¹ Naomi, mattona, hinna ngge mbarrana, "Ana nggu, nama pandedowe mbaku elleta nggu pandou pamawo wa'imu ku ndetawu?" ² Mba hinna, indanyaki Boas, ata pawilinna mawinne a marengnga ndengnga nggu, 'ndu ndan'ndi? Ne gedde, nena tapi wulli pare ne pandou papamanamo wa'i. ³ Rio wu monno kuddo wekkina, tau kalambemu a ndua monno kakowu pandou pamanamo wa'i. Nyakiddo, ka nda'i kanna ata wade a pande nggu ndukki we mbanna mba panga'a monno paenu. ⁴ Tengngara mba nena mbeika, mattara ngge pandou pambeika wa'ina monno maiwu kou pasingira ngge ne ingi wa'ina monno ku dura wa'i wu ne'e. Engnga tekki nanggo appawe ne pawukku parawimu." ⁵ Ka hinna ngge Rut mbarrana, "Ngara kuwa ne patekkimu ku ndeku ngge." ⁶ Kako mbanna ne'e pandou pamanamo wa'i monno na ndeku kuwadi patekkinai mattona. ⁷ Ne mbanna mba panga'a monno paenu Boas monno atena na ndetawe, netti na a mbeika ne'e nundu pa'mbu'nduna pare. Mbage, ammini a kako katenarra na mawinne monno kanna pasingirana ingi wa'ina Boas, mbage kanna mbeika. ⁸ Ne mba tillu gedde, na wedda lolo na ata monno kanettini a ndammi-ndammi neti niri pandou, mbage ndappa wa'imu iya mawinne a mbeika mbarra wa'ina. ⁹ Na tuawa, "Nggarra nggu ne yo'u?" Na wale, "Youwa Rut, atamu mawinne. Wekkarandi kapamu ne tou ndeta nggu malla mba wo'u ndonna a pamanumara ngga." ¹⁰ Na wale Boas, "Na Mori na pamaringngiwu, o ana nggu. Ne wo'u mu 'mbo ngge manawaramu a louka pakalada na wali etti ponna, mbu ndu kako panokkoni iya kambani, kanya a pote monno a milla. ¹¹ Ne mbahinna ana nggu ndu mandauta kanna. Ngara kuwa patekkimu ku ndeku ngge, orona ngara kuwa ata ne wanno a pande nggu mba mawinne nduwawu. ¹² Ne mbahinna, tetakkawe mba youwa a lissu nggu, takka wa'i ndommo punni iya ata a palissu wu a louka pa mbarra wali souwa. ¹³ Ndangngiwu ne gedde. Monno, koka kabugedde, mbanna lissu kunggu, ngga'i kanna lissu wu. Takka mba ndanna lissu ku nggu youwa ku lissu nggu, tutu mbotona Mori a toleka. Mbeikawu ndukki kappu gedde." ¹⁴ Nya, kanna mbeika ti'di wa'ina ndukki kapu gedde, mbage kanna kedde tengngarra ponna haida ata nda pa pande ponna. Hinna ngge Boas, "Ka nda'i kanna ata a pande ngge mba wa'i ni mawinne a kako ne'e pamanamo wa'i." ¹⁵ Ka hinna ndommo ngge, "Ya ngga we ne ingngi pataumu monno padema wai ngge." Mbage, kanna padema wai ngge, monno Boas na ukura enne patau wulli pare monno mburri we ne'e selendang ndana. Mbage, kanna kakowali wanno. ¹⁶ Tengngarra ndukkina Rut mbarra mattona, ka hinna ngge mattona, "Peina ana nggu?" Mbage, kanna tekki ngara kuwawe ne parawina na ata mbarrana. ¹⁷ Hinna ngge, "Enne patau wai wulli na yaga ndi mbarra nggu, oro hinna ngge mbarra nggu, ' Ndu wali limma kaluwa kanna mbarra mattomu." ¹⁸ Hinna ngge mattona, "Mandi'i, ana nggu, ndukki mbu pande ngge kandukkanna. Orona, nati ata ndanna kandanna ki mba ndanna mba kipo ne loddo."