo okeleli mbai monguta ndi ndenge ewunali inde! Keke ehele Adoniya akoolana. ²⁵ Likumu Salomo amotomali Beneye monga Yehoyada, amobingia, Adoniya aguali. ²⁶ Likumu aasali koto la nganga-Mwengei Abiatale ate: Kekee ongo la Anatote la wilanga wa owe, la ebili ate owongi la logo; ase itiowoola keke, la ebili ate okpali sanduki e Likumu Yawe liwoso la Davidi, wawa o mbai, koto la ebili ate oeneli koto odjidji ango edjaakali oeni wawa odjidji. ²⁷ Ndjongo Salomo aumbali la Abiatale la wotomu wo nganga-Mwengei e Yawe, laate aengese engbundu e Yawe enge easali inde la kole e monguta mo Eli, la Silo. ²⁸ Mboli eho emoumelali Yoabe, ongo otutiali ngambo e Adoniya, atibalali otutei ngambo r Abusalome. Yoabe ayaisali la hema e Yawe, ahelali koto ndjeka dja etumbeli. ²⁹ Wamosumbelali likumu b Salomo mboli ate Yoabe ayaisi la hema e Yawe, adjei ongo ahue e etombeli. Salomo amotomali Beneya monga Yehoyada, amoaselali ate: Keke, omobinge. ³⁰ Beneya aumali la hema e Yawe, aasali okoto la Yoabe ate: Pumba! Likumu moto oasi. Ase amowongoselali ate: Te! Ikogua ahala. Beneya akeeli akpalali loyi luho atie likumu, la oasi ate: Dhenda ndjo nde easi Yoabe, koto ndjo nde awongoseli mbai. ³¹ Likumu aasali la Beneya ate: Kela ndenge easi inde, mobinga, moomba; okolongosa la moto mo mbai koto mo monguta e wawa makila mango masuali Yoabe saa pamba. ³² Yawe akobata makila mande la moto monde amene, la ebili ate awabingali pele iwale wango wadjaakali meemene koto walamu omoyeti inde, awaolali la ewuni, odjangi ate wawa Davidi aewe. Wato waho: Abinele monga Nele, likumu o wamasaze wa Isalayele, koto Amasa monga Yetele likumu la wamasaze wa Yuda. ³³ Makila mawu makokwa la moto mo Yoabe koto la mito ma wana wande la litoto lande, Ase logoo e Yawe ekodjaa libela, atie Davidi, atie litoto lande, atie monguta monde koto atie ngbelengo e okumu wonde. ³⁴ Beneya monga Yehoyada atelali, amobingali, koto amoolali. Amoombali ndondo e monguta monde ongo la lisibe. ³⁵ Likumu amobatali Beneya monga Yehoyada la ebete ende, laate adje likumu e wamasaze; koto likumu amobatali nganga-Mwengei Zadoke la ebete e Abiatale. ³⁶ Likumu atomali wato wamowelele Simei, amoaselali ate: Yamaela monguta la Yelusalema, okoyabata ango, otipumba koto ango la oki la eeti ebete. ³⁷ Yewa olamu ate okogua lisio wungo ekopumba owe koto ekokpanda owe lubwaku mo Kidolona, yewa ate makila ma owe ekokua likolo la moto mo owe. ³⁸ Simei amowongoselali likumu ate: loyi wuho wodjei olamu! motuke mo owe akokela nda ndenge easi likumu la mbai. Simei ayabatali la Yelusalema masio ngbii. ³⁹ Ekelanali ndjo, gboo e wilanga isato, tuke iwale wa Simei watilali atie Akisemana monga Maaka, likumu o Gate. Wato wadjaali omoaseli Simei, la oasi ate: Dhenda, tuke dja owe wadjei ongo la Gate. ⁴⁰ Simei ayamalali, atokolali punda ende, akeeli ongo la Gate atie Akise laate alokane tuke djande. Simei akeeli ongo la Gate awongwali la tuke djande. ⁴¹ Wamoewesali Salomo ate Simei apumbali la Yelusalema la oki ongo la Gate, awongoyiga koto. ⁴² Likumu amowelali Simei, amoaselali ate: Itiolapesali ndai la kombo e Yawe, koto itiowaselali ate: Yewa olamu ate okogua wuse wungo ekopumba owe la oki ebete eeti? Otiwongoselali mbai ate: Edjei olamu! Ioki? ⁴³ Ndjoni otitemeiyali ndai e Yawe la pui enge iyohekelali? ⁴⁴ Likumu aasali la Simei ate: Oewi ndondo e motema mo owe sambo mbe kpaa djinge imokelali owe wawa Davidi; Yawe akowongosa obe wo owe likolo la moto mo owe. ⁴⁵ Ase likumu Salomo akopambwama, ngbelengo e okumu wo Davidi ekomaana liwoso la Yawe. ⁴⁶ Likumu amohekeleli Benaya monga Yehoyada tomaka, apumbali amobingia Simei; Simei aguali koto. Wokumu womaanali la mawo ma Salomo.