¹ Yu kem dumu me setwoli, deng tngón ye ne kuy yóm là kkafahen yóm tehe nógów me edyó. ² Ne tngón ye se yóm tehe kehsidek le kum ne kesedekà le kum yó kem tau bè Flipay gu laan me là deng kól bélê ye bè yó bè Tisalunika. Okóm baluen se yóm alì kwen fen tô hemseng kum, tey ketgel Dwata nawa me anì tulón me kuy yóm Tulón Hyu lemwót béléen. ³ Yóm gel tulón me kuy yó, laen kô dù kéng du, ne laen se kô dù kaan lafinen, ne là kô gónó stondo du. ⁴ Okóm yóm gel tulón me, sal gel lemwót bè kun kóyô Dwata, abay se deng néléken mi, ne deng sigangen ta me yóm Tulón Hyu. Yó gónóm mon, là kô tau du yóm hefligal me, kaem Dwata yóm fen hemklol du yóm hol nô bè nawa me. ⁵ Deng hónô tngón ye yóm kmò kwit me du yóm tehe gel tulón me kuy, là kô na me e nmò du bélê ye yóm udél hegbóy, duhen ke wen udél mò lemimun yóm gel sen‑glom me. Dwata gemtanud du ktahuhen nim monu ni. ⁶ Là kô hendeen me du ke wen tau dmóyón kum, senged se ke yu duhen ke tau eddoli. ⁷ Okóm ke nawa me se hadat bélê ye, là móngóhen, yakà mi du se yó kem nélék Krays mò hógówen. Okóm yóm kmò me kuy, heskél tekuy ebè yóm libun alì ganag nawan semgifà yó kem ngaen. ⁸ Lemwót bè yóm kbong nawa me kuy gónó me alì gduf tmulón du bélê ye yóm Tulón Hyu lemwót bè Dwata. Botong là dog bud gólóm me du yóm kum klowil, bà mon se yóm tey nawa me kuy. ⁹ Dô là deng klifót ye du he yóm tehe tey kmò me nmò bè yóm tehe knô me dyó bélê ye. Tódô senflós me kemdaw ne kifu mò nmò anì là glayam ye temdof kum bè yóm igò me tmolok kuy yóm Tulón Hyu lemwót bè Dwata. ¹⁰ Deng ton ye se kuy, ne deng ton Dwata snéen kun yóm klaen dù belenen yóm gel kmò me bè yóm tehe knô me bélê ye ekni. Hono tedeng. Balù udì ke wen gónó ye gemsanil kum. ¹¹ Tódô tngón ye se yóm tehe gel kmò me kuy, hol lómón yóm kmò yóm mà ebè yó kem ngaen. ¹² Tey gel kegduf me kuy, ne tey gel kehyu me nawa ye, lel me tendo gemduf kuy anì gmò ye yóm gónón hligal Dwata. Du se tehe tmaba kuy anì gomong ye bè yó kem tau nogoten ne bè yóm tey kegetahen. ¹³ Bud sotu gónó me tendo gel dmóyón ke Dwata snéen. Bè yóm tehe kwit me ebélê ye yóm tulón lemwót bè Dwata, bè yóm kungol ye du tódô kendel henmóyô ye, ne tódô dilô ye hol tahu kun udél Dwata, là kô olo udél tau du. Ne tahu se yó. Ne lemwót bè udélen wen gel nmò Dwata bélê ye yu kem tau deng hemtahu. ¹⁴ Ne ni, kem dumu me setwoli, deng wen gónó ye skél bè yó kem tau hemtahu bè Dwata bè prubinsya Judiya bè yó kem tau nfun Krays Jisas bè yó. Abay se lemwót bè kehtahu ye wen gónó ye glayam bè kem dumu ye nim kmoen ni, hol lómón se yóm tehe kul keglayam yó kem tau bè Judiya bè yó kem dumu le Ju. ¹⁵ Yó kem Ju hmayam kul yó, lu se yóm tehe hmatay ke Jisas yóm gónó tekuy mogot ne yó kem tau tmugod ke Dwata, ne bud lu se yóm gel hemsidek kum. Laen kô dù gónó le hefligal ke Dwata yó kem tau yó, mom hnohon le yó kem dumu le tau. ¹⁶ Bud lu se hemseng kum bè yóm gel ktolok me bè yó kem dumu tau là Ju le yóm lan le gewà gu lem hatay. Bè nim nmò le ni gónón deng tmakas Dwata. Ne ni, deng nô ta le ne yóm ktafaken kul. ¹⁷ Bélê me kum, kem dumu me setwoli, balù yóm deng kegtagak me kuy likót, là kóen na a mkó bè nawa me yóm tendo kehedem me kuy. Tey tendo gel khahù me kuy, ne tey kebel me lan anì wen lan tekuy na a bud ston. ¹⁸ Bong óyô me bud tô semfulék ebélê ye. Deng gel dê duléku ne tô lemwót, okóm sal gel wen lan Seitan hemseng kum. ¹⁹ Bè ktahuhen, bè yóm kdaw angat kesfuléken edini yóm gónó tekuy mogot, bélê ye se gónón lemwót yóm kwen hendón nefet nawa me bè yóm kdaw yó, ne yóm kwen kligal me, ne yóm kwen gónó me megsalù bè soluhen. ²⁰ Tahu se, lemwót bélê ye yóm kegsalù me ne yóm kwen kligal me.