¹ Yóm kdê tekuy deng mbegel bè kehetahu hol tekuy gel hanay nawa bè yó kem tau tolo wen gónó le glayam. Bê tekuy olo hemdem yóm hyu bè knô tekuy. ² Yake gel hegna tekuy ke wen gónó tekuy tmóbóng yó kem dumu tekuy hemtahu anì wen gónón temnù kehtahu le se kul. ³ Balù se ke Krays là kô hegnahen du kun knóyô. Lumun yóm deng monen bè udél Dwata, monen, “Ebéléu gónón gotu tódô yóm sidek kehnê le kóm yó kem tau.” r ⁴ Ket yóm udél deng tehe hsulat Dwata, sal gel wen hdalangen tekuy lemen. Lemwót bè yóm udél Dwata gónón là mili nawa tekuy baluen ke wen mgel sut bélê tekuy. Ne bè yó gónón lemwót yóm kegduf nawa tekuy igò tekuy mangat du yóm hendón nefet nawa tekuy. ⁵ Yó hem Dwata hol gónón lemwót yóm là kili nawa tekuy ne yóm gel kegduf nawa tekuy lemolò du. Hol benlayen yu he kessotu nawa bè kem dumu ye hemtahu, hol lómón yóm deng dnalang ye bè Krays Jisas, ⁶ anì ssotu nawa ye dmóyón ke Dwata yóm kdê ye. Du se Mà yóm gónó tekuy mogot Jisas Krays. Ne bud du snéen kun Dwata.  Duhen yó, hol gel henmóyô ye yó kem dumu ye hemtahu, lómón yóm deng kehmóyô Krays kuy. Ke yó se nmò ye, tey megdóyón Dwata. ⁷ a ⁸ Tódô tulónu kuy, deng hógów Dwata Krays mò tmóbóng yó kem Ju. Ne yó gónón dohò yó kem tehe fasaden bè yó kem tehe fù le teganay. ⁹ Ne sotu gónón hógów ke Krays anì wen lan le dmóyón ke Dwata yó kem tau là Ju le lemwót bè yóm kkoduhen kul. Yó se yóm deng tehe snulat bè bok Lingón, monen, “Angat tey kdóyónu kóm lem blóng yó kem tau là Ju le. Angat hlanu bè kesngalu yóm kdóyónu kóm.” s ¹⁰ Bud wen sotu monen bè Sulat Dwata, monen, “Hol ye gbót hligal se kuy, yu kem tau là Ju le bè yó kem tau Dwata.” t ¹¹ Ne bud sotuhen, monen, “Hol dóyón ye yóm gónó tekuy mogot, yu kem tau là Juhen. Hol kdéen tau gotu dmóyón du.” u ¹² Ne bud wen se kun mon yóm sotu tehe tugod Dwata teganay boluyen Isaya, yó monen, “Angat wen tugod gu bè yóm tehe Jisi. Du se yóm angat sut mò mogot yó kem tau là Ju le. Béléen hol gónón mefet nawa le.” v ¹³ Yó hem Dwata hol bemlay kuy yóm kligal ne yóm kenek nawa lemwót bè yóm deng kehtahu ye béléen. Du se yóm nefet nawa tekuy. Ne lemwót bè yóm tey kfasang yóm Tulus Dwata gónón hol seflós temnù yóm hendón nefet nawa ye. ¹⁵ Okóm bè nim ksulatu ni, là kóe liko hefet du bè nawa ye ni kem tulónu kuy ni. Yó gónóhu là liko tmulón du kuy, abay se lemwót bè yóm tey hyu deng hmò Dwata do. ¹⁶ Yó hmoen do, henbalingen ou tau mò hógów Jisas Krays ebè kem tau là Ju le. Bè yóm kwitu du ebélê le yóm Tulón Hyu lemwót gu bè Dwata, lómón ke ou yóm tau gel demsù ebè Dwata. Yó henged dsù blayu du, duhen yó kem tau là Ju le deng hemtahu bè Jisas. Ne henmóyô Dwata snéen yóm dsuu