¹ Elia, Motisibe, mwesi o wato wa Gileade aasali la Akaba ate: Yawe adjei la mokalo, Mwengei o Isalayele, ongo odjei mbai motuke monde! La wi wilanga ligite e ewongo etidja, longose ndji engbundu e mbai. ² Engbundu e Yawe emodjeeleli Elia ate: ³ Longwa ahala, keke ngambo e elongweli e liwusa wuse, koto yaisa la lobwaku e Kelite, enge edhengani la Yolodani. ⁴ Okokenga malia ma lobwaku e mokeli moho, ikowahekele yanganga la olakesi owe. ⁵ Akeeli,akelali ndenge easali Yawe, ndjongo akeeli, aumali oyabati la lobwaku wo mokeli mo Kelete, enge edengani la Yolodani. ⁶ Wayanganga wadjaakali omokpaleli okoke la moeni boo, koto okoke la moeni la pokwa, adjaakali okengi malia ma lobwaku. ⁷ Mbuse e ma masio malia ma lobwaku wo mokeli moho maomali, la ebili ate ewongo etiluali kine la moki. ⁸ Engbundu e Yawe emodjeleli Elia ate: ⁹ Amala, keke la Salapata e Sidonia, abata ango. Dhenda, imohekeli moli mwesi ogueli molome tomaka ate aolakese. ¹⁰ Ayamalali, akeeli la Salapata, alingelali la moluhe mo gbata, dhenda, edjaali la moli mwesi ongo ogweli molome adjaali ango akoonoko kula. Amowelali, aasali ate: Keke olukele mbai, ma malia la teni, iyakongi la owe, laate ikenge. ¹¹ Akeeli okaluki. Amowelali alidji, amoaselia koto ate: Djele mbai, iyakongi la owe, esuki e okoke la ewo e owe. ¹² Amowongoselali ate: Yawe, Mwengei o owe, adjei la mokalo! iti la okoke wungo woweli, idjei ndji la ma mogbuku mo moteke la teni la ma maita la ekoko. Dhenga, ikoonoko wisuki wiale wa kula, ikowongwaka, ikolamba eho la kole e mbai koto la kole e mana o mbai; tokolaka, mbse eho tokogua. ¹³ Elia aasali ate: Otiwange, keke, kela ndenge iyoaseli. Ase la winge widjei ango, kelela yo mbai ma okoke, odjele mbai eho; okokela mbuse enge e owe la monga mo owe. ¹⁴ La ebili ate, dhenda wungo woasi Yawe, Mwengei o Isalayele: Moteke enge edjei la teni etidjanga kine koto maita mango madjei la ekoko etisila, tee wuse wongo Yawe akoluese ewongo likolo la mbume. ¹⁵ Akeeli, akelali koto ndenge easali Elia. Masio kpaa edjaakali la wilaka wilakake, la inde, liemba lande, koto la Elia. ¹⁶ Moteke mngo modjaakali la teni motidjangakali kina, maita mango madjaakali la ekoko matisilali kine, la otutei engbundu e Yawe enge epumbali la monoko mo Elia. ¹⁷ Muse e dji sambo, mana o moli oho meemene monguta, emoanali, ekoni ende eumali minga atidjaakali kine ohatiani. ¹⁸ Moli oho aasali la Elia ate: Nda ema edjei aie mbai la owe, moto o Mwengei? Odjaali atie mbai nde ohundole mbai owusi wo mbai, koto la omooli monga mo mbai? ¹⁹ Elia aasali la inde ate: Pekele mbai mana o owe. Amototali atie moli oho, atelali la mwange e likolo ongo odjaakali inde oyabati, amolangeyali likolo la epe ende. ²⁰ Apotali omombeleli Yawe, aasali ate: Yawe, Mwengei o mbai, okpalia alidji odjidji te atie oholo moli ongo ogueli molome, ebete enge ekoabataka mbai, la ndenge edhei owe ate monga monde ague? ²¹ Ayaandali mbala isato likolo la mana, amombelelali Yawe, aasali koto ate: Yawe, Mwengei o mbai, iyakongi la owe, ate molimo mo oholo mana ewongwe ndondo ende! ²² Yawe aokali moli mo Elia, molimo mo mana ewongwali ndondo ende, awongwali la mokalo. ²³ Elia amototali mana, ayadjimbali ongo edjaaki inde la mwange mo likolo e monguta, amowongosali atie nango. Elia aasali koto ate: Modhenga, monga mo owe adjei la mokalo. ²⁴ Moli oho aasali la Elia ate: Igemei sikandjo ate odjei moto o Mwengei, koto ate engbundu e Yawe la monoko mo owe edjei meemene.