¹ Ne ni, kem dumuhu setwoli, bud nulitu bélê ye yóm Tulón Hyu, yóm tehe le hetngónu bélê ye. Yó se yóm tulón deng henmóyô ye, ne bè yó gónón lemwót yóm kbegel kehtahu ye nim kmoen ni. ² Bè ni sem Tulón Hyu deng hetngónu kuy gónó ye gewà gu lem hatay ke hol mbegel yóm kehtahu ye. Okóm ke hnuda ye, olon dô nô te kulit yóm kehtahu ye du bè kbuten. ³ Deng tehe toloku kuy se yóm tulón deng dou dnalang, yóm tulón alì bong muhen bè kdéen, duhen yóm katay Krays lanen mbô yó kem salà tekuy. Ni se yóm tehe hsulat Dwata ekni. ⁴ Deng tehe tulónu kuy snéen yóm kebeng le du, ne bè yóm getluhen kdaw bud hlowil Dwata. Bud ni se yóm tehe hsulaten ekni. ⁵ Bè yóm deng bud klowilen, nan gna hegfan bè Pitér, ominen yó bud hegfan bè yó kem sfolò lewu gel hógówen. ⁶ Ne kogolen bè yó, botong mukas limu latu tau hemtahu béléen segeng gónón hegfan bè yóm sotu kdaw. Tu kem tau tu, tey dê he tolo mowil bélê le ni kmoen ni, okóm wen se bélê le deng matay. ⁷ Kogolen bè yó, ominen hegfan bè Jim, ne ominen bud hegfan bè kdê yó kem gel hógówen. ⁸ Yó hol són gónón hegfan, duhen béléu. Bè yóm kehegfanen béléu yó, hol lómó kegnómu du, hol lómón ke ngae sut hosot. ⁹ Yakà ou du yóm alì glaan bè yó kem tau gel hógów Krays. Là kóen knóón béléu ke tnaba le o sotu bè yó kem gel hógówen, bà mon se yóm tey tehe alì gel kehsideku yó kem tau hemtahu bè Dwata. ¹⁰ Okóm yó gónóhu baling tau hógówen, tódô lemwót bè yóm tey nawa Dwata dou. Ne yóm nawahen dou yó, tey wen uléken. Bè ktahuhen, bè kdê yó kem dumu tau gel hógówen, là kô gesenged le du se yóm dou kteneb mò nmò bè Jisas. Okóm là kóen na a lemwót bè dou kgis yóm kmou du, tódô lemwót bè yóm któbóng Dwata dou. ¹¹ Duhen yó, baluen ke ou yóm tehe tmolok kuy, duhen ke lu, laen dù gónón stólóng se yóm gel hetngón me kuy. Duhen yó se yóm deng hentahu ye. ¹² Bede deng hónô tolok me kuy se yóm deng klowil Dwata ke Krays, okóm moen se ke wen bélê ye hemkéng du yóm angat bud klowil Dwata yó kem tau deng matay? ¹³ Ke tahu se yóm mon le yó, ilóem là kô deng hlowil Dwata ke Krays. ¹⁴ Ne ke là deng hlowilen ke Krays, laen kô lemen yóm deng tolok me kuy, ne laen dù nefeten yóm kehtahu ye du. ¹⁵ Là olohen yó du, ilóem dô hono kéng yóm gel tolok me kuy lemwót bè Dwata, abay se gel mon me deng hlowil Dwata yóm Krays. Okóm ke tahu se yóm gel mon le yó yóm là klowil Dwata du yó kem tau matay, ilóem là deng hlowilen ke Krays he kun. ¹⁶ Ke là hlowil Dwata yó kem tau matay, là kô deng hlowilen ke Krays snéen kun. ¹⁷ Ne ke là dengen mowil Krays, laen se kô nefeten yóm kehtahu ye béléen, ne sana tolo kbô ye du he yó kem salà ye. ¹⁸ Ne ke là dengen mowil Krays, kdê yó kem tau hemtahu deng gna matay, laen kô dù lan le gewà gu lem hatay dilóu. ¹⁹ Ke olon bè nim klowil tekuy te tonok ni yóm hendón nefet nawa tekuy bè Krays, olo tekuy tau alì megkodu bè kdéen tau. ²⁰ Okóm bè yóm hol ktahuhen, deng tódô hlowil Dwata Krays. Bè yóm deng klowilen du yó, yó se mò ilô yóm kdohò yóm angat klowil Dwata kul yó kem tau deng matay. ²¹ Lemwót bè kun nmò yóm sotu tau ekni, yó gónón matay kdéen tau. Bud lemwót bè kun nmò yóm sotuhen, yó gónón mowil kdéen tau. ²² Laen dù tau ke là matayen lemwót bè yóm kesfu le gu bè Adam. Ne bud lemwót bè yóm deng kessotu le