yó, abay se deng nfunen lu yóm Tulus Dwata. ¹⁷ Duhen yó, lemwót bè yóm tey gel któbóng Krays dou, là myake tmulón du yóm deng gendengu bè Dwata. ¹⁸ Laen kô dumu gel tulónu, tek són yóm deng gendeng Krays hlanen béléu anì baling nimón le Dwata yó kem tau là Juhen. Yó kmoen du, hlanen bè yóm ktoloku ne yóm gel nmou lem blóng le, ¹⁹ duhen yó kem hentaw ton gel hmoen do, ne yóm tey kfasangen bélê le yóm Tulus Dwata. Tehe lemwót bè syudad Jirusalim efete kól ditu bè yóm sotu prubinsya Ilirikum, gotu hetngónu bélê le yóm Tulón Hyu gbak ebè Krays. ²⁰ Bè yóm gel ktoloku yóm Tulón Hyu, yó hol sen-galuhu ke yó gónóhu tmolok bè yó kem tau là deng mungol du yóm boluy Krays. Là kóe tmolok bè yó kem benwu deng wen tmolok du. ²¹ Lómón yóm monen bè Sulat Dwata, monen, “Yó kem tau là deng wen tmulón kul he, angat wen gónó le temngón du. Ne yó kem tau là deng hmungol du, angat wen gónó le gmileb du.” ²² Ni se gónóhu ganggà là géhél mógów edyó bélê ye abay se dê benwu gónóhu tmolok. ²³ Okóm ni ne bang kógówu edyó, abay se laen dù bud benwu gónóhu e solu hemilol gu bè ni. Deng dê halayen ni ne yóm tô kóyóu mauy kuy. ²⁴ Tóe helós ebè Spén, yóm benwu kem Kestilà, okóm naw helun slob bélê ye bè yó bè Rom. Sok deng malù gsengel kegenómu du bè yóm kesegbótu bélê ye, yó he kehewót ye do. ²⁵ Okóm ni, new ne mógów ebè syudad Jirusalim, abay se wen tóbóng etedu bè yó kem tau hemtahu bè yó. ²⁶ Ni kem tóbóng ni, lemwót bè yó kem tau là Ju le deng hemtahu bè yó kem benwu snakuf Masdunya ne Akiya. Tódô lemwót bè nawa le yóm blay le yó mò tóbóng le yó kem tau élél hemtahu bè Dwata bè Jirusalim. ²⁷ Tey kehligal le du snéen nim nmò le ni. Bè ktahuhen, bong knóón se yóm nmò le yó mò balà le yó kem Ju bè yóm deng kegomong le hemtahu bè Dwata. Bong knóón se ke wen kul blay yó kem tau là Ju le lemwót bè yóm kul gónó wen. ²⁸ Sok deng ketedu bélê le ni kem tóbóng deng sentifun le ni, naw slob bélê ye he ominu yó helós ebè Spén. ²⁹ Tódô tngónu soke sut lem blóng ye, enget tey keheyuhen yóm nemò Krays bélê tekuy bè yó. ³⁰ Wen hol gónóhu hetóbóng bélê ye, kem dumuhu setwoli, hlanu bè Jisas Krays yóm gónó tekuy mogot, ne bè yóm kesebong tekuy nawa lemwót bè yóm Tulus Dwata. Yó hentóbóngu bélê ye, hol tnóbóng ye o mni bè Dwata, ³¹ anì laen dù lan le hemsidek dou yó kem tau là hemtahuhen bè prubinsya Judiya. Ne hol hni ye dou bè Dwata anì henmóyô yó kem kun tau Dwata bè Jirusalim yóm tóbóng nitu ebélê le. ³² Duhen yó, ke kóyô Dwata angate mógów elem blóng ye. Ilóu tey keheyu kegnómu du bè yóm angat keseton tekuy yó. ³³ Yó hem Dwata hol nô lem blóng ye. Tek sónen du gónóhen lemwót yóm kenek nawa tekuy.