¹ Ne tódô tonu se yóm sotu ógóf lóbô hesut gu lem mohin. Hitu kuluhen, ne sfolò hangahen. Ne sket wen kuruna bè yó kem hangahen, ne tódô ket kuluhen gónóhen gsulat yóm udél hemnê ke Dwata. ²  Yóm ktonu du nim ógóf lóbô ni, kbongen yóm sotu ógóf lóbô lem bnes boluyen lipard. Okóm yóm tihen, lómón ke ti bér, yóm sotu ógóf lóbô lem bnes. Yóm sumóngen, lómón sumóng liyun. Yó nmò yóm swaga nô bè kilil mohin yó koni, gotu blayen yóm kun kfasang ne yóm tey kwalisen mogot benwu bè yóm sotu ógóf lóbô lomi hesut gu lem mohin. ³ Bè yóm sotu kulu yóm lóbô yó, lómón ke deng tehe wen halien tehe gónón matay, okóm deng mkó ne. Tey kehtaw le du yó kem tau bè klamangen benwu yóm bud klowilen, ne tey genged tau lemolò du. ⁴  Tey kehtahu le du yóm swaga, abay se deng blayen yóm kun kfasang bè yóm ógóf lóbô hesut gu lem mohin. Hentahu le snéen yóm ógóf lóbô, mon le, “Laen kô gemsenged du nim ógóf lóbô ni. Laen kô gembek mit du sgida.” ⁵ Nim ógóf lóbô ni koni, tódô kem hlun bayà Dwata du yóm alì kehegmónen ne yóm alì kehnéen ke Dwata. Ne na tódô bayà Dwata du snéen yóm kwalisen mogot benwu tlu halay bud sóól. ⁶ Tey sidek kbaken ebè Dwata, homongen du boluyen ne yóm benwuhen. Dalang se yóm kdê nô bè longit, tey kehnéen kul. ⁷ Ne na tódô bayà Dwata du snéen yóm kwiten sgida bè yó kem tau Dwata ne yóm fen katuen bélê le. Na hlun bud bayà Dwata du se yóm kwalisen mogot kul yó kem tau lemwót bè ket ból tau ne bè ket kay udél ne bè ket but tau. ⁸ Tódô kdéen tau te tonok gotu hemtahu béléen yóm ógóf lóbô yó. Són olo là hemtahu béléen, són yó kem tau deng gsulat boluy le bè yóm bok lowil, yóm kun bok yóm Ngà Ubiha tehe hnatay le. f Deng eles gotu snulaten ne boluy yó kem tau wen klowil laen dù sónen gu laanen là deng dmimun du yóm kentihen. ⁹ “Duhen yó, yóm tau wen klinguhen, hol hmungol. ¹⁰ Yóm tau ke deng olu Dwata du kenfô, dohò kenfô se yó. Ne ke deng olu Dwata yóm sotu tau matay bè sudeng, dohò matay bè sudeng se yóm tau yó. Yó gónóm mon, tey bong muhen yóm khulung le hbala yó kem kun tau Dwata, ne ke là monolen yóm kehtahu le.” ¹¹ Kogolen bè yó, tódô tonu yóm sotu ógóf lóbô hesut gu lem tonok. Lewu hangahen lómón hanga ubiha, okóm yóm udélen, lómón udél swaga.  ¹² Nim lóbô huli sut ni, tódô nwiten yóm tey kun kfasang yóm lóbô tanay sut. Ne yó nmoen, gnagahen yóm kdéen tau nô te tonok anì són bè yóm lóbô tanay sut gónó le hemtahu, yóm lóbô tehe wen halien deng bud mkó. ¹³ Tey dê hentaw ton nmò yóm lóbô huli sut yó. Balù ofi gu bè longit gdek ete tonok, botong gbeken mò du, ne tódô kdéen tau gotu mton du. ¹⁴  Ne lemwót bè yó kem hentaw ton gel nmoen, gónó le gotu gsukat yóm kdéen tau nô te tonok. Bè yóm gel kmoen du ni kem ni, gel nô klohok yóm lóbô tanay sut, abay se yóm lóbô gna sut gel hmò du béléen. Yóm lóbô huli sut yó, wen lennged hmoen yó kem tau, yóm lennged mkél bè yóm lóbô tehe hnalì bè sudeng, okóm deng bud mowil. ¹⁵ Tódô bayà Dwata yóm lóbô huli sut yó yóm keblayen klowil yóm lennged deng hmoen yó kem tau. Yó gónón tódô mudél yóm lennged yó, ne tódô gotu hfatayen kdéen tau là hemtahu le béléen. ¹⁶ Sotu bud nmò yóm lóbô huli sut yó, gotu hmoen ilô bè sigel kwanan yó kem tau duhen ke bè uyó le. Gotu hmoen bè kdéen tau yóm ilô yó, kem tau glaan ne kem tau hol geta, kem tau kwasa ne kem tau élél, kem tau klifen ne kem tau là klifenen, gotu hmoen ilô le. ¹⁷ Laen kô dù tau gbeken bemli duhen hembalù ke là wen ilô le. Yóm ilô nmò le yó, yó se kun boluy yóm lóbô tanay hesut, duhen ke olo lemilu yóm kun boluy. ¹⁸ Là kô gbek tau hemlan du nim ni ke là hulungen hedem. Okóm ke wen ketngónen, gbeken gmileb du lanen yóm lemilu yóm lóbô tanay sut yó, abay se yóm lemilu yó, hnigaden boluy tau. Yó lemiluhen, 666.