¹ Duhen ni, wen helolou kuy, ou se yóm tau deng geblanggù lanu mò du yóm hmoen dou yóm gónó tekuy mogot. Bê kwit ye ktau ye, hol nmò ye sen yóm nemò seklóón ebè yó kem tau deng tenaba Dwata. ² Hol dnalang ye dé yóm keheglaan ne yóm keganag nawa ne yóm kehanay nawa. Hol hegfan ye yóm kesbong ye nawa bè yóm gel kessadat ye. ³ Hotu ye gel ye anì laen dù sembeweg du yóm kesesotu nawa deng blayen kuy yóm Tulus Dwata. Hol tendo nemò ye sen yóm gónón wen kenek nawa ye. ⁴ Tekuy kem tau hemtahu, hol lómón ke deng sesotu lówó tekuy. Tek sotu senéen yóm Tulus Dwata. Ne tek sotu se yóm hol hendón nefet nawa tekuy, duhen yóm deng taba Dwata tekuy. ⁵ Tek sotu se yóm gónó tekuy mogot, ne tek sotu yóm hentahu tekuy, ne tek sotu se yóm gónó tekuy hbabtays. ⁶ Tek sotu se yóm Dwata, yóm hol Mà yóm kdéen tau hemtahu, ne béléen se gónó tekuy mogot. Sal gel wen hmoen kut yóm kdê tekuy, ne bélê tekuy se hol gónóhen nô. ⁷ Yóm kdê tekuy, sal wen kenhulung blay Krays tekuy yóm ket tekuy na sotu. Yóm blayen tekuy yó, tódô lemwót bè yóm kun kóyô bélê tekuy. ⁸ Lómón yóm tehe monen bè Sulat Dwata, yóm monen, “Bè yóm tehe kehawayen etta bè yóm gónón hol geta, gotu nwiten yó kem tey tau wen negefen. Ne bè yó kem kun tau, wen kenhulung blayen kul.” c ⁹ Na, tedu se koni hol lanen yóm monen “haway etta” yó? Yó lanen, deng tehe lemwót gu tta ne mógów edini talak tonok. ¹⁰ Ne yóm tehe lemwót gu tta, bud du se yóm bud haway etta bè tum hol gónón geta sentu longit. Yó gónóm mon, tódô klamangen ne gónóhen nô. ¹¹ Bud du se koni gónón e gbak yóm tulón le yóm “kwen kenhulung blayen bè yó kem tauhen.” Wen se kem tau néléken mò aposol. Ne tólóng se tau néléken mò tugoden. Tólóng se gel hógówen mò tmolok bè yó kem tau là dengen hemtahu he. Bud tólóng se tau néléken mò malak yó kem tau hemtahu ne mò fen gel tmolok kul. ¹² Yó gónó Krays mò du nim ni anì kdê tekuy kem tau Dwata, gbek tekuy mò du yóm hmoen kut, ne anì sónmoen temnù yóm kehetahu tekuy yóm kdê tekuy deng baling kun lówó Krays. ¹³ Yó hol nefeten nim ni, baling tekuy sesotu bè yóm kehetahu tekuy ne bè yóm ketengón tekuy du yóm Ngà Dwata. Ngangen ne efet tekuy baling gulit, efet gsenged tekuy yóm hol kun kmò Krays. ¹⁴ Ke deng tekuy gulit, là bud tekuy mkél bè knawa ngà ne, gel le mahil gemung. Lemwót bè kegulit tekuy, là mahil tekuy gmung bè yó kem tau tmolok keng. Gel nit le hetlas yó kem tau lemwót bè yóm kehulung le smukat. ¹⁵ Okóm tólóng se bélê tekuy. Lemwót bè yóm kesbong tekuy nawa, yake hol tulón tekuy yóm ktahuhen. Ngangen efet gulit tekuy yóm kun kmò knawa Krays, yóm gónó tekuy kmulu. ¹⁶ Lemwót bè yóm kalaken tekuy yóm kdê tekuy mò lówóhen, yó se gónón hol ssotu nawa tekuy mò du yóm kun nmò. Ne hlós baling setgel yóm lówóhen lemwót bè yóm kestóbóng tekuy. Ke tilob kmò tekuy du yóm hmoen tekuy yóm ket tekuy na sotu, tendo lemnok yóm lówóhen yó, ne baling mbegel lemwót bè yóm kesbong tekuy nawa. ¹⁷ Ni eles hetegamahu kuy hlanu bè boluy yóm gónó tekuy mogot. Bê ye abay bud nmò yóm kul gel nemò yó kem tau là tengón le ke Dwata. Yóm kul kehedem yó, laen kô gónón e kól. ¹⁸ Tódô kmifu lem hendem le. Laen kô dù kul du yóm lomi klowil deng blay Dwata. Là kô tngón le du yóm ketahuhen, abay se deng hegel le kulu le. ¹⁹ Là kô wen yak le mò du yóm sidek. Tódô henlel le mò du yó kem dê ukô le. Là kô bud wen afasen yóm kul knóyô lówó. ²⁰ Okóm kuy, là kô yó du yóm deng dnalang ye lemwót bè kun kmò Krays. ²¹ Deng gel gungol ye yóm kun kemò, ne lemwót bè yóm deng klolò ye du, deng tolok le kuy yóm hol ktahuhen lemwót bè Jisas. ²² Yó gónóm mon, hol kó ye dé yóm gena nemò ye teganay, yóm gel mit kuy mò sidek. Yóm nemò ye yó, tenondo ye du, mom hensideken knô ye. ²³ Heflomi ye ke Dwata dé yóm knawa ye ne yóm kmò kehedem ye. ²⁴ Hol nmò ye dé yóm nmò segetón bè yóm lomi klowil ye, yóm klowil hesekél Dwata bè yóm kun kmò. Yó gónón gefan yóm lomi klowil ye, duhen yóm ktedeng nawa ye ne yóm klaen dù belenen sidek yóm gel nmò ye. ²⁵ Duhen yó, hol bê tekuy abay bud mò kéng sen. Tódô gel tulón tekuy yóm ketahuhen bè kem dumu tekuy hemtahu, d abay se deng kuy sesotu bè kun lówó Krays. ²⁶ Ke wen lenbut ye, ten‑gama ye anì là gwiten kuy mò salà. e Bê ye hekól bè kesdef kdaw yóm kebut ye, ²⁷ déke yó sotu lan Seitan ebélê ye. ²⁸ Yóm tau tehe gel mnagaw, hol tenfloken yóm kenagawen yó, béen bud nemò. Tódô hol heteneb mò nmò dé anì wen gónón ma klowilen, ne anì wen lukasen mò blayen bè yó kem tau élél. ²⁹ Béen sidek kbak tekuy. Són yó dé olo mon tekuy yóm heyu, són yóm udél wen gónón gemtóbóng kem dumu tekuy, yóm udél hol gemduf kul, mò gónó le dmalang. Yó dé olo benkó tekuy yóm udél wen muhen bè yó kem tau hemungol tekuy. ³⁰ Bê tekuy nemò gónón blat nawa yóm Tulus Dwata. Yó gónó Dwata hemnô du bélê tekuy yóm Tulusen mò ilô yóm kefunen tekuy, ne yóm kedohò yóm kehewaen tekuy elem hulin kdaw. ³¹ Gotu kó ye yóm kesidek knawa ye bè kem dumu ye, ne yóm sidek knóyô lówó, ne yóm ksukeg nawa. Hol bê ye abay bud gel sefetê ne semdekà. Kó ye lem hendem ye yóm kesesutó nawa. ³² Yó tles nemò ye dé yóm kehyu kmò ye ebè kem dumu ye, ne yóm keskodu ye. Hol ye gel mahil seflifót, lómón yóm tehe kehlifót Dwata yóm kuy salà hlanen bè Krays.