¹ Bè hol ketahuhen, kem dumuhu setwoli, bè yóm tehe ketoloku lem blóng ye, là hesengedu du bè yóm gel ktoloku yó kem tau deng galak bè yóm Tulus Dwata. Yóm ketoloku bélê ye, hol lómón ke toloku yóm tau là deng le hol hemtahu. Hol lómón ke hanà ye ngà bè yóm kehetahu ye. ² Ke helingónu du yóm tehe ktoloku lem blóng ye, lómón ke gatas hinumu kuy abay se là deng gebek ye du he yóm ken mgel. Efet nim kmoen ni là kô deng gebek ye du he. ³ Abay se monem sana tolo klolò ye du yóm kul kmò yó kem tau là hemtahuhen. Yó gónóhu mon du yóm yó, abay se tolo wen bélê ye gel sélés nawa, ne gel skaf mon. Yó se gónón gefan yóm tolo klolò ye du yóm kul kmò yó kem tau là hemtahuhen. ⁴ Wen kun mon du, “Lolou Pol dou.” Mon kem dumu, “Apulus dou lolò.” Yó se gónón gfan yóm klolò ye yóm kul kmò yó kem tau là hemtahuhen. ⁵ 3  Bè ktahuhen, nim ou lewu me Apulus, olo me kem tóbóng lówó Dwata mò lan ye hemtahu béléen. Olo me kem tau mò du yóm hmoen kum yóm gónó tekuy mogot. ⁶ Ke hningónu yóm nemò me lem blóng ye, lómón ke ou yóm tau fen mò hulu, ne Apulus fen temwél du él. Okóm Dwata fen hetowok du. ⁷ Kihu tau mò hulu, ne kihu se tau temwél du él. Okóm yóm alì bong muhen yóm fen hetowok du, duhen Dwata. ⁸ Yóm tau mò hulu ne yóm tau fen temwél du él, laen kô metukul geta bélê le. Angat wen ofol blay Dwata kul yóm ket kul na sotu, yóm tódô geblà bè yóm gel nemò le. ⁹ Nim mi, stóbóng me mò nemò bè Dwata. Ne yu, hol lómón ke kun tniba Dwata. Sotuhen, lómón ke yu yóm gónô hdà Dwata. ¹⁰ Lemwót bè yóm kenhulung blay Dwata dou, gónóhen mebegel kehedau du yó kem heheken. Bede tólóng tau fen hemdeng du. Ket tau semtóbóng hemdà du yóm gónô yó, yake hol ten-gamahen yóm kmò kehedaen du. ¹¹ Yóm gónô hedà me yó, laen kô dù dumu tud blóngónen, tek sotu, duhen Jisas Krays. ¹² Bè nim gónô ni, wen se fen lemeket du yóm ngom gónô là melóben, lómón yóm blówón ne tembaga futì ne yó kem botu tilob kat mebetes. Okóm wen se lemeket du yóm ngom gónô mahil mlób, lómón koyu ne kolon ne yó kem dumu doun. ¹³ Bè yóm kdaw kdà tekuy bè solu Krays, yó he kegfanen yóm deng leket tekuy du yó koni, ke hyu duhen ke là. Bè yóm kdaw yó, wen ofi gónó le tmilów du yóm gel nemò ket tau, nénég le ke là melóben. ¹⁴ Ke là melóben yó kem ngom leketen bè yóm gónô hedà le yó koni, wen ofolen yóm tau tehe lemeket du. ¹⁵ Okóm ke mlób, tódô lana béléen yóm ofolen yó. Olon tódô gewà se kun, bede hol lómón yóm tau mlóy hewà gu lem ofi. ¹⁶ Deng tengón ye se yóm lówó tekuy kun gónô Dwata, ne deng nô bélê tekuy se yóm kun Tulus Dwata. ¹⁷ Ke wen tau hemsidek du yóm kun gónô Dwata, angat hensidek Dwata yóm tau yó. Abay se ngalihen bè kem sidek yóm kun Gónô Dwata, ne tekuy se yóm kun gónô yó. ¹⁸ Bê ye tnondo kenô ye. Laen kô gónón e kól yóm tau snaligen yóm kun ketengón. Ke wen sotu bélê ye hendemen tey bong tngónen bè yóm ketengón tau te tonok, hol béen abay tódô dò yóm ketengónen yó. Mom heyu he yóm tau ke laen dù tngónen anì là gesengen ebéléen yóm tahu ketengón lemwót bè Dwata. ¹⁹ Yóm kul ketengón yó kem tau te tonok, bè kun kehedem du Dwata, ketengón laen dù muhen. Hol lómón se yóm deng monen bè Sulat Dwata, yóm monen, “Yóm tau alì snaligen yóm ketengónen, yó se henged holot gónó Dwata hebkó du.” ²⁰ Bud sotu tehe monen bè Sulat Dwata, yó monen, “Gotu tengón Dwata yóm klaen dù gónón e mefet yóm kul kehedem yó kem tau temngón te tonok.” f ²¹ - ²² Duhen yó, là heyuhen bélê ye ke mtukul tau salù ye. Bè ketahuhen, ou ne Apulus ne Pitér, dumu me stóbóng mò du yóm kuy keheyu. Hono kuy keheyu snéen yóm klamangen benwu, ne yóm klowil ye ne balù yóm angat katay ye, ne yóm gel sut bélê ye nim kmoen ni duhen ke yóm angat sut elem hulin kdaw, ni kdéen ni, hono kem kuy keheyu. ²³ Tek sotu se mefun kuy, duhen Krays. Ne Dwata se fen mefun ke Krays.