¹ Yesu arheng'elamunda, ager'omuchihugo chabo. Abegirizwa bage bamukulikira. ² Esabato echigera, arhonder'okuyigiriza omuchishagala. Bantu banene bamunvirhe basomerwa n'okunderha: ngahe yakula ebyobyoshi? Bwenge nyabachi obu ahabirwe, nagurhe yakol'ebisomezo nkebila okumaboko mage? ³ K'arhali ola mwana w'omufundi oyo, mugala wa Mariya, mwene wabo Yakobo, Yose, na Yuda, na Simoni? Ka na bali babo barhali hano ahagarhi kerhu? N'ago mango abonekana nkabigayiso kubo. ⁴ Aliko Yesu ababwira: Omulebi anasuzagurwa omuchihugo chabo, omu bazere bage n'omu mulala gwage. ⁵ Nantyo ntachisomezo achikoler'eyo, olekere okuhunir'abalwala n'okubafumya. ⁶ Anasomerwa enyanya wo kurhayemera kwabo. Yesu alambagira omu bishagala bya hofi omu ku yigiriza. ⁷ Ahamagala bal'ekumi nababiri arhumabo babiribabiri, n'okuhabo obushobozi enyanya w'emyuka mibi. ⁸ Ahabo erhegeko ly'okurhaheka chintu omu lungenzi, oleker'enkoni. Alahizabo kuchiyikir'empamba, changw'efuranga omushaho, ⁹ abwirabo okubayambal'ebirato, aliko barhahekaga myambalo ebiri. ¹⁰ Kandi ashuba babwira: enju yoshi nji mwajamo, njimuberemo kugera ahanjimwagalukira. ¹¹ Kandi eyihakaba ahantu, abantu njibarhabayakira n'okubayunva, njimurhengeho, n'okukungurhirah'oluchulo lw'amagulu menyu, kuderh'oku nji bube buhamirizi okubo. ¹² Bagenda, bahanula enyanya w'oluhungamo. ¹³ bahig'abazimu banene, n'okushig'abalwala amavurha, n'okufumyabo. ¹⁴ N'ezino lya Yesu lyali lyamamenyikana n'abantu banene. Mwami Herode ayunva banderh'enyanya zage; naye aderha: Yohana afukir'omubafu, chechirhumire akol'ebisomezo muye. ¹⁵ Abandi baderha: Ali Elia. N'abandi baderha: Ali mulebi nka muguma wa balebi. ¹⁶ Aliko Herode, ey'ayunv' eyo myazi aderha: Oyu Yohana nayirhisaga yiwafukire. ¹⁷ Bula Herode yenyine washwekesaga Yohana, amuhiris'omumpaniko, enyanya wa Herodia, muka Filipo, mwene wabo, bul'ali y'amuherwise, ¹⁸ eyi na Yohana amubwira: birhagushinganene ok'orhole muka mwene wenyu. ¹⁹ Herodia agaya enyanya wa Yohana, alonz'onkuntu akamuyirha, aliko arhakagalire; bulala Herode ayubahaga Yohana, ²⁰ omukumenya oku muntu w'okuli na muchesibwa; agend'amulanga, nabuzinda b'okumuyunviriza, akazagi yunv'obuba, n'okusima kuyunv'emyazi yage. ²¹ Aliko, olusiku lushinganene lwahika, amango Herode achishingaga enyanya y'okuyibuka olusiku aburhwaga. ahamagal'abakulu b'enfola miherho n'abarhwali be Galilaya, achishinge nabo. ²² Mwali wa Herodia aj'omunju balimo, azina n'okusimisa Herode n'abahisi bage. Omwami abwir'omwali aderha: Ompeme echolonzeze nakuhacho. ²³ Ashubiderha omukulahira: Echiwahema naguhacho, nayichaba chigabi ch'obwami bwani. ²⁴ Eyaba amahuluka, abwira nyina: Bichi mpemage? nanyina amushubiza: Erhwe lya Yohana Mudubisi. ²⁵ Alibirha, agaluka juba embere z'omwami, amubwira: Ndonzeze omp'erhwe lya Yohana bonabuno oku mbale. ²⁶ Mwami agaya bwenene, aliko enyanya wendahiro n'abahisi bage, arhagalaga kumulahirira. ²⁷ Arhuma