¹ Duhen yó, hol dnalang tekuy dé yóm kesbong nawa. Hol sen- galu tekuy snéen yóm dumu kenhulung blayen tekuy yóm Tulus Dwata, sélétem mon yóm khulung tmugod ke Dwata. ² Yóm tau tódô hulung mudél ebè Dwata bè yóm tólóng udél là deng kun tngón du, són bè Dwata gónón e mudél, là ebè dumu tau du, abay se là kô wen dumu tau temngón du yóm udélen. Tódô hudél yóm Tulus Dwata, bede gbuni yóm lanen. ³ Okóm tólóng kun yóm tau gel tmugod yóm udél Dwata, abay se tódô mudél ebè kem dumuhen tau. Bong wen gónón tmóbóng kul, ne wen gónón gemduf kul, ne bud wen gónón hemyu nawa le snéen. ⁴ Yóm tau tódô mudél ebè Dwata bè yóm tólóng udél, kaem olon yóm kun knô tnóbóngen. Okóm yóm tau gel tmugod yóm udél Dwata, gotu tnóbóngen yó kem dumuhen hemtahu. ⁵ Hyu nawahu se ke gotu ye hulung mudél ebè Dwata bè yóm tólóng udél. Okóm milud he kehyuhen ke kdê ye gotu hulung tmugod yóm udél Dwata. Tey bong muhen kun yóm tau hulung tmugod yóm udél Dwata senta yóm tau tódô hulung mudél ebè Dwata bè yóm tólóng udél. Song gónón hyu ke wen fen hulung bud tmugod du bè kem dumun tau hemtahu yóm lanen yóm udélen anì wen gónón tmóbóng kul. ⁶ Duhen yó, kem dumuhu setwoli, tô gónóhu tmóbóng kuy du ke kóle lem blóng ye, ke són yó udélu ebélê ye, són yóm udél là tngón ye du? Laen kô dù muhen. Okóm wen gónóhu tmóbóng kuy ke wen tulónu kuy lemwót bè yóm deng hegfan Dwata béléu, duhen ke wen hetngónen dou, duhen ke wen heglileben dou, duhen ke wen dumu toloku kuy. ⁷ Sotu gónóhu e hmingón du yóm tau gel mudél bè tólóng udél, lómón ke yóm tau smoli duhen ke yóm tau hemglung. Ke là hulungen mutóm du, là kóen gembaling. ⁸ Ne ke wen tau mogul taba bè blówón ne ke là mtukul yóm unihen, là kóen na a sut yóm tau tnabahen. ⁹ Hol lómón ni se ke wen bélê ye tódô mudél ebè Dwata bè tólóng udél là tngón kem dumu tau du lanen. Ke laen dù temngón du, tedu se muhen bélê le du? Olon tódô beyen mudél hkawang yóm tau yó. ¹⁰ Tey dê se kay udél tau nô lem benwu, ne ket kay udél sal gotu wen lan le. ¹¹ Okóm ke stulón béléu yóm tau là tngónu du udélen, hol lómón ke tau milo kegnómu du yóm tau yó, là setngón me. ¹² Bélê ye se kuy, ke yó hol kóyô ye ke wen kenhulung blayen kuy yóm Tulus Dwata, yake hol sen-galu ye dé yóm kenhulung mò gónó ye tmóbóng kem dumu ye bè kehtahu le. ¹³ Duhen yó, ke wen tódô hulung mudél ebè Dwata bè tólóng udél, yake hol mni bè Dwata anì wen khulungen tmugod du lanen yóm udélen yó. ¹⁴ Ke mnihe bè Dwata bè yóm tólóng udél yó, là kóen lemwót lem hendemu, olo tódô hmonen dou yóm Tulus Dwata. ¹⁵ Tô kmou du se nim ni? Yó kmou du, tódóe mni bè Dwata bè yóm tólóng udél mlan bè Tulusen, ne mnihe snéen mlan bè yóm kehedemu du. Senged se bè kesngalu, semngale bè yóm tólóng udél mlan bè Tulusen, ne semngale snéen mlan bè yóm kehedemu du. ¹⁶ Ke dóyón tekuy Dwata bè tólóng udél, là kô hen-el le du yó kem dumu tau mung bè yó ke là tngón le du lanen. ¹⁷ Ya mo kehyuhen du yóm kdóyón tekuy ke Dwata, okóm laen dù lan tekuy gemtóbóng kem dumu tekuy tau. ¹⁸ Béléu dou, tey kdóyónu ke Dwata, abay se deng blayen dou yóm khulung tódô mudél ebéléen bè yóm tólóng udél. Do kegnóm du, ou he matù bélê ye bè yóm kenhulung yó. ¹⁹ Ewenem yó, bè yóm gel ksimba tekuy, mom hyu he ke tek limu udélu ebélê ye bè yóm ktoloku kuy, syan ke tngón ye lanen. Hyu yó senta yóm hilu libu udélu bè yóm udél là tngón ye du lanen. ²⁰ Bè ni kem tulónu kuy ni koni, kem dumuhu setwoli, bê ye abay heskél yóm kuy kehedem bè knawa ngà. Yó dé dnalang ye bélê le yóm là khulung le matul mò du yóm sidek. Okóm bè yóm kmò kehedem ye du nim toloku kuy ni, yake