bè Krays, angat gónó le bud mowil se kul. ²³ Okóm deng mdengen ne butengen yóm angat klowil Dwata kul. Yó hol tanay hlowilen, duhen Krays. Ne bè yóm kdaw kesfulék Krays edini, yó he klowil Dwata yó kem tau deng nfun Krays. ²⁴ Ominen yó he sut yóm hol són kdaw. Bè yóm kdaw yó, angat nmò Krays sónen yóm kdê deng tehe htulus Seitan, duhen yóm dê deng hfogoten, ne yó kem dumu wen kwalis le ne wen kfasang le. Bè yóm angat kegesón le yó, omin Jisas hogot du ke Dwata, yóm Maen, yóm kdê tau nogoten. ²⁵ Bede là tagad nmoen du he yóm yó ke là nan na gotu ndà kul elaan yó kem hmohon du. ²⁶ Ne yó hol són hohon angat ndà Krays, duhen yóm hatay. ²⁷ Deng tulónen bè Sulat Dwata se yóm khogot Dwata du ke Krays yóm kentihen. m Okóm tódô tngón tekuy se là gomongen lemen Dwata bè yóm kentihen monen yó, abay se ke Dwata kun, du se yóm tehe hogot du ke Krays yóm kentihen. ²⁸ Sok deng gotu hogot Dwata ke Krays yóm kdéen, bud lemwót se ke Krays kun, tódô bud hogoten ke Maen yóm kun klowil, yakà Dwata tehe hogot du du yóm kentihen, ne Dwata se hol mogot du yóm klamangen. ²⁹ Ne ke henkéng le yóm bud kehlowil Dwata yó kem tau deng matay, moen de ke gel wen bélê ye bud hbabtays mò leyu lówó yó kem tau tehe matay? Tedu se nefeten yóm nmò le yó ke là bud hlowil Dwata kul yó kem tau deng matay? ³⁰ Ne bélê me kum, ke là se tahuhen yóm angat bud kehlowil Dwata kem tau, tedu se muhen yóm alì kehbala me du yóm tendo gel kehsidek le kum ket kdaw? ³¹ Béléu dou, kem dumuhu setwoli, wen se tendo móló hmatay dou ket kdaw. Yó gónóhu tmulón du kuy nim ni lemwót bè yóm tey kligalu bè yóm deng kessotu tekuy bè Krays Jisas, yóm gónó tekuy mogot. ³² Deng tey keglayamu bè nim knóu bè Ifisus. Yó kem tau hmohon dou bè ni, hol lómón tô le knawa ógóf lóbô gu lem bnes. Tedu muhu alì hbala bè ni du ke là se angat bud hlowil Dwata do hulin kdaw? Ke là se angat bud hlowil Dwata dou, mom hyu ke tódô lolou yóm gel mon dumu tau, yóm gel mon le, “Eles tnana kuy hol segwas mken ne minum, déke matay tekuy kehaya.” n ³³ Hol bê ye abay hegtondo. Bong tahu se yóm sotu gel mon le, “Ke segbóti bè yó kem tau mò sidek, tódô lana béléem yóm kehyu kmoem.” ³⁴ Hol nulék nawa ye dé yóm hyu deng dnalang ye, ne hol tenflok ye yóm kmò ye sidek. Tódô tulónu kuy, tolo wen he bélê ye yóm là deng temngón ke Dwata. Là kenyak ye du kô yó? ³⁵ Déke wen sotu bélê ye tô smólók du, “Mò kmò klowil Dwata du yóm tau ke deng matay? Mò kmò angat klówó le du?” ³⁶ Tey tau là hulung hedem yóm smólók yó. Henkna ye bè yó dém lem hulu gel hulu ye. Ke là dengen bolok klofuten, là kóen tagad sut he towoken. ³⁷ Bè yóm lem hulu gel hulu ye, kihu ke halay duhen ke wen kem dumu gel hulu ye, tey bong gónón stólóng yóm lemen bè yóm angat towoken. ³⁸ Okóm deng eles tngón Dwata ne yóm angat gónón e hembaling du yóm lem hulu yó. Sal stólóng se gónón e hembaling du yóm ket kay lem hulu. ³⁹ Ne yóm kdê mowil te tonok, sal stólóng kay unged le. Tólóng unged tau, ne tólóng se kul unged kem ógóf. Tólóng se kul unged kem onuk koyu, ne yó kem utón él, bud tólóng se kul. ⁴⁰ Ne wen yóm nmò Dwata nô bè longit, ne wen se nmoen hnóen talak tonok. Sal stólóng se ktiloben yóm gel ton tekuy bè longit ne yó kem gel ton tekuy gu te tonok. ⁴¹ Yóm