¹ Masio maetali ngbii, engbundu e Yawe emodjeeleli Elia, la elanga esato ate: Keke, yasuma liwoso la Akaba, ikoluesa ewongo likolo la mbume. ² Elia akeeli, la oyasumi liwoso la Akaba. Ndjala ebolo edjaakali la Samalia. ³ Akaba amowelali Abidia, kumu o monguta. Kaikoase Abidia adjaakali omowangi Yawe; ⁴ ango eolali Zizabele watiesakoli kpaa wa Yawe, Abidia atotali watiesakoli nkama eesi awaisali iwo tuku itano, la tuku itano ndondo e buu e mabukeli, awalakesali la makoke koto la malia. ⁵ Akaba aasali la Abidia ate: Leka leka la moki la wilanga kpaa wamalia koto la mabwaku kpaa ma mikeli; eeti mbala ekodjaa la ngasi, tokobanya mokalo dja ngombe djasu koto punda djasu, titiola kine nama djasu. ⁶ Wakawanali moki la okaluki, Akaba akeeli la mboka eesi inde amene, Abidia koto atutiali eeti mboka inde amene. ⁷ Ango odjaakali Abidia otutei mboka eende, dhenda Elia agbotonoli la inde. Abidia amoyewali, akwali mbanda sese e inde, aasal koto ate: Edjei owe, likumu la mbai Elia? ⁸ Amowongoselali ate: Edjei mbai, keke, moasela likumu la owe ate: Elia inde ndolo! ⁹ Abidia aasali ate: Nda lisumu likeli mbai, laate omokawe motuke mo owe la mawo ma Akaba, ongo okoola mbai? ¹⁰ Yawe adjei la mokalo! Eti la endondo eikima, te la wokumu woikima wungo wotomiti likumu la mbai wato laate waoluke. Inga waasa ate, ati ahala, adjaali olapesi wokum woho koto la etondo eho ndai ate wawoeniti owe. ¹¹ Sikandjo okoasaka ate: Keke, moasela likumu la owe ate: Elia inde ndolo! ¹² Ango okodhee mbai owe, elimo e Yawe ekookpala owe la ebete enge eyewiti mbai, ango ekomoewesa mbai Akaba, adjia atiogbote, akondjola mbai. Laate motuke mo owe amowangi Yawe tee la wolenge wonde. ¹³ Watimoewese likumu la mbai ate loi wungo wokelali mbai ango owaolali Zizabele watiesakoli wa Yawe? Iwaisali watiesakoli nkama eesi e Yawe, ntuku itano, la ntuku itano ndondo e buu eesi e mbume, ikoalakisaka koto ikowakengesaka malia. ¹⁴ Sikandjo okoasaka ate: Keke, moasela likumu la owe ate: Elia indondolo! Aondjola mbai. ¹⁵ Aseko Elia aasali ate: Yawe e wigogo e wita, ongo odjei mbai motuke monde, adjei la mokalo! Keke ehele ikoyasuma liwoso la Akaba. ¹⁶ Abidia akeeli ogbotoni la Akaba, amoewesali loi wuho. Akaba akeeli ogbotoni la Elia. ¹⁷ Ango ndji omoeneli Akaba Elia, la mbala kikima Akaba amoaselali ate: Edjei owe moto okpaleli Isalayele wodjidji? ¹⁸ Elia awongosali ate: Mbai kpaleliti Isalayele wodjidji, ase edjei owe nde la monguta mo sangwa, la ebili ate odheini tomaka dja Yawe okiani atie Wabala. ¹⁹ Watoma wato wabomanese Isalayele eesi bii atie mbai, la mokoli mo Kalamele, la koto watiesakoli nkama inei la ntku itano wa Bala koto watiesakoli nkama inei wa mote mo oyakongi, wango wakolaka la meza ma Zizabele. ²⁰ Akaba awatomali wato atie wana kpaa wa Isalayele owabomanesali watiesakoli ongo la mokoli mo Kalamale. ²¹ Elia ayandongbali atie wato kpaa, aasali ate: Tee la nda engele eohimahimani ino la mamungwene? Inga Yawe adjei Mwengei omeemene, motutiani inde, ase inga edjei nde Bala, motutiani inde! Wato watimowongoselali loi te woikima. ²² Elia aasali la wato ate: Mbai itikali motiesakoli mo Yawe ndi mbai amene, ase watiesakoli wa Bala wadjei pele nkama inei la ntuku itano. ²³ Watohekele iso ngombe dja pele iwale; iwo wamoone ngombe opele mwesi, watenakole eho koto wabate eho likolo la kula, watbate eho misa; ndjongo mbai koto, ikowongele ngombe opele odji, ikobata eho likolo la kula, ase itibata koto misa. ²⁴ Okowelani nkombo e