¹ Bè kuy kehedem kum, mi se kem tau tóbóng lówó Krays. Deng sigang Dwata ta me yóm ketahuhen tehe gebnos bè kem tau gnan. ² Tek sotu hnebel Dwata bè yóm tau tóbóng lówóhen, tek són yóm keguliten. ³ Béléu do, là hol hendemu du ke yu duhen ke wen dumu tau tô kmukum du ke denge gulit duhen ke là. Anì sem ou du, là kô hol tengónu du ke denge gulit. ⁴ Bè kehedemu du yóm dou kmò, laen kô dù tengónu ke wen gónóhu là gulit. Okóm bà yó he, là kô tengónu du ke hol gulit ktonen ou yóm gónóhu mogot. Tódô du he yóm angat kmukum dou. ⁵ Yó gónóm mon, bê tekuy abay kendel hendeng kun kmò sotu tau gu laanen là deng kól yóm hol bantang kdaw. Tódô nangat tekuy bè kun kmò du yóm gónó tekuy mogot sok semfulék edini. Bè yóm kdaw yó, angat gotu hegfanen yóm kdéen gebenos nmò tau. Dalang se yóm kdéen gbuni nô lem hendem tau, gotu hegfanen. Ne yó he kguta kdéen tau du yóm kdóyón Dwata kul duhen ke là. ⁶ Bè nim kdê tulónu kuy ni koni, kem dumuhu setwoli, hlédu ebélê me lewu me Apulus mò gena gónó ye temngel anì wen denalang ye bè yóm tehe gel mon tau, yóm mon le, “Bê ye nulé yó kem gel helolò le kuy.” Là heyuhen ke metukul hegeta ye ne metukul henwog ye. ⁷ Ilóem kmon ye ke geta ye senta yó kem dumu ye hemtahu. Wen kô tódô kun kenhulung yóm tau ke là lemwóten bè Dwata? Ke lómón yó, moen de ke tô nit ye hetunsalu yóm deng blay Dwata kuy? ⁸ Ilóem ofo kuy ke deng gesengel ne yóm kenhulung deng blay Dwata kuy. Ofo kuy kô ke laen dù gónó ye élél, ne ke deng ye baling tau hol geta? Okóm bélê me kum, là he.Tey hyu se ke tahu yóm kegeta ye yó anì gomong me bélê ye. ⁹ Bede bélê me kum kem tau deng nélék Krays mò gel hógówen, bè dou kehedem du, dô mi se yó kem tau deng alì heglaan Dwata bè kdéen. Ne lómón ke mi yó kem tau deng nfét mò henatay bè gónón wen. Tódô kdéen tau temngel kum, ne balù tu kem hógów Dwata gu bè longit, gotu tenngel le mi se kul. ¹⁰ Lemwót bè yóm klolò me ke Krays, gel boluy kem dumu tau kum, tau nungel. Okóm kuy kun, hono tau temngón lemwót bè yóm kesesotu ye bè Krays. Gel mon le mò kum, tau laen dù genbek. Okóm kuy kun, wen genbek ye. Tey gel kehenê le kum, okóm fen gel nadat le yu kuy. ¹¹ Efet nim kmoen ni, sana tolo gel keglayam me bitil meeng. Ne laen kô hol nes me, lel le gel mfes kum yó kem dumu tau. Ne laen kô hol mdengen gónó me nô se kum. ¹² Tey gel kmò me nmò anì wen gónó me ma klowil me. Sok wen gel hemmulà kum, mom gel heni me lu bè Dwata. Sok wen gel hemsidek kum, tódô kem henbala me. ¹³ Sok wen semdekà kum, mom heyu gel balà me kul. Efet nim kmoen ni, yó kmò kehedem le kum, hol lómón ke tau laen dù muhen, lómón yóm fól gel bot le. ¹⁴ Sundu yó gónóhu smulat du ebélê ye nim ni ke mò gónóhu hemyak kuy. Là kô yó du. Okóm yó gónóhu smulat ebélê ye ni mò gónó ye dmalang abay se deng ngau yu ne, ne tey bong nawahu kuy. ¹⁵ Baluen ke sfolò libu tau gel tmóbóng kuy bè kehetahu ye, tek sotuhu yóm mà ye. Ou se yóm hol tanay tmulón du kuy yóm Tulón Heyu lemwót bè Dwata. Ne lemwót bè yóm deng kesesotu ye bè Krays Jisas, yó gónó ye menmà béléu. ¹⁶ Yó gónóm mon, hol dnalang ye yóm dou nmò. ¹⁷ Yó se gónóhu hógów ke Timuti edyó bélê ye anì hegtulónen bè nawa ye yóm kmò kekdolu bè nim lomi klowilu lemwót bè yóm deng kesesotu nawahu bè Krays Jisas. Duhen ni se yóm alì gel toloku bè yó kem tau hemtahu bè ket benwu gel lanu. Nim Timuti monu ni, lómón ke du yóm hol ngau dumuhu sogot nawa lemwót bè kehetahu me, ne tey teneb nawahen. ¹⁸ Deng wen se bélê ye hetunsalu. Ofo kuy mon du ke là bude mauy bélê ye. ¹⁹ Okóm ke mlan bè kun kóyô yóm gónó tekuy mogot, là legenen bud ton ye ou diyó. New e hnénég yóm kul kfasang yó kem tau alì hegmón bè yó. Hnénég tekuy ke tahu, duhen ke són bè udél le gónó le mfasang. ²⁰ Abay se bè yó kem tau nogot Dwata, là kô són bè udél du gónó le mfasang, bede tódô gfan bè nmò le. ²¹ Mahil du de nóyô ye bè yóm kógówu edyó? Naw e tnafak yu kô, duhen ke hegfanu yóm tey kehyu kmou bélê ye?