¹ Bahika eshiriza y'enyanja nene omuchihugo ch'abageresi. ² Oku anayomoka omubwarho, omuntu ogwerhwe n'omuzimu mubi ayinja amulibirhira, ³ Oyu muntu aligwerhe enju omumashinda. Na nta muntu wakagalire kumushweka, chiro akakoleseze obulegule. ⁴ Bulala ngasi mango bakazagi mushweka n'olukoba, n'obulegule aliko anacha obo bulegule n'olo lukoba, na ntaye wakagalire kumufarha. ⁵ Ngasi lusiku, bucha buyira nkarhali okumashinda elyali omu misozi ayama yama n'okuchiyagula n'amabale. ⁶ Achibona Yesu hale alibirha afukama embere zage, ⁷ ayama n'omulenge gunene: Bichi biryahagarhi kani nawe, Yesu mwana wa Nyamuzinda w'enyanya? Namakukalihira omuzino lya Nyamuzinda orhambulisag'omurhula. ⁸ Bulala Yesu amubwira huluka m'oyu mulume, muka gubi. ⁹ Nantyo amubaza, ezino lyawe wende? Echigusho ly'ezino lyani. Amushubiza, Bulala rhuli banene. ¹⁰ Aly'amuhema buzira kuleka arhamurhumag'embuga ye chihugo chabo. ¹¹ Eyo munda haliri, olunda l'omusozi, haliri obuso bw'engulube. ¹² N'abazimu bamuhuna n'okuderha: Orhurhume mw'ebyo bibwana byengulube kuderha okurhubijemo. ¹³ Abayemerera. N'eyo myuka mibi yahuluka, yaja omubibwana byengulube, n'ebyo birhungano byalibirh'omumulaba gw'enyanja nene: Haliri oluganjo nka lwa bihumbi bibiri, zazika. ¹⁴ Abangere bayagaz'omwazi omuchizungu n'omuchishagala. Abantu bagenda kulol'ebyahikire. ¹⁵ Bayinj'eburhambi bwa Yesu, ola musire waliherh'abazimu bamushigan'ayikere ely'ali mugumaguma, nantyo bagwarhwa n'obuba. ¹⁶ Ababonaga ebyabere bababalira ebyahikir'omusire n'ebibwana byengulube. ¹⁷ Nantyo barhebereza Yesu akwarhenge omuchihugo chabo. ¹⁸ N'okwachishona omuchombo ola waliherh'abazimu ahema Yesu okwabere naye. ¹⁹ Yesu arhamuyemereraga, aliko amubwira: genda omu mwawe n'okubantu bawe, obabwire ebi Nahano akukolere n'okw'akuberere obonjo. ²⁰ Agenda, achiheb'omukuyamagiza omuchihugo che Dekapoli ebi Yesu amukoleraga. Na boshi basomerwa. ²¹ Yesu, omuchombo, ahik'olwindi lunda echindi chigusho ch'alichigushire eburhambi bw'enyanja nene. ²² Nantyo hayinja mulume muguma w'omu bakulu b'echishagala oyirikwa Yairo, amulangirire achikabula okumagulu mage, ²³ n'okumuhema n'obonjo: Omunyere wani mudorho al'ukubuzinda, yinja umukoze kw'efune kuderh'oku arhabalwe, analame. ²⁴ Yesu agenda haguma naye, n'olubaga lunene lw'amukulikira n'okumulibisya. ²⁵ N'obo, haliri omukazi walilwere obulwala b'okuger'eshagama kurhenga myaka ekumi n'ebiri. ²⁶ Alilibukire bwenene omufune z'abafumu banene, aly'amalire byoshi aligwerhe arhana luhukaga, ahubw'endwala yage yakomera. ²⁷ Achiyunva baderha Yesu ayinj'omulubaga, enyuma, ohuma okumushangi gwage. ²⁸ Bulal'aliderhere: Nkahuma okumushangi gwage konyine nafuma. ²⁹ Mwako kachanji, eshagama y'aleka kumurhenga, ayunva omumubiri gwage amafuma. ³⁰ Honaho Yesu ayunv'emisi yamageha, ahindamuka ahagarhi k'olubaga, anderha: Inde wahumir'okumushangi gwani? ³¹ Abegirizwa bage bamubwira: Obwen'olubaga lukuly'eburhambi, wamabaza; inde wampumireko? ³² Alol'eburhambi bwage kuderh'oku yamenya owamuhumagako. ³³ Omukazi, omukuyubaha n'okudirhimana ameny'ebyali bimukolekereko, achikweb'okumagulu gage amubwir'okunali koshi. ³⁴ Aliko Yesu amubwira: Mwali wani, obwemere bwawe bw'akuchungwire; genda n'omurhula ofume obuhanya bwawe. ³⁵ Okw'achiherhe aderha, abantu barhenga omu m'omukulu w'echishagala bamubwira: Mwali wawe afire; bula gurhe wabulisa omwigiriz'omurhula? ³⁶ Aliko Yesu amala yunv'eyo myazi, abwir'omukulu w'echishagala: Orhayubahaga, obe n'obwemere. ³⁷ Alahir'okuntamuntu omuherekezage olekere Petro, Yakobo na Yohana mwene wabo Yakobo. ³⁸ Bahika ahambuga y'omukulu w'echishagala, aho Yesu abon'echigusho chabantu bali balaka n'okuband'endulu. ³⁹ Aj'omunju ababwira; bichi birhumire yimwajir'olwamo, nabichi muherhe mwalakira? Omwana arhafire aliko alyamire. ⁴⁰ Bamujachira. Nantyo, abahulusa boshi, aj'omomwana aliri , yewe, n'eshe w'omwana, na nyina n'abali muherekeze. ⁴¹ Amufarh'efune amubwira: "Talita kum": kokuderha; Munyere nkubwirir'entya, zuka. ⁴² Omunyere ayumanga, aho hanaho; alambagira; bulala aliherh'emyaka ekumi n'ebiri. basomerwa bwenene. ⁴³ Abalahiza bwenene okuntamuntu omenyag'eyo myazi; anarhegeka okubamuhe ebilyo, alye.