¹ Ominen wen bemlay dou btes lómón ke tuged kmoen, ne monen mò dou, “Lemwóti ne, nam e bentes yóm Gónô Dwata bè Jirusalim, ne homong bentesem yóm gónó le gel demsù ebè Dwata, ne homong nsóhem se yó kem tau gel tmaba Dwata bè yó.  ² Okóm béem homong bentes yóm gu hilolen, abay se deng tódô gbayà bè yó kem tau là Ju le. Ne bè yó bè Jirusalim, yóm kun syudad Dwata, tlu halay sóól kegen le angat mò gida. ³ Angat wen lewu tau hógówu mò tugodu ebè yó bè yóm tlu halay bud sóól,  bede mnes le sakù.” ⁴ Yó kem lewu tugod Dwata yó, lu se hnigad yóm lewu koyu boluyen ulib ne yóm lewu solok deng eles nô bè solu yóm gónó mogot deng kmamal yóm klamangen. ⁵ Ke wen tau tô hemsidek kul, tódô hesut gu lem bak le ofi, ne gotu le mlób yó kem hohon le yó. Tódô hatayen yóm tau ke yó tô nmoen hensideken lu. ⁶ Wen kwalis blay Dwata kul anì gbek le là hkulón du bè yóm tlu halay sóól kegen le tmugod ke Dwata. Ne gbek le se hembaling kul litô yó kem él tembul bè yó. Bud wen kwalis le mò kihu hlayam bè yó kem tau, balù hilu dulék le móyô mò du. ⁷ Okóm ke deng gotu deng le yóm htugod Dwata kul, ominen wen yóm sotu ógóf lóbô hsut gu lem yóm tey sol leyóng, nan e nit lu sfatay. Ne du matù bélê le, botong gotu ghatayen lu. ⁸ Ne yóm lówó le, tódô tebelen bè yóm lan bong bè syudad Jirusalim. Yó se yóm syudad gónó le tehe tmutuk bè kros yóm gónó le mogot. Wen gel boluy le du yóm syudad yó, duhen Sodom ne Idyip. Yóm boluy yó, wen hnigaden. ⁹  Botong tlu kdaw bud sóól kegenen masà bè yó yóm lówó le, là kô hlus hebeng le kul. Tódô kdéen tau lemwót bè klamangen benwu, gotu temngel yó kem lówó le, tau lemwót bè ket ból tau, ne bè ket kay udél ne bè ket but tau. ¹⁰ Ya tey kehligal yóm kdéen tau te tonok bè yóm katay le. Tey ken bong nmò le, ne lel tey kesbasa le lemwót bè yóm kligal le. Yakà bè yó du kem lewu tugod Dwata yó gónón lemwót yóm tehe tey keglayam le. ¹¹ Timbow deng yóm tlu kdaw sóól yó, tódô bud hlowil Dwata lu, ne tódô le bud hboluk btik. Ya tey sidek klikò yóm kdéen tau mton kul. ¹² Ne tódô gungol yó kem lewu tugod Dwata yó koni yóm tey udél bong gu bè longit, monen mò kul, “Géhél ye edini ne.” Ne tahu se. Igò le tolo temngel yó kem hohon le, tódô le haway eta bè longit mung bè lobun. ¹³ Ne tódô sen‑gengen se yóm tey linol bong bè yóm syudad yó. Botong móyónen gbut bè yó kem gónô le, gotu gbà, ne botong hitu libu tau matay. Ne yó kem dumu tau là matayen, ya tey sidek klikò le, botong dóyón le yóm Dwata nô bè longit lan le mton yóm tey kfasangen. ¹⁴ Ni se deng gewuhen yóm alì hlayam knikò tau sut bélê le. Ngem móyónen sut yóm getluhen. ¹⁵ Ominen mféw yóm ghitu yó kem hógów Dwata, sen‑gengu se mungol yóm tey udél gu bè longit, mon le, “Deng hto ne yóm kul kdaw mogot lamangen benwu yóm Dwata gónó tekuy mogot ne yóm kun Misaya. Ne laen kô dù sónen yóm kkamalen yóm klamangen yóm kun Misaya yó.” ¹⁶ Omin le lemwót yó kem lewu folò fat tau tuha myón bè solu Dwata, gotu le lemfen bè soluhen, dóyón le Dwata, mon le, ¹⁷ “Ó Dwata, yóm hol gónó mogot, yóm laen dù là gbekem du. Uu se yóm sana Dwata tenbut bè kbuten efet nim kmoen ni. Tey kdóyón me kóm, abay se deng nbutem kmamal yóm klamangen lemwót bè yóm tey kegbekem. ¹⁸ Tey sidek kebut le kóm yó kem tau là hemtahuhen, abay se deng hto ne yóm kóm kdaw tmafak kul, ne yóm butengem kmukum yó kem deng matay. Deng hto snéen yóm butengem bemlay ofol bè yó kem tau tehe tóbóng lówóhem, duhen yó kem tehe tugodem, dalang se yóm kdê tau kmikò kóm, lemwót bè yó kem tau hol geta kólen bè yó kem tau glaan. Deng hto snéen yóm butengem gemlà kul yó kem tau deng tehe mamà tonok.” ¹⁹ Yóm igò le dmóyón ke Dwata, tódô wen lemungkà du yóm Gónô Dwata bè longit, ne gfan bè yó yóm slungan gónóhen nô yó kem tehe fasad Dwata deng tehe snulat le. Ominen mkal yóm tey silà, ne sen‑gengen se lemungkul, lel yóm tey leték, ne tey linol bong te tonok, lel yóm tey bulók kulón.