¹ Yakaba amoewesali Zizabele sambo kpaa djinge ikelali Elia, la ndenge ewoolali inde watiesakoli kpaa la ewuni. ² Zizabele amotomelali Elia mosumbi mboli, la omoaseli ate: Dhee ate wamwengei wakele mbai obe la limemu la iwo kpaa, inga ekundu, ndji le ehele engele, itowumesa molimo mo owe enge ekeli owe la molimo e mwesi mwesi owu! ³ Ango eeneli Elia ndjongo, ayaalali, akeeli, la okalesi olimo monde. Aumali la Bele-Seba e Yuda, amodheeli motuke monde. ⁴ Inde amene asombali okendo e wuse weesi la lisobe, ayabatali sese e mote mwesi, aongoli logo, la oasi ate: Igenakoli! Sikandjo, ee Yawe, tota molimo mo mbai, la ebili ate moto molamu owaeti watata wa mbai. ⁵ Ayananolali, alangalali ilo sese e mote. Dhenda, ahumbwa mwesi amopotoli, aasali koto la inde ate: Amala, laka. ⁶ Adhendakolia aeneli mokati mowele ahue e moto monde likolo la mabukeli koto ekoko e malia. Alakali koto akengali, mbuse eho alangalali alidji. ⁷ Ahumbwa o Yawe adjaali mbala ewale, amopotoli, aasali ate: Amala, laka, la ebili ate okondo e owe eidji. ⁸ Alongwali, alakia koto akengia, la otetelake wungo womohekeleli wilaka waho, asombali masio ntuku inei koto likolo ntuku inei, tee la mokoli mo Mwengei, ongo la Holebe. ⁹ Ongo alingelali la buu e mabukeli, ayetesali likolo ongo. Dhenda, engbunndu e Yawe emodjeeleli, la oasi ate: Elia, nde ekokelaka owe ala? ¹⁰ Awongosali ate: Mwengei o wigogo e wita, ikookelelaka owe la mohandia, ase wato wa Isalayele wadhei ogemeiyani wo owe, wabuki witumbeli wa owe, waolia koto watiesakoli wa owe la ewuni, itikalia saa mbai moikima. Sikandjo wakolukaka ondjoli mbai. ¹¹ Yawe aasali la inde ate: Pumba, amala likolo la mokoli liwoso la Yawe! Dhenda, Yawe adjaakali oyeti. Ehoho eesi etetelake edjaakali oati mikolo koto obukakoli mabukeli liwoso la Yawe, ase Yawe atidjaakali ndondo e ehoho eho. Mbuse e ehoho eho, odudumi wo mbume ekelanali, ase Yawe atidjaakali ndondo e odudumi dja mbume djaho. ¹² Mbuse e odudumi wo mbume, misa milolali: Yawe atidjaakali ndondo e misa maho. Mbuse e misa, ondungwani mwesi e logoo koto ehohake. ¹³ Ango eokali Elia eho, ahuali mbanda ende la mokoto monde, apumbali ayamalali la elingelo e buu e mabukeli. Dhenda, moli mookanali la dji ingbundu ate: Elia, okokelaka nde ahala? ¹⁴ Amowongoselali ate: Yawe, Mwengei o wigogo dja kindo, ikookelelaka owe la egalela, ase wato wa Isalayele wadheiya ogemeiyani wo owe, wabukakoli witumbeli wa owe, waolia koto watiesakoli wa owe la ewuni, itikali ndji mbai amene. Sikandjo wakolukaka koto wandjole mbai. ¹⁵ Yawe aasali la inde ate: Wongwa, koto keke la lisobe e Damasi. Ango ekouma owe ongo, momunola Hazaele maita laate aume likumu e Silia. ¹⁶ Okomomunola koto Yehu, monga Nimiki, laate adje likumu la Isalayele; okomomunola koto Elisa, monga Sapate moto o gbata e Abele-Mehola, laate adje motiesakoli la ebete e owe. ¹⁷ Moto ongo okotila ewuni e Hazaele, Yehu akomoola; koto moto ongo okotila ewuni e Yehu, Elisa akomoola. ¹⁸ Ase ikodhee la Isalayele pele nkoto nsambo, wango kpaa wamaakiyo mauli mawu liwoso e Bala, koto minoko mau mambomboki yo wilima wande. ¹⁹ Elia alongwali ango, akeeli, agbotonoli la Elisa monga Sapata, adjaakali okukoli mbume. Edjaakali liwoso lande wangombe ntuku iwale a inei wango wawanangi iwale iwale, ase inde amene adjaali okukoli mbume la wangombe iwale wa gboo. Elia ayandongbali atie inde, alumbali likolo lande mokoto monde. ²⁰ Elisa adheeli ngombe djande, amotutiali Elia obangu, aasali la inde ate: Dhee mbai ikee okayambi wawa la ima, mbuse ikootutia. Elia amowongoselali ate: Keke, koto owongwe; la ebili ate omungole enge ekeli mbai owe. ²¹ Mbuse eho, Elisa awongwali, atotali wangombe waale wango wanangani ebete eikima akawali djaho mbeka; aloliali misa la mite minge wakonangelaka wangombe waho, ahekeleli waho wato wango wadjaakali ango, laate walake. Mbuse ayamalali, amoutiali Elia la omokeleli.