¹ Longose moseka Palao, likumu salomo awabalali wali wakeni nee: Wango wa Moaba, wango wa Amona, la wa Edome la wa Sidonia, la wa Heti, ² wadjaali wa miki minge Yawe aasali la wana wa Isalayele ate: Otikeni kine atie iwo, iwo koto watidjaa kine atie ino, wakokuola la eeti engele mitema manu ngambo e wamwengei wau. Salomo anganali la iwo, akpalanali la libalano. ³ Ndjongo aumali la wali nkama nsambo waseka makumu, koto la meese nkama isato; wali wande wakukolali motema monde. ⁴ Ango eumali Salomo mowange, wali wande wagulali motema monde ngambo e djeeti wamwengei, motema monde motidjaakali kine moesi kpaa atie Yawe, Mwengei onde, ndenge edjaakali motema motema mo sango, Davidi. ⁵ Salomo apotali omotutei Asitalate, mwengei o moli e wato wa Sidonia, la omotutei koto Milikame ema e onalili e wato wa Amona. ⁶ Salomo akelali enge edjaakali obe la maiso ma Yawe, atidjaakali kine otutei olamu Yawe, nda sango Davidi. ⁷ Salomo amaali likolo la mokoli enge edhendani la Yelusaleme ebete enge edjambani la kole e Kemose, ema e onalili e Moaba, koto la kole e Moloko ema e onalili e wana wa Amona. ⁸ Akelali ndjongo la wali ande kpaa wakeni, wadjaakali ohekeli malasi koto otumbi mbeka e wamwengei wau. ⁹ Yawe amemeleli la kole e Salomo, la ebili ate akukolali motema monde, momodheeli Yawe, Mwengei o Isalayele, ongo omopumbelali mbala iwale. ¹⁰ La kole e loi luho, amohekeleli tomaka ate atiwatutie wamwengei wadji, ase Salomo atibalali otemei tomaka djinge imohekelli Yawe ¹¹ Yawe aasali la Salomo ate: Nda ekokelaka owe ndjongo, koto nda etitemeiyaka owe ogemeiyani wo mbai koto pui dja mbai djinge iyohekeleli, ikolongosa wokumu likolo la owe, ikomohekele motuke mo owe. ¹² Kaiko nde itikela woho la maiso ma owe, la kole e sangwa Davidi. Ikopwesa eho la mawo ma monga mo owe. ¹³ Ase itipwesa okumu kpaa, ikodhee etondo eesi atie mana o owe, la kole e Sangwa Davidi, motuke mo mbai, koto la kole e Yelusaleme enge eonaate mbai. ¹⁴ Yawe apotali omopumbeseli Salomo mayamaleli mwesi: Hadade, mo Edome, la iwota e okumu wa Edome. ¹⁵ Engele enge Davidi alongali Edome, Yoaba, likumu e waasaze atelali la okambi milonda, awolali pele kpaa wango kpaa wango adjaakali la Edome; ¹⁶ ayabatali ongo ndebo motoba koto la wato wa Isalayele kpaa, tee eseselali inde owawoli pele kpaa. ¹⁷ Hadade atilali, inde la pele djadji dja Edome, wango wadjaakali tuke dja sango, wakeeli la Ezipito. Hadade adjaakali yo mana mokeke. ¹⁸ Wayamalali, walongwali la Midiane, walingelali la Palane, waumali koto la Ezipito liwoso la Palao, likumu o Ezipito, Palao ahekeleli Hadade monguta, wilaka wilakake, amohaali koto mbume. ¹⁹ Hadade agemeiyanali la maiso ma Palao, djongo Palao amohekeleli moli, elenge e moli onde, maanago Tasapene moli o likumu. ²⁰ Mbuse elenge o Tasapenese awotali mano onde opele Genubate. Tasapenese amotonesali mawele la monguta mo Palao, Genubate abekali la monguta mo Palao, mongindji la wana wa Palao. ²¹ Ango Habade ongo a Ezipito aokali ate Davidi alanalali ebete eikima la watata wande, koto ate Yoaba likumu la wamasaze aguiga, aasali la Palao ate: Dhee mbai ike la moki mo mbai. ²² Palao amoaselali ate: Nda ema ekoodjangaka atie mbai, laate oluke oki la moki mo owe? Awongosali ate: Te ema, ase dhee mbai ike. ²³ Mwengei amopumbeselali Salomo odji moamaleli: Lezona monga Eliada, ongo otilaate atie