kdaw, tólóng se kun ktilob, ne tólóng se kun ktilob yóm bulón, ne bud tólóng se kul yó kem blotik. Bà yóm tey kwadag yó kem blotik, sal stólóng yóm kul ktilob. ⁴² Senged se bè yóm angat kehlowil Dwata yó kem tau deng matay. Sal gel matay se nim lówó tekuy ni, ne omin le lembeng du. Là yó dum lówó tekuy sok angat bud hlowil Dwata, là kóen na a bud matay. ⁴³ Bè kebeng le lówó yóm tau matay, là buden hyu ne mton du, ne laen kô dù bud kgisen. Okóm bè yóm angat bud kehlowil Dwata du, deng baling tilob ne mton du, ne tey baling kemgis. ⁴⁴ Yóm lówóhen lebeng le yó, olon tódô geblà bè yóm klowilen talak tonok. Okóm yóm lówóhen bè yóm angat klowil Dwata du, hol lówó knóón bè yóm klowilen bè longit, là kóen bud matay ne. Ke wen se lówó tau knóón bè yóm klowilen talak tonok, là kô gbeken du ke là bud wen se lówóhen knóón bè yóm klowilen bè longit. ⁴⁵ Monen bè Sulat Dwata, “Yóm tanay tau boluyen Adam, nyuf Dwata lem baken, ominen yó he baling mowil.” o Okóm ke Krays kun, yóm niba le hol són Adam, du se fen bemlay tekuy yóm klowil laen dù tul sónen. ⁴⁶ Là kô gna guta tekuy du se yóm klowil knóón bè longit. Kaem klowil talak tonok se yóm gna guta tekuy, omin tekuy yó gmuta du yóm klowil knóón bè longit. ⁴⁷ Yóm tanay Adam, tau tonok, abay se nifil Dwata lemwót bè tonok. Okóm yóm sotu Adam, lemwót gu bè longit. ⁴⁸ Kdéen tau te tonok, hono mkél bè yóm tau tehe lemwót gu bè tonok. Senged se yóm kdéen tau angat nô bè longit, angat le mkél bè yóm tehe lemwót gu bè longit snéen. ⁴⁹ Yóm kkél tekuy bè lówó yóm tau tonok, lómón yó se angat bud kkél tekuy bè kun lówó yóm tau lemwót gu bè longit. ⁵⁰ Yó hol nefeten nim tulónu kuy ni, kem dumuhu setwoli, nim lówó tekuy ni, wen ungeden ne wen litóen, là kóen na a angat gmung ebè yóm benwu nogot Dwata. Angat matay se kun, là kô gfunen du yóm klowil laen dù sónen. ⁵¹ a ⁵² Ngem wen tulónu kuy yóm là deng tehe heglileb Dwata du he. Bè yóm angat kesfulék Krays edini, angat wen se bélê tekuy yóm là dengen matay he. Okóm ke sok gungol tekuy yóm uni féw gu bè longit, là kô sudofem du yóm sana kesfili Dwata du yóm lówó tekuy. Sok muni féw gu bè longit, kdê yó kem deng matay, angat gotu hlowil Dwata lu, ne là kô le na a bud matay ne. Kaem tódô gotu megetles ne lówó tekuy. ⁵³ Nim lówó tekuy ni, wen sónen, bede angat tódô bud tles Dwata du yóm lówó laen dù tul sónen. Mahil matay nim lówó tekuy ni, bede angat bud tles Dwata du yóm lówó là buden matay. ⁵⁴ Sok deng senfili Dwata tekuy, ne deng benlayen tekuy yóm lomi lówó là buden matay, yó se gónón e dohò yóm deng monen bè Sulat Dwata, yóm monen, “Laen kô dù bud hatay ne, abay se deng nmò Dwata sónen. p ⁵⁵ Laen kô dù bud gmoen ne yóm hatay. Là kô bud knikò tekuy du ne.” q ⁵⁶ Yó gónón wen kfasangen bélê tekuy yóm hatay lemwót bè salà. Ne yó gónón wen kfasangen yóm salà lanen wen yóm hlau Dwata. ⁵⁷ Okóm hol dóyón tekuy Dwata, abay se deng wen yóm lan nmoen hlanen bè yóm gónó tekuy mogot Jisas Krays, mò gónó tekuy matù bè salà ne hatay. ⁵⁸ Yó gónóm mon, kem dumuhu sogot nawa, hol hbegel ye dé kehtahu ye, bê ye abay hili nawa ye. Bê ye abay senkó mò du yóm hmoen kuy yóm gónó tekuy mogot, abay se deng hónô tngón ye, kdéen nmò tekuy bè yóm gónó tekuy mogot tey wen uléken.