kehedem tau tmuha dé kehedem ye du. ²¹ Wen tehe hsulat yóm gónó tekuy mogot gbak ebè yó kem tauhen là mimón du, yó monen, “Angate bud mudél ebè yó kem dou tau, bede hlanu bè tólóng udél. Angate bud mudél ebélê le, bede hlanu bè udél yó kem tólóng tau. Baluen ke lómón yó yóm nmou bélê le, là kô na le e hdon dou yó kem dou tau.” l ²² Yó gónóm mon, yóm tódô khulung mudél ebè Dwata bè tólóng udél, yó muhen mò ilô yóm ktafak Dwata yó kem tau là hemtahuhen, là kul yó du kem tau deng hemtahu. Okóm yóm khulung tmugod yóm udél Dwata, yó muhen mò ilô yóm któbóng Dwata yó kem tau hemtahu, là kul yó du kem tau là hemtahuhen. ²³ Duhen yó, ke wen tau là hemtahuhen mung smimba bélê ye, ke són yó udél ye yóm kdê ye, són yóm udél là tngón le du, ngem kà mon le du lengel mata ye. ²⁴ Okóm ke tódô kdê ye wen udél tugod ye gu bè Dwata bè yóm kmungen bélê ye yóm tau là dengen hemtahu, ngem lemwót bè yóm deng gungolen bélê ye, kaem tódô dilóen yóm kun kegsalà bè Dwata se kun, ne yóm angat ktafak Dwata du. ²⁵ Ne angat gotu benkasen lem blóng ye yóm kun kehedem tehe gel bunihen bè tau, ne angat tódô hegluduk, ne dóyónen Dwata, yó udélen, “Tahu nô lem blóng ye bè ni Dwata.” ²⁶ Duhen ni, kem dumuhu setwoli, bè yóm gel ksimba ye, hyu ke wen se bélê ye fen semngal, ne wen se fen tmolok bélê ye, ne wen se tmulón du yóm deng hetngón Dwata du, ne wen se fen mudél ebè Dwata bè yóm tólóng udél, ne wen se bélê ye fen tmugod du yóm udélen yó koni. Bè ket yóm nmò ye bè yóm kestifun ye yó, yake són nmò ye yóm mò gónó ye tmóbóng kem dumu ye bè kehtahu le. ²⁷ Ke wen tau tô móyô mudél ebè Dwata bè tólóng udél, yake olon lewu tau duhen ke tlu fen mò du, geblaen ne. Ne gel le stufì, ne wen mdengen tmugod du bélê le snéen. ²⁸ Okóm ke laen dù tau bè yó gembek tmugod du yóm udél le, hol béen abay nmò. Hyu ke olon tódô mon du bè nawahen anì tek le lewu Dwata temngón du. ²⁹ Ke wen tau tmugod yóm udél Dwata lem blóng ye, yake olon lewu duhen ke tlu tau. Ne kdéen tau hmungol du ne fen hemklol du yóm tulón le ke tahu duhen ke là. ³⁰ Okóm ke wen hetngón Dwata yóm sotu tau myón bè yó mò tulónen bè yó kem dumu tau, yake nan tenflok mudél yóm tau gna mudél. ³¹ Tódô ye gotu stufì bè yóm ktolok ye anì kdéen tau mung bè yó, gotu wen dnalang le se kul, ne gotu baling kinì nawa le bè kehtahu le. ³² Ke wen tau mudél lemwót bè yóm htugod Dwata du, gbeken na hlun temflok du yóm kun udél. ³³ Abay se là kô nóyô Dwata du yóm mudél seblang sok tekuy stifun. Hyu ke na tekuy gel stufì sok kuy mudél anì menek kegnóm tekuy du. Wen sotu gel hlolò me bè yó kem tau hemtahu bè Dwata bè yó kem dumu benwu gbak ebè yó kem libun. ³⁴ Bè yóm gel ksimba ye, là hyuhen ke lu fen gel mudél. Deng tulónen bè hlau yó kem Ju là hyuhen ke libun fen malak kem logi. ³⁵ Ke wen tô snólók le, bê le tagad snólók bè yó. Snólók le bè tuha logi le he ke deng le kól bè gónô le. Là kóen knóón bè libun ke du mudél bè yóm gel kestifun ye. ³⁶ Okóm bélê ye kuy du, ilóu ofo kuy mon du kô ke yu gónón gu lemwót yóm Udél Dwata? Duhen ke olon bélê ye gónón e gdek? Là kô yó du. ³⁷ Ke wen bélê ye bè yó hendemen du sotu tau hógów Dwata, duhen ke deng wen kenhulungen lemwót bè Tulus Dwata, kaem dilóen nim snulatu ni hono lemwót bè hlau yóm gónó tekuy mogot. ³⁸ Okóm ke snonolen nim tulónu ni, bud snonol ye snéen yóm kun tulón. ³⁹ Duhen ni, kem dumuhu setwoli, hol ktes ye dé yóm khulung tmugod yóm udél Dwata, okóm bê ye kenbê se ke wen tau tódô mudél ebè Dwata bè yóm tólóng udél. ⁴⁰  Bede bè yóm kdê nmò ye bè yóm gel ksimba ye, hentilob ye mò du anì gdilô yóm kessadat ye.