¹ Ó kem dumuhu setwoli, bè yóm tehe kwitu du ebélê ye, yóm tahu tulón lemwót bè Dwata, yóm tulón tehe gebnos bè yó kem tau teganay, là kô hlanu du bè yóm dou kehulung mudél, duhen ke bè yóm tehe alì knagiu. ² Okóm bè yóm tehe knóu lem blóng ye, tek sotu yóm tulón nwitu, són Jisas Krays ne yóm katayen bè kros. ³ Duhen yó, bè yóm tehe ktoloku lem blóng ye lemwót bè yóm tey klikou hol lómón ke laen dù kgisu, botonge kenkel. ⁴ Bè yóm tehe kmò ktoloku lem blóng ye, dalang se yó kem tehe gel tulónu kuy, là kô hlanu du bè khulung tau mudél. Okóm tódô lemwót bè kun kfasang yóm Tulus Dwata gónó ye dmilô du yóm hol ktahuhen yóm tulónu kuy yó. ⁵ Duhen yó, tódô lemwót bè kun kfasang Dwata yóm kehetahu ye bè Krays. Là kóen ne e lemwót bè kehulung tau hedem. ⁶ Bè yó kem tau deng mebegel kehetahu le, wen dou ketengón toloku kul. Bede là mkélen bè yóm kul ketngón yó kem tau te tonok, ne là mkélen bè yóm kul ketngón yó kem tau wen kfasang le mogot benwu. ⁷ Yóm kul kfasang yó, deng sana nebuten monol.  Yóm ketengón gel toloku ni, yó se yóm ketengón Dwata tehe gebnos bè kem tau gnan. Okóm gu laan Dwata là deng dmimun du yóm benwu, deng sana eles tngónen yóm kmò kehelanen du bélê tekuy yóm ketengónen yó anì wen klowil tekuy laen dù sónen. ⁸ Nim ketengón Dwata ni, là kô tengon le du kul yó kem tau mogot benwu nim kmoen ni. Ke deng tengon le, là kô hetutuk le du bè kros yóm gónó tekuy mogot tehe lemwót gu bè longit. ⁹ Nim gel tolok me ni, hol segetón bè yóm tehe monen bè Sulat Dwata, yóm monen, “Deng wen hentifes Dwata bè yó kem tau kembong nawa du. Yóm hentifesen yó, là kô deng wen hnikót mton du he, ne là se wen deng mungol du. La kô deng wen hnikót hemdem du yóm mò kmoen.” c ¹⁰ Okóm deng hetengón Dwata tekuy ne nim tehe bnosen ni, hlanen bè Tulusen. Yóm Tulus Dwata, gotu tengónen kdéen. Balù yóm atul Dwata là deng hegefanen du, tódô gotu tengónen. ¹¹ Bélê tekuy, tek sotu temngón du yóm kehedem tekuy, són tekuy. Senged snéen bè Dwata, tek sotu temngón du yóm kun kehedem, tek són yóm kun Tulus. ¹² Yóm kehedem blay Dwata tekuy, là sengeden bè yóm kul kehedem yó kem tau te tonok. Okóm deng sù Dwata bélê tekuy yóm kun Tulus anì gotu tengón tekuy kdê yó kem deng blayen tekuy. ¹³ Duhen yó, bè yóm gel ktolok me du kuy nim ni, là kô helan me du bè yóm kehulungen mudél tau te tonok. Okóm helan me bè yóm kehulung mudél deng denalang me bè Tulus Dwata. Ne yóm ktahuhen lemwót béléen, yó se gel tolok me bè yó kem tau gónóhen nô yóm Tulus Dwata. ¹⁴ Yóm tau, ke là nóen béléen yóm Tulus Dwata, là kô du lan tengonen yóm tulón lemwót bè yóm Tulus Dwata. Ofo kun mon du ke laen dù muhen. Yó gónón là temngon du, abay se là nóen béléen yóm Tulus Dwata mò fen du béléen yóm hol lanen. ¹⁵ Ke deng nô bélê tekuy yóm Tulus Dwata, gotu tengon tekuy ke tedu yóm heyu ne ke tedu yóm sidek. Okóm yóm tau là nóen béléen yóm Tulus Dwata là kô tengonen du kun yóm kut kmò. ¹⁶ Hol lómón yóm monen bè Sulat Dwata, yóm monen, “Laen kô dù tau gembek temngón du yóm kun kehedem yóm gónó tekuy mogot. Laen se kô dù tau gembek hmau du.” d Okóm bélê tekuy, deng nô bélê tekuy ne yóm kun kehedem Krays.