¹ Wen sotu tulónu kuy bè kmò ye ebè yóm tau là dengen nelem kehetahuhen. Hol gel hemung ye bélê ye, okóm bê ye gel nit skuya bè yóm gónó ye stólóng bè kehetahu ye. ² Yóm tau deng megemel kehetahuhen, laen kô dù hniihen bè yóm gel kenen. Okóm wen se tau là dengen nelem kehtahuhen, són lemnaw utónen. ³ Yóm tau laen dù bud hniihen bè kkenen, béen mom hentaw sen yóm tau tolo wen hniihen. Senged bè yóm tau són lemnaw utónen, béen tô tendok yóm tau laen dù bud hniihen. Yakà deng henmóyô Dwata du yóm tau yó. ⁴ Là kóen hyu ke tódô tendok tekuy kun kmò yóm tau tóbóng lówó bè dumu tau. Tek són yóm hol kun gónó mogot gembek hemdeng du yóm kun kmò, ke hyu duhen ke là. Kaem enget wen gónóhen e kól he kun yóm tau tendokem yó, abay se yóm gónó tekuy mogot fen tmóbóng du. ⁵ Bud sotuhen, wen se tau wen kdaw hetólóngen, monem bong muhen kun senta yó kem dumu kdaw. Okóm wen se tau laen kô dù kdaw mtukul bong muhen senta kem dumu kdaw. Yake ket tau béen hegewu nawahen lemolò du yóm hol kun kehedem du yóm heyu. ⁶ Yóm tau ke gel wen kdaw hetólóngen bè yó kem dumu kdaw, yó se mò gónón hegefan yóm kadaten ke Dwata se kun. Ne senged se yóm tau laen dù hniihen bè ken, yó se mò kun gónó hegefan yóm kadaten ke Dwata se kun, abay se sal gel dóyónen Dwata bè yóm gel kenen. Ne senged se kun yóm tau tolo wen hniihen, yó se yóm kun gónó hegefan du yóm kun kadat ke Dwata, ne gónón dmóyón du.  Bè yóm klawi tekuy mowil, ne balù bè yóm enget katay tekuy, wen mefun tekuy. Yó gónóm mon, yake béen són yóm knóyô tekuy todo nemò tekuy. ⁷ a ⁸ Bè yóm igò tekuy mowil, Jisas yóm mfun tekuy. Ne kesok tekuy matay, bud du snéen mfun tekuy. Kihu ke mowil tekuy duhen ke matay tekuy, du se mfun tekuy. ⁹ Yó se gónón tehe matay Krays ekni, ne bud mowil, anì du gónó tekuy mogot, kihu ke tolo tekuy mowil duhen ke deng tekuy matay. ¹⁰ Ne duhen yó, yu kem tau olon mken lemnaw, hol bê ye abay tendok kem dumu ye. Ne yu kem tau là mélék ye, hol bê ye abay kenbe kem dumu ye. Abay se kdê tekuy angat gotu mdà bè solu Dwata, angat knukumen tekuy. ¹¹ Deng wen tehe udél Jisas deng snulat le, monen, “Ou se yóm Dwata là kóen na a matay ne ni se hol udélu. Enget le gotu mtud bukol bè soluhu yóm kdéen tau, ne kdê le se enget mon du, ‘Uu se yóm tahu Dwata.’ ” q ¹² Duhen yó, bè yóm kdaw yó, là gbek tekuy du ke là gotu tulón tekuy du ke Dwata kdê yó kem deng tehe nmò tekuy kegen tekuy nô te tonok. ¹³ Duhen yó, hol bê tekuy abay bud ge setedok. Yó dé hol sen-galu tekuy ke laen dù nmò tekuy mò gónó le geseket yó kem dumu tekuy hemtahu. ¹⁴ Lemwót bè yóm deng kenou lohok bè Jisas hol gónóhu temngón du laen dù mtukul ken sidek bè Dwata. Són yó dé gónón sidek, són bè kehedem tau du. ¹⁵ Okóm ke senbewegem kehedem kem dumuhem lemwót bè yóm gel kenem, yó gónón gfan yóm là kbong nawahem du. Hol béem abay nmò gónón lana kehtahu kem dumuhem ke mlan bè kkenem, igò Krays deng matay béléen se kun yóm dumum yó. ¹⁶ Baluen ke là sideken béléem, okóm ke sidek bè yóm sotu dumuhem hemtahu, hol béem abay nmò, abay se kô baling sidek kbak le ebéléem. ¹⁷ Bè yóm kogot Dwata tau, là mlanen bè yóm gel ken ne ninum tekuy. Okóm mlan bè ktedeng nawa, ne kenek nawa, ne yóm kligal blayen tekuy yóm Tulus Dwata. ¹⁸ Ke lómón yó klolò tekuy ke Krays, tey hligal bélê tekuy Dwata, ne hligal bélê tekuy kem dumu tekuy snéen. ¹⁹ Duhen yó, hol sen-galu tekuy mò yóm gónón menek nawa tekuy bè kem dumu tekuy, ne yóm mò gónó tekuy setgel bè kehtahu tekuy. ²⁰ Bê tekuy abay hensidek kehetahu kem dumu tekuy mlan bè yóm gel ken tekuy. Laen kô dù ken nali Dwata bè kem tau, okóm yó gónón sidek ke fen btang bè salà kem dumu tekuy hemtahu lemwót bè kken tekuy. ²¹ Hol bê tekuy abay nemò gónó le btang kem dumu tekuy mlan bè kutón tekuy, bè kinum tekuy, duhen ke wen nmò tekuy mit kul btang. ²² Duhen yó, balù kihu kóm kmò kehedem du nim ni, tódô olo ye lewu Dwata temngón du. Tey bong kehligalen yóm tau laen dù gónón megewu nawahen du yóm gel loloen. ²³ Okóm ke tolo megewu nawahen du yóm tô kenen, salaen bè Dwata ke kenen, abay se là loloen du yóm hentahuhen. Balù kihu nmò tekuy, ke là lolò tekuy du yóm deng hentahu tekuy, salà tekuy bè Dwata ke nmò tekuy.