honaho, oku rhegeko, mulanzi muguma alerh'erhwe lya Yohana mudubisi. Oyo mulanzi agenda, ach'erhwe lya Yohana omu mpaniko, alilerh'oku mbale. ²⁸ Alih'olamwana wo bunyere, n'omwana wo bunyere aliha nyina. ²⁹ Abigirizwa ba Yohana bachiyunv'ebyo, bayinja rhol'omubiri gwage baguhamba. ³⁰ Entumwa zichigush'eburhambi bwa Yesu, bamubwir'ebibakolere byoshi n'ebibayigirize. ³¹ Yesu ababwira: Muyinj'eburhambi, omu mpinga ,muhumuke bugeke, bula hali abantu banene balibagera, kandi barhabonaga n'ebisanzi byokulya. ³² Nantyo baj'omuchombo, bagend'eburhambi, omu mpinga. ³³ Bantu banene b'abon'okubagenda, babarhegerera n'omubizungu byoshi abantu balibirh'oku magulu, babarhang'emunda bajaga. ³⁴ Bachirheng'omuchombo Yesu abon'olubaga, aluyunvir'obonjo, bulala lwali nka ntama zirhaherhe mungere, arhonder'okubayigiriza bintu binene. ³⁵ Nkonkw'ebichanji byali byager'egolo abegirizwa ba Yesu bamushegerera, bamubwira: Aha hantu eli mpinga, n'ebichanji byagerere. ³⁶ Rhumabo baj'omubishagala byahofi bachigulir'ebyo kulya. ³⁷ Yesu ababwira: Mwenyine mubah'ebibalya. Aliko bamubwira: Rhwaji gul'emigati ya furanga magana mabiri, rhubah'ebibalya? ³⁸ Ababwira: Migati enga muherhe? Bajilola, babere bamamenya bwinja, bamushubiza: Erhano nafi ebiri. ³⁹ Nantyo abah'erhegeko okubabayikaze okubirhi chigush'okuchindi, ⁴⁰ bayikala chigusho ch'egana, na cha makumi marhano. ⁴¹ Arhola ela migati erhano nafi ebiri, alola omuchanya, ahuna. Buzinda ayichagulanga, ayih'abigrizwa bayigabir'olubaga. Agaba na zilafi ebiri kuboshi. ⁴² Boshi balya, banayugurha, ⁴³ banagalula rhurhanda ekumi n'arhu biri rhuyunjwir'ebichira by'emigati n'ebyefi bya yorhaga. ⁴⁴ Abalyag'emigati bali bantu bihumbi birhano. ⁴⁵ Enyuma zaho, arhegek'abigirizwa bage bashon'omuchombo, bagend'embere zage, baj'olwindi lunda lw'e Betesayida, oku naye alag'echigusho. ⁴⁶ Achimala kulaga aj'okumusozi kuhuna. ⁴⁷ Egolo lichigeraho, echombo chali ahagarhi k'enyanja na Yesu ely'ali yenyin'eshi (emushengo). ⁴⁸ Abon'okubaherh'omurhamo gunene omukuvugama bulala umulaba gwali bashunikir'okulunda barhajagako. Emiseke, Yesu aj'emunda bali, alambagir'enyenya z'amenji, alonza kubarhaluka. ⁴⁹ Bamubwene y'alambagir'okumenji, baganiz'okumuzimu, bayama; ⁵⁰ bulala balimubwene boshi, bahez'obwenge. Mwebyo bichanji, Yesu ababwira aderha: Mumenye okunyono murha yobohaga! ⁵¹ Buzinda ashon'omuChombo, n'omulaba gwahwa. Bayunv'omubonyin'obuba bunene, n'okuyunjulirwa n'okusomerwa. ⁵² Bulala barhayunvag'echisomezo ch'emigati bul' emirhima yabo yalikomere. ⁵³ Bachimala kuger'okunyanja, bager'omuchihugo ch'e Nazareti, basika. ⁵⁴ Bamala kurheng'omuchombo, abantu balambagir'ebishagala byoshi bya hofi; ⁵⁵ balerhera Yesu abalwala okubipoyi ahantu hoshi bayunvag'okwali. ⁵⁶ Ngasi hoshi ahikire, omubishagala chang'omubizungu, b'ahirag'abalwala ekarubanda n'okumuhema abababalire, bahume okuchishumiro ch'omwambalo gwage gonyine. Na boshi bamuhumireko bafuma.