¹ Ne tódô tonu yóm tey hentaw ton te kmawang. Wen libun tonu. Yó nes leseken, mata kdaw, ne bulón nô laan hólól tihen. Ne wen sfolò lewu blotik urunahen. ² Uma kóm mlutut yóm libun yó, ne tódô kmuleng se yóm bnututen, ya tey langaten bè yóm kkulengen. ³ Ne wen sotu bud hentaw ton tonu ditu te kmawang. Wen tey klambaden swaga hulô tonu, hitu kuluhen, ne sfolò hangahen. Ne sket wen kuruna yó kem hitu kuluhen. ⁴ Bè yóm kwelen tukô ikongen, botong gbut bè yó kem blotik bè longit gbek nkélen etlaan talak tonok. Ne yó nmoen, tódô lemfen bè solu yóm libun, nangaten ksut yóm ngaen anì tô hlohen. ⁵ Tahu se, sut yóm ngà, uma kóm logi. Yó se yóm ngà mò angat kmamal yóm klamangen. Angat tey mbegel kogoten kukum, hol lómón ktétélen bala tók. Bede bè ksut yóm ngà yó, tódô wen kendel semkot du etu bè solu Dwata bè yóm gónón myón kmamal. ⁶ Kewóten se kun yóm libun yó, mlóy etu bè tum benwu laen dù tau menwu du. Yóm benwu deng eles hentifes Dwata béléen mò gónón semgyok du efet deng yóm tlu halay bud sóól. ⁷ Ominen wen tey sgida bè longit, anì monem Maykél ne yó kem dumu hógów Dwata nalaken, na le e gnida yóm swaga hulô yó koni mung du yó kem kun gel hógów. ⁸ Okóm là dogen matù yóm klambaden swaga hulô yó, ne gotu hdó le lu bè yó bè longit. ⁹ Tódô tudà le etalak tonok yóm swaga hulô yó, yóm tehe ulal là kna lemwót bè kbuten, duhen Seitan, yóm alì hulung dmelem, yóm alì hulung smukat yó kem tau bè klamangen benwu. Tódô tudà le etalak tonok, mung du yó kem gel hógówen. ¹⁰ Ne tódô gungolu se yóm tey mudél gu bè longit, monen, “Deng duhen ni se kehtohen yóm kdaw kehewà Dwata yó kem kun tau. Deng hegfan Dwata ne yóm kun kfasang mogot yóm klamangen. Deng gfan snéen yóm kun kwalis yóm kun Misaya, yóm deng tehe néléken. Yakà deng tudà le ke Seitan etlaan. Du se tendo tehe gel dmelem bè solu Dwata yó kem tau hemtahu. Tódô seflós kdaw ne kifu tendo gel kdelemen kul. ¹¹ Okóm deng le matù béléen yó kem kut dumu setwoli deng hemtahu mlan bè kun litô yóm Ngà Ubiha deng gamà bélê le, ne bud mlan bè yóm ktahuhen deng gel hból le. Là kô knamà le du klowil le efet katay le. ¹²  Duhen yó, hol ye hligal dé yóm kdê ye nô bè longit. Okóm tey kodu ye kuy, yu kem tau nô te tonok, ne yu kem tau nô te mohin, abay se deng kól bélê ye Seitan ne tey sidek kebuten, abay se tódô tngónen se là kóen legen ne duen yóm kun kdaw.” ¹³ Timbow gnóm yóm swaga yóm deng kegtudaen ete tonok, nbuten bè yó ne kemtes du yóm libun mngà logi yó koni. ¹⁴  Okóm wen hafak blay Dwata du yóm libun yó, lómón hafak yóm banug bong anì tódô móyóng etu bè yóm benwu laen dù tau menwu du, ne bè yó gónón wen tendo semgyok du efet tlu halay sóól. Laen kô dù bud gmoen béléen bè yó yóm swaga. ¹⁵ Ne yó bud nmò yóm swaga yó koni, nan e hektes yóm libun yóm tey dunuk bong lemwót gu lem baken, kóyóen ke tô konul du. ¹⁶ Okóm fen tnóbóng tonok yóm libun. Yó nmoen, tódô sgawag anì tódô gotu mlel elemen yóm él gu lem bak yóm swaga. ¹⁷ Mom temnù kebuten yóm libun yóm swaga yó. Yó nmoen, tódô nan e nwit sgida yó kem tau semfu gu bè yóm libun yó, duhen yó kem tau deng mimón yóm kun hlau Dwata, ne là kóen monol nawa le bè yóm ktahuhen tehe tolok Jisas. ¹⁸ Ominen bud lemwót yóm swaga yó, tódô nô bè kilil mohin.