¹ Dhenda, moto mwesi o Mwengei olongali la Yuda la oki la Betele, atutiali engbundu e Yawe, engele enge Yoloboame ayamalali la etumbeli laate alongose malasi. ² Apamelali etumbeli, la otutei engbundu e Yawe, aasali ate: Etumbeli! Etumbeli! dhenge ehele easi Yawe: Dhenda mana opele mwesi akowotana la monguta mo Davidi, nkombo ende ekodjaa Yosiasi; la meemene, wanganga-Mwengei wa wibete winge widjambani, wango wakopumbesaka milungu ma wambeka likolo la owe, akowakawa mbeka likolo la owe, koto akolongosa mikwa ma wato likolo la owo! ³ La wuse woho, ahekeleli la oenesi sambo djinge ikodja, aasali ate: Dhenga enge ekoenese enge easali Yawe ate: Dhenda, eumbeli ekobukia, miusu minge idjei likolo ikoandjana. ⁴ Ango eokali likumu enge engbundu enge epamali moto o Mwengei la kole e etumbeli e betele, ayandongbali alongosali ewo ende likolo la etumbeli, aasali ate: Mohelani! La mbala kikima ewo enge enanolali Yoloboame la kole ende eomali, atiengali alidji wongwesi eho atie inde amene. ⁵ Etumbeli eh ebukiali, miusu minge midjaakali likolo miandjanali, ndji ndenge eeneseli moto o Mwengei, la otutei engbundu e Yawe. ⁶ Ndjongo likumu awongolali, aasali la moto o Mwengei ate: Iyakongi la owe, titimesa motema ma Yawe, Mwengei o owe, yakongo la kole e mbai, laate ewo e mbai ewongwe. Moto o Mwengei amotitimesali Mwengei motema, ewo e likumu ewongwali nda ndenge edjaakali eho liwoso. ⁷ Likumu aasali la moto o Mwengei ate: Lingela mongindji la mbai la monguta, olake ma ema, koto ikooohekele likao. ⁸ Moto o Mwengei aasali la likumu ate: Tee inga oheele mbai awodja e monguta mo owe, itilingela mongindji la owe. Itilaka koto okoke e owe, itikenga koto malia la ehele ebete; ⁹ La ebili ate ndenge eheleli mbai tomaka,la outei engbundu e Yawe ate: Otilakaokoke koto otikenga malia, otiwongwanela kine mboka enge ekeeleli owe. ¹⁰ Akeeleli mboka edji, atiwongwanelali ejeeleli inde la Betele. ¹¹ Edjaakali la mowange mwesi mo motiesakoli, adjaakali oyabati la Betele. Wana wande wadjaali mosumbeli mboli dja sambo djinge moto o Mwengei akelali la Betele isio laho, koto wingbundu winge amoaselali likumu. Ango eseselali iwo omosummbeli sangbau, ¹² awaaselali ate: Nda mboka ekeeli inde? Wana wande waeneli mboka enge ekeeleli moto o Mwengei ongo okeeli la Yuda. ¹³ Aasali koto la wana wande ate: Nangelani mbai punda, wamonangelali inde punda, atelali likolo laho. ¹⁴ Amotutiali moto o Mwengei, amogbotoli ayabati sese e mote moungu. Aasali la inde ate: Odjei moto o Mwengei ongo olongoyi la Yuda? Amowongoselali ate: Edjei mbai. ¹⁵ Aasali la inde ate: Djaka monindji la mbai la monguta mo mbai, okotota ema elakake. ¹⁶ Ase amowongoselali ate: iengiti kine owongoyi mongindji la owe. Itilaka koto okoke, itikenga koto malia mongindji la owe la ehele ebete; ¹⁷ La ebili ate, engbundu e Yawe, endjaselali mbai: Otilaka okoke koto otikenga malia, otiwongwanela koto mboka enge ekeeleli owe. ¹⁸ Amoaselali ate: Mbai koto idjei motiesakoli nda owe; ahumbwa mwesi aasali la mbai la enge edhengi engbundu e Yawe, aasali la mbai ate: Wongwa la inde ongindji la owe la monguta mo owe, alake okoke, akenge malia koto. Adjaakali omokosi. ¹⁹ Moto o Mwengei awongwali mongindji la inde alakali okoke, akengali koto malia la monguta monde. ²⁰ Ango eyabatali iwo la meza, engbundu e Yawe emodjeeleli motiesakoli ongo omowongsali. ²¹ Amopamelali moto o Mwengei ongo odjaali la Yuda ate: Dhenga enge easi Yawe: Nda eyamalelali owe tomaka dja Yawe, obanyeiti tomaka djinge ihekeleli Yawe, mwengei o owe; ²² la ebili ate owongwali, olakia koto okoke, okengia koto malia la ebete enge awoaselali ate: Otilaka okoke koto oikenga malia, molonda mo owe motiongwa la mbila dja watata wa owe. ²³ Ango oseselali inde olaki okoke la okengi koto malia, monangelali punda. ²⁴ Moto o Mwengei ahelali mboka la oki. Agbotonoli la simba la mboka, emoolali inde. Molonda monde elangalali la mboka, punda eyabatali ahue ende, simba koto eyabatali kelekele e molonda. ²⁵ Dhenda, wato wadjaakali oyeti wadjaakali oeni molonda elangali la mboka, kotop simba eyemali kelekele e molonda; wadjaakali osumbi mboli ango edjaakali iwo oumi la gbata enge edjaakali oyabati motiesakoli o mowange. ²⁶ Ango eokali motiesakoli ongo omowongosali moto o Mwengei ndjogo, aasali ate: Edjei moto o mwengei nde ayamalelali tomaka dja Yawe, eho lenge Yawe amokawali la simba, enge emoatakoli, emoolia koto, la otutei engbundu enge Yawe amoaselali. ²⁷ Mbuse aasali la wana wande ate: Nangelani mbai punda. Wamonangelali, ²⁸ akeeli koto. Agbotoli molonda molangali la mboka, punda la simba iyamalali kelekele e molonda. Sima etiatakolali molonda, etiatakolali koto punda. ²⁹ Motiesakoli adjambali molonda mo moto o Mwengei, abatali likolo la punda, awongwali la eho; motiesakoli o mowange awongwali la gbata la omoleli koto omoombi inde. ³⁰ Abatali molonda monde la mbila, wadjaakali omoleli inde, la oasi ate: Magba, manima! ³¹ Mbuse e omoombi inde, aasali la wana wande ate: Ango ekogua mbai, okoombani mbai la mbila enge eombani moto o Mwengei, okobatani mikwa ma mbai kelekele e mikwa mande. ³² Laate ekoengana engbundu enge epamali inde, la otutei enge Yawe aasali la etumbeli e Betele koto la minguta kpaa la wibete widjambani winge widjei la gbata e Samalia. ³³ Mbuse e enge loi, Yoloboame atiyakukolali la esombeli ende mbe. Ase ndondo e wato awaumesali wanganga-Mwengei wadji poli la wibete winge widjambana; moto kpaa ongo odjaakali obali, Yoloboame adjaakali omoumesi nganga-Mwengei la wibete winge widjambana. ³⁴ Lisumu linge liemba la Yeloboame wakelali ewakpalelali obitani, ekelali koto ate wasilese wato kpaa wa liemba lande la moki kpaa la mbume.