¹ Ne ni mò sónu du bélê ye, kem dumuhu setwoli, deng tehe wen dnalang ye lemwót bélê me bè yóm kmò kekdol ye anì hyu nawa Dwata ebélê ye, ne bè ktahuhen deng duhen yó se yóm gel nmò ye. Ne ni wen bud hol sen‑galu me bélê ye, hlan me bè kun boluy Jisas yóm gónó tekuy mogot anì hol temnù yóm hyu gel nmò ye. ² Deng tngón ye se yóm tehe hlolò me kuy lemwót bè yóm kun kwalis Jisas yóm gónó tekuy mogot. ³ Yó hol kun kóyô Dwata bélê ye ke hol ye mólós ne ke laen dù bélê ye fen mò samuk. ⁴ Ne kóyóen ke ket kuy sotu hol hfulung mafas nawan bè yóm knóyô lówóhen. Hyu ke laen dù belenen yóm gel nmò ye, ne ke eles ten‑gama ye yóm kuy lówó. ⁵ Bê ye abay gekteng du yóm nawa hdóyón, lómón yóm kul gel nmò yó kem tau là deng temngón ke Dwata. ⁶ Kóyô Dwata ke là nulé ye du ni kem monu ni koni, anì laen dù gónó ye sgulé bè kem dumu ye. Deng tehe tulón me kuy se nim ni, ne deng tehe eles hetgama me kuy yóm ktafak yóm gónó tekuy mogot yó kem tau mò du. ⁷ Là kô yó du gónó Dwata tmaba te ke mò tekuy samuk, okóm yó dé hol sen‑galuhen bélê tekuy ke hol te mólós. ⁸ Duhen yó, ke wen tau kembê du nim toloku kuy ni, là kô tolok tau du yóm kenbéen, kaem Dwata yóm bemlay tekuy yóm kun Tulus. ⁹ Bong bè yó dum kesbong nawa ye bè yó kem dumu ye deng hemtahu, baluen ke là bud snulatu du bélê ye ne, abay se deng tolok Dwata kuy ne yóm kmò kesbong nawa. ¹⁰ Ne bè ktahuhen, yó se yóm deng gel nmò ye bè kdê yó kem dumu ye hemtahu bè klamangen Masdunya. Okóm, kem dumu me setwoli, yó hol sen‑galu me bélê ye ke hol henlel ye mò du. ¹¹ Hol nmò ye dé yóm nmò mò gónón menek klowil ye, ne bê ye snolò yóm nmò yó kem dumu ye, ne hol ye heged mò nmò anì wen gónó ye ma, lómón yóm tehe hlolò me kuy ekni. ¹² Ke ni se nmò ye, nadat le yu yó kem dumu tau là dengen hemtahu he, ne sotuhen, là salig ye du bè kem dumu ye yóm kuy klowil. ¹³ Kem dumu me setwoli, kóyô me ke hol tngón ye yóm ktahuhen gbak ebè yó kem tau hemtahu deng matay, anì là kat ye langag, lómón yóm kul kmò yó kem tau laen dù nefet nawa le. ¹⁴ Deng hentahu tekuy yóm deng katay Jisas, ne yóm deng bud klowilen. Yó gónó tekuy hemtahu du yóm angat klowil Dwata kul yó kem tau hemtahu bè Jisas deng tehe gna matay, ne gotu hmungen lu ke Jisas ke sok bud semfulék edini. ¹⁵ Nim tolok me kuy ni, hono lemwót bè yóm kun tolok yóm gónó tekuy mogot. Bè yóm kdaw kkólen, là kô tekuy kendel gegna semlong yóm kdê tekuy tolo mowil ke là na le gotu mung tekuy yó kem tau deng tehe matay. ¹⁶ Bè yóm kkólen, wen gna hemsag gu bè longit mò mbal yóm kdéen. Ne mudél se yóm hol geta bè yó kem gel hógów Dwata nô bè yó, lel yóm tey uni féw Dwata, ne ominen yó htuntun gu tta bè longit yóm gónó tekuy mogot. Ne segeng le se bud mowil yó kem tau hemtahu béléen deng tehe gnamatay. ¹⁷ Omin tekuy yó he kem tau tolo mowil bè yóm kdaw yó, gotu tekuy slomong bélê le megkay etta bè lobun anì gotu senlong tekuy yóm gónó tekuy mogot ditu te kmawang. Ne nbuten bè yó ne laen kô dù sónen yóm knô tekuy bè yóm gónó te mogot. ¹⁸ Duhen ni, bè ni kem tulón me kuy ni koni mò udél temgel kuy ke wen lenangag ye.