¹ Ne ominen mféw yóm glimu yó kem hógów Dwata. Ne tódô tonu se yóm lómón tô blotik deng btang ete tonok, ne blay le du kunsì yóm bak yóm sol leyóng gónó le bmanggù yó kem busaw, yóm laen kô dù sónen yóm kengelemen. ² Ominen lemungkà du yóm bak yóm sol leyóng yó, ne tódô hesut se yóm tey kebel gu lemen, lómón kebel yóm tey dutung bong, botong tódô kmifu talak kmawang. ³ Ne wen tey tlangas hewà gu lem yóm kebel, gotu le lememek te tonok. Ne benlay Dwata lu alas mékét, lómón kalas le, ékét syufón. ⁴ Okóm là hlus Dwata du kul ke hensidek le yó kem bnes ne yó kem koyu ne yó kem hulu. Són olo hlusen kul, són yó kem tau laen dù kun ilô Dwata lem uyó le. ⁵ Là hlus hfatay Dwata du kul, okóm wen limu bulón blayen kul anì hol hnayam le lu. Yóm kdes ékét le, hol lómón kdes ékét syufón. ⁶ Bè yóm limu bulón yó, sónmò le tô hemdeen katay le, okóm là. Hol kóyô le ke géhél le matay, okóm là se kô le matay. ⁷ 7Ni kem tlangas ni koni, lómó ktonu kul, lómón yó kem kudà gel nit le bè gida. Wen nô bè kulu le, lómón tô kuruna blówón. Ne lem uyó le, lómón lem uyó tau. ⁸ Tahà se yóm wek le, lómón kwek libun. Ne tey telem nihi le, lómón tô nihi liyun. ⁹ Ne wen lómón tô unaf utón él bè kfu le, bede hono bala tók mò onit le. Ne uni lefluk hafak le, hol lómón ke segeng mlóy yóm tey kudà wen demyol klitun tók bè gida. ¹⁰ Ne bè yóm ikong le gónón nô alas le hemdes kem tau efet limu bulónen, ne yóm kdesen lómón ke ékét syufón. ¹¹ Uma kóm wen yóm hol geta malak kul yó kem tlangas yó, duhen yóm sotu hógów Seitan, yóm fen mogot yóm sol leyóng. Yó boluyen bè udél Hibru, Abadon. Ne bè udél Grik, Apolyon. Yó lanen yóm boluyen yó, “Gemlà.” ¹² Deng gotu deng ne yóm sotu hlayam alì knikò tau yó. Ngem, lewu he duen. ¹³ Ominen mféw yóm gnem yó kem hógów Dwata, ne tódô gungolu se yóm mudél seblà bè yó kem fat sokok yóm gónó gel demsù hono tahu blówón nô bè solu Dwata. ¹⁴ Mudél ebè yóm hógów Dwata lomi mféw yó koni, monen, “Hewaem ne yó kem fat hógów Seitan deng tehe fét là sekna bè kilil yóm él bong boluyen Yufratis.” ¹⁵ Tahu se, gotu hewà le lu, abay se deng hto ne yóm buteng Dwata hewà kul. Deng eles tehe nmoen yóm halayen ne bulónen ne kdawen ne urasen hewà kul anì na le e hmatay botong gbut bè yó kem tau te tonok. ¹⁶ Ne tulón le do yóm kwen kem sendalù smakay kudà mung kul. Yó kwen le, botong lewu latu katihen. ¹⁷ Bè yóm kehegfan le béléu, tódô tonu yó kem kudà ne yó kem tau smakay kul. Tódô le sket onit. Wen se onit hulô, hol lómón dilóf ofi. Ne wen se ginggung lómón yóm botu safar. Ne bud wen se lómón kbuda mélél. Yóm kulu kudà le, lómón kulu liyun. Són semfut gu lem bak le ofi ne kebel ne dilóf kbuda. ¹⁸ Botong gbut bè yó kem tau bè klamangen benwu matay lemwót bè yóm ofi ne yóm kebel ne yóm dilóf kbuda gu lem bak yó kem kudà le. ¹⁹  Yakà gu lem bak le du yó kem kudà yó ne gu bè tukô ikong le gónón lemwót yóm kgis le hmatay tau. Ne yóm ikong le, lómón tô ulal kmoen, ne lemwót bè kuluhen gónó le gembek hemdes yó kem tau. ²⁰ Bong yó kem tau dù tebel, yóm là matay le bè yó kem hlayam yó koni, là se kem dog knogol le du yó kem dwata kéng gel nmò le. Ne là kô kó le du yóm kehtahu le bè yó kem busaw. Ne là se dog kó le du snéen yóm kehtahu le bè yó kem dwata lennged nmò le gu bè blówón mélél ne gu bè blówón bukay ne gu bè botu ne gu bè koyu. Ni kem hentahu le ni, là kô le mton ne là kô le mungol ne là kô le mógów. ²¹ Yó kem tau dù tebel yó koni, là kô le dog hegsel bè yóm gel kbonok le. Ne là se kô tebel le du yóm kwen lamat le, ne yóm kmò le samuk, ne yóm knagaw le.