¹ Na, lemwót bè yóm là bud kegbala me du yóm tey kónó nawa me kuy, yó atul me, fene tagak bè syudad Atin dou ² ne Timuti fen hógów me edyó. Nim Timuti ni, sotu dumu tekuy setwoli, gel tmóbóng kum mit du yóm Tulón Hyu gbak ebè Krays. Yó gónó me hógów du edyó mò temgel kuy ne tmóbóng kuy bè kehtahu ye ³ anì laen dù bélê ye gemkogol du yóm kehtahu ye balù yóm tey keglayam ye. Deng hónô tngón ye se nim keglayam tekuy ni, kun kmò kehlan du Dwata. ⁴ Bè yóm tehe knô me bélê ye, deng eles tulón me kuy se yó kem hlayam angat kól lemwót bè kehtahu te. Ne ni hol kéng duem du yóm mon me yó. ⁵ Yó gónóm mon, bè yóm là hol bud kegbalahu du yóm alì ksidek kónó nawahu kuy, yó se gónóhu hógów ke Timuti edyó mò gónów temngón du yóm mò kmò yóm kuy kehtahu. Mónó nawahu du yóm ksindil Seitan kuy, kô gmung ye du, ne kô mom baling kafa yóm tehe gel nmò me lem blóng ye. ⁶ Okóm ni, deng bud kól gu dyó Timuti, ne tey hyu yóm tulónen kum lemwót bè yóm kuy kehtahu ne yóm kesbong ye nawa. Tulónen kum snéen yóm gel kehedem ye kum dyó, ne tey gel khahù ye kum kun, lómón se yóm kum khahù kuy. ⁷  Duhen yó, kem dumu me setwoli, balù yóm tey kwen gfà me, ne tey dê gónó me glayam, ewenem yó, sana tey kehyu kegnóm me du lemwót bè yóm kuy kehtahu. ⁸ Abay se tey mgel nawa me se kum ke mbegel yóm kuy kehtahu lemwót bè yóm deng kessotu ye bè yóm gónó tekuy mogot. ⁹ Ne nim kmoen ni, tey kdóyón me ke Dwata lemwót bè yóm kuy kmò. Laen selen yóm klaan nawa me bè yóm gel kni me bélê ye bè Dwata. ¹⁰ Tódô ket kdaw ne ket kifu me tendo gel mni bè Dwata anì bud tekuy ston, ne anì wen gónó me tmóbóng kuy bè yóm tolo gónó ye là deng ket bè yóm kehtahu ye. ¹¹ Yó hem Dwata yóm Mà tekuy, ne Jisas yóm gónó tekuy mogot hol mò lan me edyó bélê ye. ¹² Yó hem gónó tekuy mogot hol temnù du bélê ye yóm kuy kesbong nawa ne yóm nawa ye ebè yó kem dumu tau snéen, lómón se yóm kum kbong nawa kuy. ¹³ Ni se mò lanen hol temgel kuy anì hol ye gulit ne mólós ke mdà ye bè solu Dwata yóm Mà tekuy, bè yóm kdaw angat kesfuléken edini yóm gónó tekuy mogot, mung du yóm kdê kun tau.