¹ Ominu yó mton yóm sotu hógów Dwata alì kemgis htuntun gu bè longit. Tódô nô lem yóm tey lobun, ne lenéwés hilol kuluhen, ne lem uyóhen hol lómón mata kdaw, ne yóm tihen lómón ke hehek lenébéd dilóf. ² Wen sulat udì lenulun niten deng eles lemnal. Lemwót yóm ti kwananen, daen te mohin, ne fen daen te tonok yóm ti iwóngen. ³ Ne ominen hgel tabahen, lómón ke ngel liyun. Kogol yóm ktabahen yó, bnalà yó kem hitu leték, ya tey lungkul le. ⁴ Bè yóm kungolu du yóm mon le, tô snulatu, okóm tódô gungolu se yóm bud mudél ebéléu gu bè longit, monen, “Bê. Béem dog snulat ne tu kem mon le tu koni. Hol bunihem.” ⁵ Ominen lemwót yóm hógów Dwata, yóm le daen te mohin doli tihen ne te tonok dolihen, hdaen ebè longit sigel kwananen, ⁶ 6 ne wen fasad nmoen hlanen bè boluy Dwata, yóm Dwata laen kô dù tul katayen, yóm deng tehe dmimun longit ne tonok ne mohin ne yó kem kentihen nô lem le. Yó udél yóm hógów Dwata yó, monen, “Laen dù bud gónón ganggà ne ni. ⁷  Sok mféw yóm ghitu hógów Dwata, tódô nmò Dwata ne yóm atul tehe bunihen ekni, yóm tehe fasaden bè yó kem tehe tugoden, yó kem tau tehe mò tóbóng lówóhen.” ⁸ Ominen bud mudél ebéléu yóm deng mudél ebéléu gu bè longit yó koni, monen mò dou, “Mógówi etu ebè yóm hógów Dwata daen te mohin doli tihen ne te tonok dolihen, nam e nwa yóm sulat udì lenulun deng eles lemnal niten.” ⁹  Tahu se, mógówe ebéléen, ne hnihu béléen yóm sulat udì niten. Ne yó monen mò dou, “Ni nwahem, ne kenem. Tey mi nim ni sok nô lem bakem, lómón ke tneb. Okóm ke kól lem blututem, baling héét.” ¹⁰ Tahu se, nwahu yóm sulat udì yó ne gotu kenu, ne lómón kmò knómen tneb lem baku. Okóm yóm deng kehlohu du, deng mom baling héét lem blututu. ¹¹ Ominen bud wen mon du mò dou, monen, “Hol bud sentbongem yóm tulón Dwata gbak ebè kdéen tau bè klamangen benwu, yó kem tau stólóng benwu le, stólóng kbut le, ne stólóng udél le, ne bud gbak ebè yó kem tau mogot kul snéen.”