¹ Deng wen tehe snólók ye bè yóm ksulat ye bè keblay ye bè yó kem kun tau Dwata bè prubinsya Judiya. Yó kmò ye du, yake tódô lolò ye yóm deng hlolou yó kem dumu ye hemtahu bè prubinsya Glasya. ² Tódô ket Akad ye eles hetfing du yóm kuy gbek blay, yóm ket kuy na sotu, lemwót bè yóm filak gel guta ye. Eles sentifun ye anì là tlek bud snólóku du soke kól dyó. ³ Eles ye mélék tau mò gónóhu angat hemwit du ebè Jirusalim yó kem blay ye yó. Soke kól dyó, angat henwitu lu sulat he anì tngón kem tau bè Jirusalim yóm nógów le. ⁴ Ke wen se muhen béléu, mógówe se dou, ne tódô le mung dou he yó. ⁵ Naw na gna mlan gu lem prubinsya Masdunya he, ominu hlós edyó bélê ye, abay se là gbeku du ke là mlane bè yó. ⁶ Naw dô malù legen bélê ye soke mógów edyó, déke gesmangu yó kem bulón tnaw. ⁷ Bè yóm bud kewótu bè yó, déke wen ne gónó ye gemtóbóng dou balù kihu gónóhu e hlós.  Là kóyóu du ke olohu likót gdóng ke mógówe edyó. Ke kun kóyô yóm gónó tekuy mogot, hyu ke malù legen yóm knóu bélê ye. ⁸ Naw na nô bè ni bè Ifisus efet kdeng yóm mò ken bong boluyen Pintikus, ominu mógów edyó. ⁹ Tey dê tau bè ni móyô hmungol du yóm udél Dwata, ne tey wen gónón e kól yóm knóu bélê le, balù yóm tey dê tau tô hemseng du yóm nmou. ^{12 10} Kesok slob bélê ye Timuti, hol hnódó ye, abay se mò nmò bè yóm gónó tekuy mogot se nim tau ni lómón yóm dou gel nmò. ¹¹ Hol nadat ye se kun. Sok mulék gu dyó bélê ye, hol hninggel ye sen hewót du anì bud gefet béléu dini. Yakà tendo nangatu du, mung du yó kem dumu tau hemtahu. Bong ke Apulus kun, yóm sotu dumu tekuy hemtahu, tey tô kubugu du anì mauy bélê ye dyó. Kóyóu ke tô mung bè yó kem dumu tekuy hemtahu gel mauy dyó, okóm tolo là maan nawahen mò du he. Wen kdawen he kun angat mauy kuy. ¹³ Hol ye tendo eles temgama. Hol hbegel ye kehtahu ye. Bê ye hegdolol nawa ye, hol ye setgel. ¹⁴ Bè kdê yóm gel nmò ye, hol hlan ye bè yóm kesbong ye nawa. ¹⁵ Deng tngón ye ne yóm Stifanas ne yó kem fes lówóhen, lu se hol tanay tau hemtahu bè prubinsya Akiya. Ne ni kmoen ni sónmò le tmóbóng yó kem kun tau Dwata. ¹⁶ Hol kóyóu bélê ye, kem dumuhu setwoli, ke tendo ye galak bè yó kem tau lómón le Stifanas mò kmò le, dalang se yó kem dumu tau gel tmóbóng kul. ¹⁷ Tey kehyu nawahu bè yóm keston me le Stifanas ne Fortunatus ne Akaykus yóm kkól le bè ni. Botong klifótu yóm tô keblat nawahu lanu là géhél ston kuy. ¹⁸ Tey kehefligal le dou lómón yóm gel kehefligal le kuy. Hol gel nadat ye yó kem tau lómón ni mò kmò le. ¹⁹ Gel nólóm le yu se kuy yó kem dumu ye hemtahu bè prubinsya Asya. Bud Akila lewu le Prisila ne yó kem tau hemtahu gel stifun bè gónô le, tey gel kólóm le kuy se kul. ²⁰ Dalang se yó kem dumu ye hemtahu bè ni bè Ifisus, tey gel kólóm le kuy. Sok ye gel stifun yóm kdê ye bè yó, hol ye gel sfódó. ²¹ Hol dou tdok smulat du nim monu mò kuy ni, “Ou Pol yóm tendo gel mólóm kuy.” ²² Yóm tau là kembong nawa du yóm gónó tekuy mogot, yake hol megtafak. Marana ta. Yó lanen, “Ó Gónó Mogot, géhéli bud semfulék ne.” ²³ Yó hem gónó tekuy mogot Jisas hol semflós tmóbóng kuy. ²⁴ Tey kbong nawahu kuy, yóm kdê ye bè yó hemtahu bè Krays Jisas.