¹ Bene-Hadade, likumu o Silia, abomanesali wigogo kpaa wa wamasaze wande, wadjaakali makumu ntuku isato la iwale, la wangombe koto la makalo. Atelali olengi Samalia la osanesi eho. ² Awatomali wasumbi mboli la gbata atie Akaba, likumu la Isalayele, la omoaseli ate: Dhenda, wu woasi Bene-Hadade: ³ Palata wa owe koto wolo e owe widjei wa mbai, wali wa owe koto wana wa owe wango walamu wadjei wa mbai. ⁴ Likumu la Isalayele amowongoselali ate: Nkumu o mbai, likumu la mbai, nda easi owe, idjei ongo o owe la djinge kpaa idjei mbai la eho. ⁵ Wasumbi mboli wawongwali, waasali ate: Dhenda wungo oasi Bene-Hadade ate: Iyotomeli wato iasi ate: Ohekele mbai palata e owe koto wolo wo owe, wali wa owe koto wana wa owe. ⁶ Ekundu, ndji la ehele engele, ikotoma tuke dja mbai atie owe, wakoluka olamu olamu la monguta mo owe koto la minguta ma tuke dja owe, waotota ema e owe kpaa elamu, wakoke la djaho. ⁷ Likumu o Isalayele awelali wiloko wato kpaa wa moki, aasali la iwo ate: Iyakongini la ino, dhendani koto yewani ate oholo moto akolukaka otokeli obe, la ebili ate atomeli mbai wato la owatoti wali wa mbai, wana wa mbai, palata e mbai, koto wolo e mbai, koto itimotonele inde djaho! ⁸ Wiloko wato kpaa koto la wato kpaa waasali la Akaba ate: Otimooke koto otimotemei. ⁹ Awaaselali wasumbi mboli wa Bene-Hadade ate: Moaselali nkumu o mbai, likumu ate: Kpaa djinge itomali owe liwoso ate motuke mo owe aokelele, ikokela djaho, ase la wu loi, itikela eho. Wasumbi mboli wawongwali wamokpalelali enge mboli. ¹⁰ Bene-Hasade atomali wamoasele Akaba ate: Dhee wamwenge wakele mbai obe etetelake, inga miisu ma Samalia mikoenga la otumesi mawo ma wato kpaa wango wakotutiaka mbai! ¹¹ Likumu la Isalayele amowongoselali ate: Moto ongo okonangaka moliki la libele lande atiagane nda moto ongo okotokolaka eho! ¹² Ango eokali Bene-Hadade enge emowongweselali inde, wakengali la makumu sese e wilinga wau, aasali koto la tuke djande ate: Yawongelani! Wapotali oyawongeli la osanesi gbata. ¹³ Dhenda, motiesakoli mwesi ayandongbali atie Yakaba, likumu la Isalayele, amoaselali ate: Dhenda enge easi Yawe: Okoeneke ehele ebiba e wato? Ikowakawa keke la mawo ma owe, okoewa ate idjei Yawe. ¹⁴ Akaba aasali te: La mboka e ndai? Amowongoselali ate: Dhenda enge easi Yawe: La tuke dja makumu dja wituka. Akaba aasali ate: Ndai okopota wita? Awongosali ate: Owe. ¹⁵ Akaba atangali tuke dja makumu dja wituka winge wiyamaleli inde, wadjaakali nkama iwale la ntuku isato la iwale, mbuse ewu, atangali wato kpaa, wana kpa wa Isalayele, wadjaakali nkoto Nsambo. ¹⁶ Wapotali opumbi la mbile. Bene-Hadade adjaakali okengi la olangoyi sese e wilinga wau mongindji la makumu ntuku isato la iwale, koto la wagamesi wau. ¹⁷ Tuke dja makumu ma wiuka wapumbali liwoso. Bene-Hadade awatomali wato, wadjaali omoaseli ate: Pele wapumbi ongo la Samalia. ¹⁸ Aasali ate: Inga wakopumbaka la oluki logoo, ahelani iwo ndji wa djei la mokalo, inga wapumbi la osani kindo, wahelani ndji watoni. ¹⁹ Ango tuke dja makumu ma wituka la wamasaze wango wadjaakali owatutei wapumbali la gbata, ²⁰ moto la moto amobingali moto opele mwesi, wato wa Silia watilali. Isalayele awatutiali. Bene-Hadde, likumu o Silia, ayakalesali likolo la punda ende, mongindji la wato wango wakosombaka la wapunda. ²¹ Likumu o Isalayele apumbali aolakolali wangombe, makalo, awaolali wato wa Silia ngbii. ²² Mbuse motiesakoli ayandongbali atie likumu o Isalayele, amoaselali ate: Keke, yatetelesa, mungola olamu koto dhanda wungo wokokela owe; la ebili ate la lipotele e elanga e mbuse likumu la Silia akodja osani la owe. ²³ Tuke dja lkumu o Silia wamoaselali ate: owu mwengei adjei mwengei o mikoli, eho lenge watetelali otoeti iso. Ase tosane la iwo la mbume enge elangali, tokodhenga inga