¹ Hol tekuy ge nimón yóm gubérno, abay se Dwata gónón gu lemwót. Kdê yó kem gubérno, bè Dwata gónón lemwót yóm ku glal. ² Duhen yó, kdê yó kem tau là nimón le yóm ude lem benwu, yó se yó kem tau là móyô le mimón ke Dwata snéen. Ne lu se todo ketes tafak. ³ Yó kem tau mit ude, laen kô gónó tekuy likò bélê le ke heyu yóm gel nemò tekuy. Són gónón wen klikò tekuy bélê le ke wen gónó tekuy mulé ude. Anì là wen gónó ye likò bélê le, hol nmò ye sen yóm heyu anì dóyón le yu. ⁴ Abay se yó kem tau mit ude yó, lu se deng snigang Dwata, nemò le yóm kuy keheyu. Okóm ke mulé tekuy ude, wen klikò tekuy bélê le, abay se wen kegebek le tmafak. Lu se deng snigang Dwata mò tmafak yó kem tau mulé udin. ⁵ Yó gónóm mon, hol nimón tekuy yó kem tau genlal. Là són yó du gónó tekuy mimón ke mone anì là gnóm tekuy du yóm tafak Dwata, okóm yó dé hol gónó tekuy himón abay se tódô tngón tekuy yó se yóm hyu. ⁶ Bud yó senéen yóm gónó ye gel mayad bè gubérnó yó kem bwis. Yó kem tau mtuk du, yake lemwót bè Dwata yóm nemò le yó. ⁷ Yóm kdê bnayad tekuy bè gubérnó, gotu bnayad tekuy lu. Ne hol nadat tekuy lu senéen yó kem tau mogot benwu. ⁸ Béen abay wen utóng ye là bnayad du. Olon yó dé utóng nbô ye, duhen yóm kbong nawa ye kem dumu ye. Abay se ke gotu kbong nawa ye kem dumu ye, deng gotu glolò ye ne yó kem hlau Dwata. ⁹ Yó monen bè hlau Dwata, monen, “Bê ye abay mdà yehen. Bê ye abay monok. Bê ye abay mnagaw. Bê ye abay mófô.” Ni kem hlau monu ni, ne yó kem dumu hlau snulat le, tek sotu nefeten, duhen yóm monen bè yóm sotu hlau, monen, “Hol kenbong ye nawa kem dumu ye tau lómón yóm kbong nawa ye yóm kuy knô.” ¹⁰ Abay se ke bong nawa ye kem dumu ye, là kô gbek ye hemsidek kul. Yó gónóm mon, ke bong nawa ye kem dumu ye, deng gotu glolò ye ne yóm kdê hlau Dwata. ¹¹ Hol dnalang tekuy yóm kesebong nawa, abay se deng duhen ni ne yóm bang kebetik tekuy. Bè kebut yóm kehetahu tekuy, tolo mima he yóm kekól Jisas. Okóm ni, deng tey moni ne. ¹² Ke hlingónu du, hol lómón ke móyónen mwas ne. Yó gónóm mon, hol kó tekuy ne yó kem sidek gel nemò tau lem gónón kmifu, tles nemò tekuy yóm heyu. Yóm heyu, hol lómón ke ngom sfatay eles newit tekuy lem gónón lemayag. ¹³ Nemò tekuy dé yóm nemò segetón bè yóm kul kmò yó kem tau nô lem layag. Hol bê tekuy abay gel segeduf hlengel, kô wen gónó tekuy hemyak knô tekuy. Hol bê tekuy abay mò samuk ne yóm dumu nmò gónó le semdekà tekuy. Bê tekuy sfatay. Bê tekuy nemò yóm sélés nawa. ¹⁴ Yó dé nemò tekuy, hol denalang tekuy yóm kun kmò yóm gónó tekuy mogot Jisas Krays. Ne bê tekuy abay tódô nmung yó kem sidek knóyô lówó tekuy.