¹ La elanga e liomu la mwambi e wokumu e Yoloboame, monga Nebate, Abiyame aumali likumu la Yuda. ² Amalelali wilanga wisato ongo la Yelusaleme. Nango awelanali Maaka, moseka Abisalome. ³ Apotali okeli masumu kpaa mango madjaakali okeli sango liwoso lande. Motema monde mwesi kpaa motidjaakali atie Yawe, Mwengei onde, nda edjaakali motema mo Davidi sango. ⁴ Ase la kole e Davidi, Yawe, Mwengei onde, amohali lotambe la Yelusalame ndenge emopumbesali inde mana onde mbuse ende koto ndenge eadheeli ate Yelusaleme edje. ⁵ La ebili ate Davidi akelali djinge idjaakali olamu la maiso ma Yawe, la masio ma mokalo monde aibukali tomaka djande te eesi, longosa ndji loi wo Uliya mo Heti. ⁶ Wita widjaakali ndondo e Loboame la Yelobame masio kpaa ma mokalo monde. ⁷ Sambo djadji dja Abiyame koto la djinge kpaa ikelal inde idhinganiti la ahala e sambo dja masio ma makumu ma Yuda? Wita wipumbali ndondo e Abiyame la Yeloboame. ⁸ Abiyame alangalali ebete eikima la watata wande, wamoombali la gbata e Davidi. Monga monde, Asa atotali eholo ende. ⁹ La elanga e iba e Yeloboame, likumu la Isalayele, Asa amalelali Yuda. ¹⁰ Amalelali wilanga ntuku inei la eesi ongo la Yelusaleme. Nkombo e nango edjaali Maaka, moseka Abisalome. ¹¹ Asa akelali enge edjei olamu la maiso ma Yawe, nda Davidi, sango. ¹² Alongosali pele dja ndumba la moki, alongosali wilima winge wikelali watata wande. ¹³ Alongosali koto otwa e Maaka, nango, la ebili ate akelali elima eesi e oyakongi la owangesi. Asa abukakolali elima e oyakongi ende, atumbali eho la lubwaku e mokeli mo Kidelome. ¹⁴ Ase wibete widjambani wiisalamatali, te ndenge motema mo Ase edjaakali kpaa eho atie Yawe la mokalo monde kpaa. ¹⁵ Abatali la monguta mo Yawe wiho wisaisani la sango koto la inde amene, palata, wolo koto la wateni. ¹⁶ Wita widjaakali ndondo e Asa la Baesa, likumu la Isalayele, la mokalo mowu kpaa. ¹⁷ Baesa, likumu la Isalayele, atelali osanesi Yuda; amaali Lama, la otekesi wango wa Asa, likumu la Yuda, obupmbi la olingeli. ¹⁸ Asa atotali palata kpaa koto wolo kpaa winge witikalali la wibete eisake e monguta mo Yawe koto la wibete eisake e monguta mo likumu, ahekeleli djaho la mawo ma tuke djande, la mbuse likumu Asa awatomali iwo atie Bene-Hadade, monga Tabilimone, nga Hezeyone, likumu la Sulia, ongo odjaakali oyabati la Damasi. Likumu atomali wamoasele ate: ¹⁹ Ogemeiyani wodjei ndondo e mbai la owe, ndenge edjaakali eho ndondo e wawa la sangwa. Dhenda, iyotomeli likao e palata la wolo. Keke, obuke ogemeiyani e ino la Baesa, likumu o Isalayele, la ebili ate adje lihele la mbai. ²⁰ Bene-Hadade amookelali likumu Asa; atomali makumu ma wamasaze wande la osanesi gbata dja Isalayele, aolali Iyone Dane, Abele-Bete-Maaka, la kinelote eesi kpaa, koto moki kpaa mo Nepatali. ²¹ Ango eokali Baesa ndjongo, adheeli omai Lama, atikalali la Tileza. ²² Likumu Asa awelali Yuda kpaa, odjangi olongosi moto moikima, wakpalali mabukeli a mite minge Baesa akelelali la omai Lama; likumu Asa akelelali djaho la omai Geba e Benzamina koto la Mizipa. ²³ Sambo djadji, la samb kpaa dja Asa la wokulu wonde kpaa la djinge kpaa ikelali inde, la wagbata winge wimaali inde idhinganiti la ahala e masio ma likumu ma Yuda? Ango emali inde mowange, emwanali la makolo. ²⁴ Asa alangalali mongindji la watata wande, wamoombali koto ebete eikima la watata wande la gbata e Davidi, sango. Monga monde Yozapata atikalali la ebete ende. ²⁵ Nadabe, monga Yeloboame aumali likumu la Isalayele la elanga e wale e Asa likumu la Yuda. Amalelali Isalayele wilanga wiale. ²⁶ Adjaakali okeli wungo wodjei obe la maiso ma Yawe, adjaakali otutei mboka e sango, ayahekeleli la asumumango sango wakelesali Isalayele. ²⁷ Baesa, onga Akiya, o monguta mo Isakale apotali omokeleli inde iita; Baesa amoolali ine ongo la Gibetane, enge edjaakali e wa Pilisitia, ango Nabade koto la Isalayele eesi bii walengali Cibetone. ²⁸ Ndenge ehenge nde Baesa amoolali inde la elanga esatoe Asa, likumu la Yuda, apotali omaleli la ebete ende. ²⁹ Ango eumali nde likumu, aolali monguta mwesi bii mo Yoloboame, atimodheeli moto te moiki koto aolali djinge kpaa idjaakali ohatiani, la otutei engbundu e Yawe enge eyasali inde la monoko mo motuke monde Akiya mo Silo, ³⁰ La kole e masumu mango makelali Yoloboame koto la djinge iwakelesali inde Isalayele, emomemelisali Yawe, Mwengei o Isalayele. ³¹ Sambo djadji dja Nadabe djinge paa ikelali inde idhinganiti la ahala e sambodja masio ma makumu ma Isalayele? ³² Wita widjaakali ndondo e Asa la Baesa ikumu la Isalayele masio mau kpaa. ³³ La elanga esato e Asa, likumu la Yuda, Baesa, monga Akiya aumali likumu la Isalayele eesi biila Teleza. aumwali wilanga ntuku iwale la inei. ³⁴ Akelali enge edjaaali obe la maiso ma Yawe, asombali koto la mboka e Yelooame, ayahekeleli la masumu mango Yeloboame awakelesali Isalayele.