totidjaa la otetelake awaeti iwo. ²⁴ Kela alidji wu loi: Longose likumu liesi liesi elelo ende, wabata makumu ma wituka la wibete wau; ²⁵ Kela egogo e wita enge ekoengana la enge ewungesi owe, la ngombe bii koto la makalo bii. Mbuse tokosana la iwo la ebete enge mbume elangali, okodhenda inga totitetela owaeti. Awaokali, akelali ndji ndjongo. ²⁶ La lipotele e elanga e mbuse, Bene-Hadade awatangali wato wa Silia, atelali ongo la Apeke la osani la Isalayele. ²⁷ Wana wa Isalayele koto watanganali, watotali wilaka wilakake, wakeeli okagbotoni la wato wa Silia. Wabatali wilinga liwoso lawu nda ma masai ma meme, kaikoase wato wa Silia watumesali moki. ²⁸ Moto o Mwengei ayandongbali, aasali la likumu o Isalayele ate: Dhenga enge easi Yawe: La ebili ate wato wa Silia waasi ate: Yawe adjei mwengei o mikoli ati mwengei e mbume elangali, ikokawa ehele egogo e wato la mawo ma owe, okoewa ate idjei Yawe. ²⁹ Wayabatali la wilinga djau masio nsambo wato la wato la ngambo ewu. Wuse wo nsambo, kindo emaanali, wana wa Isalayele wawaolali wato wa Silia wato nkoto eesi la wuse wioikima. ³⁰ Wango watikalali watilali la gbata e Apeke, etutu ewakwali likolo la pele nkoto ntuku iwale la nsambo wango watikalali. Bene-Hadade akeeli oyaisi ndondo e gbata, ongo adjaakali oki mweange la mwange. ³¹ Tuke djande wamoaselali ate: Dhenda, tookali ate makumu ma monguta mo Isalayele wadjei makumu ma motema magbaa; tokonanga makunia la mabele masu, miliki la mito masu, tokokee atie likumu o Isalayele: Eeti mbala okotodhee la mokalo. ³² Walingali makunia la mabele mau koto miliki la mito mau, wakeeli atie likumu o Isalayele. Wamoaselali ate: Motuke mo owe, Bene-Hadade aasi ate: Dhee molimo mo mbai modje la mokalo! Akaba awongosali ate: Adjei yo ndji la mokalo? Adjei manima. ³³ Djinge pele watotali woho nda tondo e loi wolamu koto watotali woho galagala nda eteneli ende mene, la oasi ate: Bene-Hadade adjei manima! Aasali koto ate: Kekeni, djakani la inde. Bene-Hadade aumali atie inde, Akaba amotelesali likolo la likalo lande. ³⁴ Bene-Hadade aasali la inde ate: Ikoowongosela gbata enge wawao mbai amopwesate sangwa; okokela la kole e owe mangalala la Damasi, nda ndenge wawa o mbai akelali la Samalia. Akaba awongosali ate, mbai koto ikoodhee oke, tokokela ogemeiyani. Wakelali ogemeiyani, amodheeli koto ake. ³⁵ Moto mwesi ndondo e wana wa watiesakoli aasali la bola onde, la otutei tomaka dja Yawe ate: Iyakongi la owe, binga mbai. Ase moto oho atonali omobingi. ³⁶ Mbuse amoaselali ate: Nda etitemeiye owe mooli mo Yawe, dhenda, ango ekodhee owe mbai, simba ekoobinga owe. Engele emodheeli inde, simba egbotonoli la inde emobingali koto. ³⁷ Aotonoli la moto opele odji, amoaseali koto ate: Iyakongi la owe, binga mbai. Ongo moto opele amobingali amokondjosali koto. ³⁸ Motiesakoli oho akeeli ayamalali kelekele e mboka e likumu, anangali limbusu la esindje la maiso laate watimoewe. ³⁹ Ango eetali likumu, amodhumbiali likumu la oasi ate: Motuke mo owe adjaali awodja e kindo; dhenda koto, moto opele mwesi ayandongbali adjelia mbai moto opele mwesi, la oasi ate: mobanyani oholo moto opele, inga atila, owe okogua la ebete ende, te koto okoputa talata eesi e palata! ⁴⁰ Ango edjaakali mbai okeli otomu iyati la iyati, moto oho atilali. Likumu o Isalayele aasali la inde ate: Owe amene oteni ga loi lo owe, eumbu e owe eho lenge. ⁴¹ Alongosali galagala limbusu la esindje enge edhihali inde maiso, likumu o Isalayele djaali oewi ate edjaali mwesi e watiesakoli. ⁴² Aasali la likumu ate: Dhenga, enge eyasi Yawe: Nda emotilisi owe iyasali ate ewongi ewongi aolane, okogua la ebete ende koto wato wa owe wakogua la eholo ewu. ⁴³ Likumu la Isalayele awongwali akeeli la monguta monde ongo la Samalia, la limemu koto la magba.