¹ Mbuse e dji sambo, dhenga enge eumali. Nabote Moyizeleele adjaali la elanga eesi e ibino, enge edjaali ongo la Yizileele, kelekele e mongua mo Akaba , likumu la Samalia. ² Akaba aasali la Nabote ate: Pekele mbai elanga e owe e bino, la ebili ate elanga eho eume mobele mo mbai mo ndunda, laate esukani la monguta mo mbai. Ikoohekele la ebete eho elanga e bino enge eyeti eho, te inga edjei olamu la aiso ma owe, ikoohekele wadjenge la motio muho. ³ Ase Nabote amowongoselali Akaba ate: Iengiti omungoli woho te wokeke, la otutei limungwene e Yawe ate iyohekele owe lisango e watata wa mbai! ⁴ Akaba awongwali la monguta monde, la magba koto la limemu, la kole e engbundu enge emoaselali Nabote Moyizeleele ate: Itiohekele lisango e watata wa mbai! Alangalali la epe ende, akukolali mbanda ende, atilakali koto. ⁵ Zizable moli onde adjaali atie inde, amoaselali ate: Ndjoni molimo mo owe modjei la magba la otilakaka koto? ⁶ Amowongoselali ate: Imoaselali Nabote Moyizeleele ate: Dele mbai elanga e owe e bino laate iyohekele wadjenge, inga koto obala, ikohekele elanga eeti e bino la ebete eho. Ase aasali ate: Itiohekele owe elanga e mbai e bino! ⁷ Zizabele, moli onde amoaselali ate: Te owe nde okoyamalelaka Isalayele sikandjo? Amala, laka okoke, koto motema mo owe modje la mwemu; mbai ikohekele owe elanga e bino e Zizabele. ⁸ Zizabele adhingali la nkombo e Akaba wikpata abingali eho kase e Akaba, atomali wikpata djaho atie wiloko wato koto atie makumu wango wadjaakali oyabati mongindji la Nabote la gbata ende. ⁹ Dhenga enge edhingali inde la wikpata waho: tiesakolani ate wato wakile wilaka; mobatani Nabote liwoso la wato, ¹⁰ wabatesani wato waale wa minga wamopunde Nabote ate: Omobumakoli Mwengei koto la likumu! Mbuse mopumbesani, mobingani mabukeli ague. ¹¹ Wato wa gbata e Nabote, wiloko wato la makumu wanhgo wakoyabataka la gbata mongindji la Nabote, wakelali ndji ndenge Zizabele awaaselali, a odhendi enge edhinganali inde la wikpata djinge itomali inde. ¹² Watiesakolali ate wato wakile wilaka koto wamobatali Nabata liwosoa wato; ¹³ pele iwale wa minga walingelali wayabatali liwoso lande waotali ohekeli demu la omokambi Nabote liwoso la wato ate: Nabote akomobumakolaka mwengei koto la likumu! Mbuse wakeeli la inde saa e gbata, wamobingali mabukeli, aguali. ¹⁴ Wawatomali wato wamoasele Zizabele ate: Nabote abinganali mabukeli, agiga koto. ¹⁵ Ango Zizabele aokali ate Nabote abinganali mabukeli koto aguali, aasali la Akaba ate: Amala, tota elanga e bino e Nabote Moyizeleele, enge etonali inde oohekeli laate omohekele wadjenge; la ebili ate Nabote ati kine la mokalo, agui ga. ¹⁶ Ango eekali Akaba ate Nabote aguali, ayamalali akeeli la elanga e bino e Nabote Moyizeleele, laate atote eho. ¹⁷ Engbundu e Yawe emodjeeleli Elia, Moibite ate: ¹⁸ Amala, keke liwoso Akaba likumu la Isalayele ongo odjei la Samalia; dhenda la elanga ebino e Nabote, ongo ekiinde okatoti eho. ¹⁹ Okomoasela ate: Dhenda enge easi Yawe: Oti mooli mo wato koto moto o iwa? Okomoasela koto ate: Dhenge enge easi Yawe: Ndji ebete enge mbwa ilamboli makila ma Nabote, mbwa koto ikolambola makila ma owe amene. ²⁰ Akaba aasali la Elia ate: Motone mo mbai, ogboti mbai? Elia amowongoselali ate: Iogbti, la ebili ate oyatambi laate okele enge edjei obe la maiso ma yawe. ²¹ Dhenda, ikookpalelaka odjidji, ikookpasa, ikoola moto kpaa o Akaba, moto ongo odjei motuke la ongo oti motuke la Isalayele, ²² Ikoumesa monguta mo owe nda monguta mo Yoloboame, monga Nebate, nda monguta mo Baesa, monga Akiya la ebili ate omemelesi mbai koto ekelesi isalayele lisumu. ²³ Yawe aasali koto la kole e Zizabele ate: Mbwa wakomolaka Zizabele la esuki e mbume e Yizaleele. ²⁴ Moto ongo o monguta m Akaba okogua gbata akolakana la mbwa, koto ongo okogua la motulu akolakana la mbulu dja likolo. ²⁵ Etidjaali la moto ongo oyatambali nda Akaba la okeli obe la maiso ma Yawe, koto Zizabele, moli onde, ongo odjaakali omotomi. ²⁶ Akelali la ndenge eesi e onalili, la ndenge ekeeli inde oyakongi la wilima, nda ndenge edjaakali okeli wato wa Amola, wango Yawe aumbali la iwo liwoso la wana wa Isalayele. ²⁷ Mbuse ki wingbundu wa Elia, Akaba asalakolali wisindje wande, akpalali makunia, akilali ilaka, alangalali likolo la makunia, adjaakali osombi petee. ²⁸ Engbundu e Yawe emodjeeleli Elia Motisibite, la oasi ate: ²⁹ Otiene ndenge Akaba ayadjimbesi liwoso la mbai? la ebili ate ayadjimbesi liwoso la mbai, itidjese kine odjidji woho la masio mande, ekodjaa la masio ma monga monde, ikoumesaa odjidji la monguta monde.