¹ Yóm libun meted du nim sulat ni, boluyen Fibi, libun tekuy bè kehetahu tekuy bè Jisas. Du se sotu gel tmóbóng yó kem tau hemtahu bè syudad Sinkriya. ² Hol hnódó ye hlan ye bè boluy yóm gónó tekuy mogot, yakà ni du yóm nmò hol knóón bè yó kem tau Dwata. Hol tnóbóng ye ke wen gónón élél, abay se tey deng dê tau tnóbóngen se kun. Balù sem ou sana któbóngen do. ³ Hol hgefet ye do bè le Akila ne Prisila yóm là keklifótu kul. Lu se tehe dumuhu gel mò nmò bè Krays Jisas. ⁴ Udì duen deng le tô matay se kul lan le tmóbóng dou. Tey kdóyónu ke Dwata bè yóm któbóng le do yó. Senged snéen yóm kdéen tau là Ju le deng hemtahu bè Dwata bè ni, tey kdóyón le ke Dwata se kul. ⁵ Tey gel kehedemu kul snéen yó kem tau gel stifun tmaba Dwata bè gónô le. Sotuhen, Épinitus, yóm sotu dumuhu sogot nawa, tey gel kehedemu du. Du se hol tanay tau hemtahu bè Krays bè prubinsya Asya. ⁶ Ne bud hendemu lenibun Miri snéen. Tey kmoen nmò lem blóng ye lanen tmóbóng kuy. ⁷ Tulón ye do ke Andrunikus ne Juniyas yóm gel kólómu kul. Lu se hol dumuhu Ju. Tehe le mung geblanggù béléu ekni. Gna le se kul he hemtahu bè Krays, hulihe dou. Tey któtól boluy le lem blóng yó kem sfolò lewu deng nélék Jisas mò gel hógówen. ⁸ Ne bud bè Ampliyatus snéen, tey gel kólómu du, ne tey sogot nawa me mlan bè kehtahu me bè yóm gónó tekuy mogot. ⁹ Ne bud bè Urbanus, yóm sotu dumu tekuy mò nmò bè Krays. Ne bud bè Stakis snéen, yóm sotu dumuhu sogot nawa. ¹⁰ Ne hol hegefet ye do bè Apilis yóm gel kehedemu du se kun. Deng tey gefan yóm là kili nawahen lemolò ke Krays nim tau ni. Senged se bè Aristabulus ne kem kun fes lówó, hegefet ye do ebélê le yóm gel kólómu kul. ¹¹ Bud hendemu yóm sotu dumuhu Ju boluyen Hirodiyan. Ne yó kem logi hemtahu bè yó kem fes lówó Narsisus, hol hegefet ye ebélê le yóm gel kólómu kul. ¹² Senged se ebè le lenibun Trifana ne Trifusa, tau tóbóng lówó yóm gónó tekuy mogot. Ebè Pérsis snéen, sotu libun dumuhu ssotu nawa. Tey kmoen nemò bè yóm gónó tekuy mogot. ¹³ Hol hgefet ye do bè le Rufus ne yéen yóm gel kehedemu kul. Tey hyu kloloen yóm gónó tekuy mogot yóm Rufus. Ne yóm yéen, tey tilob kmoen ebéléu, hol lómón ke ou yóm hol ngaen. ¹⁴ Bud nólómu se le Asinkritus, Fligon, Hérmis, Patrubas, Hérmas ne yó kem dumu logi hemtahu gel mung bélê le. ¹⁵ Ne tulón ye do ke Filologus lewu le Julya yóm gel kólómu kul. Ne senged se ebè Niryus ne yóm libunen, ne ebè Ulimpas, ne yó kem kun tau Dwata gel mung bélê le snéen. ¹⁶ Ne sok ye gel stifun yóm kdê ye bè yó, hol ye gel sfódó se kuy. Kdê yó kem benwu gónón wen hemtahu bè Krays bè ni, tey gel kehedem le kuy se kul. ¹⁷ Ni hol monu mò kuy, kem dumuhu setwoli, hol ten-gama ye yó kem tau tô senkla le yóm kessotu nawa ye, ne gel senbeweg le yóm kehtahu ye, lel le gel semkuya yóm tahu tolok deng gel gungol ye. Yó kmò ye kul, tódô ye hlayuk bélê le. ¹⁸ Abay se là kô lolò le ke Krays yóm gónó tekuy mogot yó kem tau yó. Són kul knóyô lolò le. Lemwót bè yóm alì khulung le mudél, gel gsukat bélê le yó kem tau là deng tngón le du yóm ktahuhen. ¹⁹ Deng tey glalag ebè kem dumu ye hemtahu ne yóm là kili nawa ye du yóm Tulón Hyu. Tey bong kehyu nawahu du se do yóm nmò ye yó. Kóyóu bélê ye ke hol ye hfulung hedem anì glolò ye yóm hyu, ne là glolò ye du yóm sidek. ²⁰ Tek són Dwata gónón lemwót yóm kenek nawa tekuy. Là buden legen ne yóm kdaen ke Seitan elaan anì laen dù bud gmoen bélê ye. Yó hem gónó tekuy mogot Jisas Krays hol seflós tmóbóng kuy. ²¹ Timuti se sotu dumuhu mò nmò bè ni. Tey kólómen kuy se kun. Dalang se kul le Lusyus ne Jasun ne Susipatér, hono kem dumuhu Ju. ²² Ou se Tértyus, yóm fen smulat du nim sulat Pol ni. Tey gel kólómu kuy se do, abay se ou sotu dumu ye setwoli bè kehtahu tekuy. ²³ Bud ni se kun udél Pol ebélê ye. Tey kólóm Gayus kuy se kun, yóm tau fun gónô gónóhu nô. Són bè kun gónô gónó le gel stifun yó kem dumu tau hemtahu bè ni. Senged se ke Irastus, yóm tau fen mogot filak bè nim syudad ni, ne Kwartus, yóm sotu dumu tekuy hemtahu, tey kólóm le kuy se kul. ²⁴ Yó hem gónó tekuy mogot Jisas Krays hol semflós tmóbóng kuy. ²⁵ Hol dóyón tekuy dé Dwata. Du se yóm gembek hol hbegel kuy bè kehtahu ye hlanen bè yóm Tulón Hyu gel nitu gbak ebè Jisas Krays. Nim Tulón Heyu ni, ni se yóm tehe gebenos bè yó kem tau gnan teganay. ²⁶ Okóm nim kmoen ni, deng hetengón Dwata hlanen bè yóm deng snulat yó kem tehe tugoden teganay. Yó hol hmò Dwata kum, hol hetengón me nim tulón ni ebè kdéen tau bè klamangen benwu anì hemtahu le, ne nimón le snéen. Ni se hol kun kóyô yóm Dwata laen dù tul katayen. ²⁷ Tek són du yóm hol tahu Dwata, ne tódô gotu tngónen kdéen. Bê tekuy nmò sónen yóm kdóyón tekuy du hlan tekuy bè Jisas Krays.