mwengei onu; mbai koto ikowela nkombo e Yawe. Ongo mwengei okowongosa la misa, inde nde akodjaa Mwengei. Wato kpaa wawongosali ate: Wolamu! ²⁵ Elia aasali la waiesakoli wa Bala ate: Ononi ngombe opele eesi, mowongeleni liwoso laate odjeini wato ngbii, mbelani nkombo e mwengei onu, ase otbateni misa. ²⁶ Watotali ngombe opele ongo owahekeleli iwo, wamowongelali, wambelali koto nkombo e Bala, opoti boo tee la mbile, la oasi ate: Bala towongosela iso! Ase mooli moikima motiokanali. Wadjaakali ohumboi humboi liwoso la etumbeli ekelali iwo. ²⁷ La mbile, Elia awadendeyali iwo, aasali koto: Pamani la moli motetelake, la ebili ate adjei mwengei, akonduaka ema eesi, eeti mbala adjei la otomu, eti mbala aki okendo, eeti mbala alangali, koto eeti mbala akosuswa. ²⁸ Wapamali la moli motetelake la oyakotokoli la wiwuni koto la makonga la ndenge e ehahaneli e iwo, tee makila mawadhokali iwo. ²⁹ Ango eyetali mbile, watiesakolali tee engele esumake likao. Ase mooli moikima motidjaali, koto moto moikima atiwongosali, koto moto moikima atibatali huaka. ³⁰ Elia aasali la wato kpaa ate: Yandongbani atie mbai! Moto kpaa ayandongbali atie inde. Elia awongelali etombeli e Yawe, enge ebukiakolali iwo. ³¹ Atotali mabukeli liomu la iwale motio mo mawota ma wana ya Yakobo, wango Yawe aasali ate: Isalayele ekodja nkombo e owe; ³² amaali la mabukeli maho etumbeli e nkombo e Yawe. Atongali liwela elingi etumbeli e osungu e omeki ooni migono miale. ³³ Awongelali kula, atenakolali ngombe opele, abatal eho likolo la kula. Mbuse aasali ate: Tumesani wikoko inei la malia, swakolani djaho likolo la likao litumbake, koto likolo la kula. ³⁴ Aasali ate: Kelani eho alidji. Wakelali eho mbala ewale. Aasali ate: Kelani eho mbala esato. ³⁵ Malia mapotali ohumbi la etumbeli, watumesali koto malia la liwola. ³⁶ La engele esumake likao, Elia, motiesakoli, ayandongbali, aasia ate: Yawe, Mwengei o Abalayama, Isaka koto o Isalayele! Wato waewe keke ate odjei Mwengei o Isalayele, ongo odjei motuke mo owe, ate ikeli dji sambo kpaa la engbundu e owe! ³⁷ Wongosela mbai, laate wa wato waewe ate owe nde Yawe, ongo odjei Mwengei, koto la owe nde owongosi motema mowu mbuse! ³⁸ Misa ma Yawe miyadjimbali, milongosali likao litumbake, kula, mabukeli koto mbume, egulali koto malia mango madjaakali la liwela. ³⁹ Ango eeneli wato kpaa ndjongo, wakuali mbanda sese waasali ate: Yawe nde adjei Mwengei! ⁴⁰ Elia waaselali ate, wahelani watiesakoli wa Bala; te mwesi owu atitile! Wawahelali. Elia ayadjimbali la iwo la lobwaku wo mokeli wo Kisine, awatenali kingo ongo. ⁴¹ Elia aasali la Akaba ate: Amala, laka koto kenga; la ebili ate ehele etale ekookanaka edjei lokindi wo ewongo mosungu. ⁴² Akaba atelali la olaki koto la okengi. Ase Elia atelali la mokoli mo Kalamele; ayaandali la mbume, abatali mbanda ende awodja e mauli mande, ⁴³ aasali la motuke monde ate: Tele, dhenda ngambo e ewale. Motuke atelali, adhendali, aasali ate: Ema eti. Aasali mbala Nsambo ate: Wongwa. ⁴⁴ La mbala e sambo, aasali ate: Dhenda ma ligite enge ekotelaka ongo la ewale, edjei nda likadho e ewo e moto. Elia aasali ate: Tela, asa koto la Akaba ate: Nanga nama la liklo adjimba la ebili ate ewongo mosungu etiohele. ⁴⁵ La engele eho likolo liindali la mapata, ehoho ewongwali, ewongo mosungu elooli. Akaba atelali likolo la likalo, akeeli la Yizeleele. ⁴⁶ Ewo e Yawe edjaakali likolola Elia, anangali moliki la libele lande koto aumbali obangu liwoso la Akaba tee la Yizileele.