nkumu onde Hadadezele, likumu e Soba. ²⁴ Abomesanali wato atie inde, adjaali likumu e wato waho, ango Davidi aolali wato wa Saba. Wakeeli la Damasi, wayabatali ongo, wamalelali ongo la Damasi. ²⁵ Aumali moamaleli mo Isalayele la masio kpaa ma Salomo, engele kikima koto Habade adjaakali koto omokeli obe, adjaakali otoni Isalayele ango odjaakali inde owaamaleli Sulia. ²⁶ Yeloboame koto motuke mo Salomo, amodjambeleli koto likumu ewo ende. Adjaali onga Nebate mo Epalaime e Zeleda, kombo e nango Zelua, moli ongo molome onde aguate. ²⁷ Dhenda gbondo enge amodjambelali likmu ewo ende. Salomo amaali ma mokoli, adhihali liokosaka la gbata e sango Davidi. ²⁸ Yeloboame adjaali libande, moto opele e wokulu; ango woeneli Salomo ate mwenga opele oho adjei moto mwesi abali otomu, amoumesali inde sindjili wa wato kpaa dja tomu tetelake e monguta mo Edjepu. ²⁹ La engele eho, Yeloboame apumbali la Yelusaleme, motiesakoli Asiya moto o Silo agbotonoli la inde la mboka, Asiya akpalali mokoto mwesi moholi. Wadjaakali ndi iwo waale la lisobe. ³⁰ Asya atotali mokoto moholi muho enge ekpalali inde, asalakolali eho la wisuki liomu la iwale, ³¹ aasali koto la Yeloboame ate: Tota wisuki liomu! La ebili ate, dhenda ndenge Yawe, Mwengei o Isalayele aasi ate: Dhenda, ikopwesaka wokumu la mawo ma Salomo, koto ikoohekele witondo liomu. ³² Ase ekodjaa la etondo eesi, ekotikala atie inde, la kole e motuke mo mbai Davidi, koto la kole e Yelusaleme, gbata enge eonali mbai ndondo e witondo kpaa wa Isalayele. ³³ Edjei la ebili ate wadhei mbai, wakeeli omai mauli liwoso la Asitalate, mwengei o moli e wato wa Sidonia, liwoso la Kemose, mwengei o wato wa Moaba, koto liwoso la Milikome, mwengei o wana wa Amona, koto la ebili ate watisombaka kine la mboka e mbai la okeli sambo djinge idjei olamu la maiso ma mbai koto odhendeli pui dja mbai la koto tomaka dja mbai, ndenge ekelali Davidi sango Salomo. ³⁴ Ase ititota wokumu kpaa la ewo mande, la ebili ate komobata inde adje likumu masio kpaa ma mokalo monde, la kole e Davidi motuke mo mbai, ongo omonoli mbai, la ebili ate inde atemeiyali tomaka la pui dja mbai. ³⁵ Ase ikopwesa wokumu la ewo e monga monde, ikoohekele witondo liomu; ³⁶ Ikodhee etondo eesi atie monga monde, laate Davidi motuke mo mbai, adje la lotambe engele kpaa liwoso la mbai la Yelusaleme, gbata enge eonoli mbai la obati kombo e mbai. ³⁷ Owe moto ikootota, okoyamalela kpaa djinge molimo mo owe mokobala, okodjaa likumu la Isalayele. ³⁸ Inga otemeiya tomaka kpaa djinge ikoohele owe, inga osomba la mmboka dja mbai koto inga okela djinge idjei olamu la maiso ma mbai, la odhendeli pui koto tomaka dja mbai, ndenge ekelali Davidi, motuke mo mbai, kodjaa la owe mongindji, ikomeele monguta mungo mokoumwa, ndenge emomeelete mbai Davidi, ikohekele koto owe Isalayele. ³⁹ Ikowasambwisa litoto la Davidi, ase etidjaa ndjongo wiengele kpaa. ⁴⁰ Salomo apotali oluki omooli Yeloboame. Ndjongo alongwali atilali la Ezipito atie Sisake likumu la Ezipito; ayabatali la Ezipito tee la logo e Salomo. ⁴¹ Sambo djadji dja Salomo, la djinge kpaa ikelali inde la lokenge wonde, eitidhinganali la matanda ma tomu dja Salomo? ⁴² Salomo ayamalelali Isalayele kpaa wilanga ntuku inei. ⁴³ Mbuse Salomo alangalali ebete eikima la watata wande, aombanali la gbata e sango Davidi. Monga monde Loboame, ayamalelali la ebete ende.