¹ Engbundu e Yawe emodjeeleli Ye, monga Hanai, la kole e Baesa ate: ² Nda eopumbesali mbai la miisuu, oyobati koto likumu e wato wa mabi Isalayele, ase la ebili ate otutiali mboka e Yeloboame, koto owakelesali wato wa mbai Isalyele lisumu, la omemelesi mbai la masumu mau, ³ Dhenda, ikomokpasaka Baesa la monguta monde, ikoumesa koto monguta mo owe nda monguta Yoloboame, monga Nebate. ⁴ Moto ongo e monguta mo Baesa ongo okogua la gbata akolakana la mbwa, koto wango wa owe wango wakogua la motulu wakolakana la mbulu dja likolo. ⁵ La sambo djadji dja Baesa, djinge ikelali inde, la wokulu wonde, idhiganiti la ahala e sambo dja masio ma makmu ma Isalayele? ⁶ Besa alangalali ebee eikima la watata wande, aombanali la Tileza. Mona onde atikaleli ebete ende. ⁷ Engbundu e Yawe e odjaali la mboka e motiesakli Yehu, monga Hanani, la kole e Baesa koto la kole e monguta monde, inga la kole sambo mbee kpaa djinge ikelali inde liwoso la maiso ma Yawe, la omemelesi la tomu dja mawo mande la oumi koto ndenge kikima la monguta mo Yoloboame, inga la ebili ate abingali monguta mo Yoloboame. ⁸ La elanga e tuku iwale e okumu e Asa, likmu la Yuda, Ela , monga Baesa, aumali likumu la Isalayele la Tileza. Aumwali wilanga iyale. ⁹ Motuke monde Zimili, likumu e esuki e makalo, apotali molingeleli inde likita libe. Ela adjaakali la Tileza, akokenga, koto akolangwaka la monguta mo Alatasa, likumu e monguta mo likumu Tileza. v 10 Zimeli alingelali, amobingali inde koto amoolali, la elanga e ntuku iwale la nsambo e okumu e Asa, likumu la Yuda, apotali oamaleli la ebete ende. ¹¹ Ango eumali inde likumu koto ayabatali la ngbelengo e okumu wonde, aolali monguta kpaa mo Baesa, atimokalesal moto e moikima ongo okosinaka la etutu, te wawa, te bola. ¹² Zimeli abukakolali monguta kpaa mo aesa, la outei engbundu e Yawe enge eyasal inde la monoko mo motiesakoli Yehu la kole e Baesa, ¹³ la kole e masumu kpaa djinge Baesa la monga monde wakelali, koto djinge wawakelesali Isalayele,Yawe, Mwengei o Isalayele amemeleli la kole oyakongi la wilima wau. ¹⁴ Samo dja dji dja Ela la djinge kpaa ikelali inde idhinganiti la ahala sambo dja asio ma makumu ma Isalayele? ¹⁵ La elanga e ntuku iwale la nsambo e okumu wo Asa, likumu la Yuda, Zimeli adjaali likumu masio nsambo la Tileza. Wato wa witondo kpaa wayabatali la oluki omosanesi Gibetone ongo odjaakali ngambo e Wapilitia. ¹⁶ Ango eokali wato wango wadjaakali la lisai ate: Zimeli akelali likita, amoolia koto likumu! La enge wuse la ndondo e lisai Isalayele eesi bii wamoumesali Omili, likumu la wamasaze. ¹⁷ Omili koto Isalayele eesi kpaa mongindji la inde wakeeli la Gebetone wapotali olengi Tileza. ¹⁸ Zimili aeneli ate gbata epwesanali, alingelali la monguta mosungu mo likumu, alongosali ongindji la inde monguta mo likumu. Ndjongo nde eguali inde, ¹⁹ la kole e masumu mango makelali inde, la okeli enge edjaakali obe la maiso ma Yawe, la otutei mboka e Yeloboame, la oyahekeli la masumu mango makelali Yeloboame laate awakelese Isalayele lisumu. ²⁰ Sambo djadji dja Zimili, la likita linge likelali inde edhinganiti la ehele ahala dja masio ma makumu ma Isalayele? ²¹ La engele eho nde wato wa Isalayele wakawanali la wisuki wiale: Esu eesi e wato walukali omoumesi Tibini, monga Ginata, likumu, enge edji ngambo e Omili. ²² Wango wadjaakali ngambo e Omili walongali wango wadjaakali omotutei Tibini, monga Ginata. Tibini aguali, Omili aumali likumu. ²³ Elanga e ntuku isato la mwambi e okumu e Asa, likumu la Yuda, Omili aumali likumu o Isalayele. Akelali wilanga liomu la iwale. Mbuse e odjei likumu wilanga motoba la Teleza, ²⁴ Asombali mokoli mo Samalia atie Semele la talata iwale e palata; amaali likolo la mokoli, ahekeleli gbata enge emaali inde nkombo e Samalia, la otutei nkombo Semele, likumu e mokoli. ²⁵ Omili akelali enge edjaakali obe la maiso ma Yawe, adjaakali okeli obe owayeti wango kpaa wadjaakali liwoso lande. ²⁶ Atuteiyali moka kpaa dja Yeloboame, monga Nebate, ayahekeleli la masumu ma mango Yeleboame awakelesali Isalayele, Yawe, Mwengei o Isalayele, amemeleli la wilima e oyakongi djau. ²⁷ Sambo djadji dja Omili, djinge ikelali inde la okulu wonde wungo wodjaakali inde okeli la waho, itidhinganali la ahala e sambo dja masio ma makumu ma Isalayele? ²⁸ Omili alangalali ebete eikima la watata wande, aombanali koto la Samalia. Akaba monga monde aumali likumu la ebete ende. ²⁹ Akabe, monga Omili, aumali likumu la Isalayele la elanga e ntuku isato la mwambi e Asa likumu la Yuda. Akaba, monga Omili, aamalelali Isalayele la Samalia wilanga ntuku iwale la iwale. ³⁰ AKaba, monga Omili, akelali enge edjaakali obe la maiso ma Yawe, oyeti wango kpaa wadjaakali liwoso lande. ³¹ Nda osombi la masumu ma Yeloboame, monga Nebate, Amoikali Zizabele, moseka Etibala, likumu la Sidonia, apotali omokeleli Bala koto omomaeli mauli. ³² Amaali etumbeli la kole e Bala ndondo e monguta mo Bala enge emaali inde la Samalia, ³³ akelali koto elima e oyakongi ewangesake. Akaba akelali koto oe oyeti makumu kpaa ma Isalayele wango wadjaakali liwoso lande, la omomemelesi Yawe, Mwengei o Isalayele. ³⁴ La masio mande, Hiele moto o Betele amaali Yeliko, ango ebatalli inde mogindele moho, Abilame monga monde o poo aguali, koto ango eyamalesali inde miluhe maho, Sekube monga monde o gboo aguali koto, la otutei engbundu enge Yawe aasali la monoko mo Yosua, monga Nunu.