¹ La engele eho, Abiya monga Yeloboame adjaali la ekoni. Yeloboame aasali la moli onde ate: Iyakongi la owe, yamala, yakukola laate watiewe ate odjei moli o Yeloboame, keke la Silo. Dhenda, Akiya, motiesakoli adjei ongo. Inde moto ondjaselali ate ikodja likumu e ehele wato. ³ Keke mongindji la owe, makoke liomu, mikati koto teni e woi, lingela atie inde; akoasela enge ekomoumela mana. ⁴ Moli o Yeloboame akelali ndjongo; ayamalali akeeli la Silo, alingelali la monguta mo Akiya. Akiya atidjaakali kine oeni, la ebili ate maiso mande matidjaakali kine obandani la kole e owange. ⁵ Yawe aasali la Akiya ate: Moli o Yeloboame akodjaa o oeni la kole e mana onde, la ebili ate adjei la ekoni. Okomoasela inde ndjo la ndjo. Ango ekouma inde, akoyakela nda moto odji. ⁶ Ango eokali Akiya lokindji dja makolo mande, engele enge edjaakali inde okpandji moluhe, aasali ate: Lingela, moli o Yeloboame; ndjoni ekoyaumesaka owe nda moto odji? Itomani ate iyoasele sambo teteleke. ⁷ Keke, moasela Yeloboame ate: Dhenga enge eyasi Yawe, Mwengei o Yisalayele: Mbai nde iyoonoli ndondo e wato, iyobatali likumu e wato wa mbai Isalayele, ⁸ ipwesali wokumu la monguta mo Davidi, iyohekeleli owe eho. Otidjaakali nda motuke mo mbai Davidi, ongo odjaakali odhendeli tomaka dja mbai koto odjaakali osombi mbuse e mbai la motema monde kpaa, adjaakali okeli enge edjaakali olamu la maiso ma mbai. ⁹ Okelali obe owaeti wango kpaa wadjaakali liwoso la owe, okeeli oyakeleli wamwengei wadji, koto wilima e wiyonda la ohekeli mbai limemu, alumbia koto mbai mbuse e mokongo mo owe! ¹⁰ Eho lenge ikokpalelaka liemba la Yeloboame magba, ikosesela moto opele kpaa la liemba e Yeloboame, edje ongo odjei motuke koto la ongo oti motuke la isalayele, ikokpasa monguta mo Yeloboame nda ekokpasaa iwo wisoki, tee ekosalamata eho. ¹¹ Moto ongo o monguta mo Yeloboame ongo okogua la gbata akolakana la wambwa, ongo koto okogua la motulu akolakana la wambulu dja likolo. La ebili ate Yawe aasi ndjongo. ¹² Owe, yamala, keke la monguta mo owe. Engele enge makolo ma owe makolingela la gbata, mana akogua. ¹³ Isalayele kpaa akomolela, wakomoomba koto; la ebili ate edjei ndji inde moikima la monguta mo Yoloboame ongo okoombana la mbila, la ebili ate adjei moto moikima la monguta mo Yeloboame ongo ekoenene ema elamu liwoso la Yawe, Mwengei o Isalayele. ¹⁴ Yawe akomopumbesela Isalayele likumu ongo okoola monguta mo Yeloboame enge lisio. Eti eho nde eumiga? ¹⁵ Yawe akobinga Isalayele, ndji ndenge libisibisi likobinganaka la malia; akopwesa Isalayele la mu moki molamu enge ehekeleli inde watata wau, akowaandja la ngambo eeti e ewale, la ebili ate wamomemelesi Yawe la ndenge ekeleli iwo wilima. ¹⁶ Akokawa Isalayele la kole e masumu mango Yeloboame akelali koto akelesali Isalayele. ¹⁷ Moli o Yeloboame ayamalali akeei. Aumali la Zileza, koto nda eumali inde ahue e monguta mana aguali. ¹⁸ Wamoombali, Isalayele kpaa alelali, otutei engbundu e Yawe enge eyasali inde la monoko mo motuke monden motiesakoli Akiya. ¹⁹ Sambo djadji dja Yeloboame ndenge esanali inde wita la ndenge eyamalelali inde, itiengali la matanda ma sambo dja masio ma makumu ma Isalayele. ²⁰ Yeloboame ayamalelali wilanga ntuku iwale la iwale, mbuse aguali, alangalali ebete ekikima la watata wande, monga monde Nadabe, ayamalelali la ebete ende. ²¹ Leboame monga Salomo aumali likumu la Yuda. Adjaali la wilanga tuku inei la eesi angoemali inde likumu, aamalelali wilanga liomu la nsambo ongo la Yelusaleme, gbata enge Yawe aonoli la mawota kpaa a Isalayele laate abate nKombo ende. Nkombo e nango edjaaali Naama, moseka mo moki mo Amona. ²² Yuda akelali enge edjaali obe la maiso ma Yawe, wamookesali limemu oyeti limemu linge liokaali inde la djinge kpaa ikelali watata wau la masumu mango wakelali iwo. ²³ Iwo koto wadjaakali wameeli wibete winge widjambana la wilima kotola wiho wo oyakongi likolo e mokoli kpaa modjambani koto sese dja mite kpaa idjei la kasi. ²⁴ Edjaakali koto la pele dja dja ndumba la moki. Wadjaakali otutei sambo kpaa djinge itonana dja witondo kpaa winge wiumbali Yawe la djaho liwoso la wana wa Isalayele. ²⁵ La elanga etano e ikumu Loboame, Sisake, likumu la Ezipito, atelali osanesi Yelusaleme. ²⁶ Atotali wiho wa motio wa monguta mo Yawe koto wiho wa motio e monguta mo likumu, watotali kpaa. Atotali nguba kpaa dja welo djinge kelali Salomo. ²⁷ Likumu Loboame akelali la ebete e djaho nguba dja kuibele, ahekeleli djaho makumu ma wato wakohumbaka obangu,wango wadjaakali obanyei moluhe mo monguta mo likumu. ²⁸ Engele kpaa likumu adjaakali oki la monguta mo Yawe, wato wango wakohumbaka obangu wadjaakali omokpali; wadjaakali koto omowongosi la mwange mo wato wango wakohumbaka obangu. ²⁹ Sambo djadji dja Loboame la djinge kpaa ikelali inde, idhinganiti la matanda e sambo dja makumu ma Yuda? ³⁰ Wita widjaakali ebngele kpaa ndondo e Loboame la Yeloboame. ³¹ Loboame alangalali ebete eikima la watata wande la gbate e Davidi. Nango awelanali Naama, mo Amona. Mana onde Abiyame apotali omalele la ebete ende.