¹ Yó gónóm mon, tey gel knihu bélê ye bè Dwata. Ou se Pol, yóm tau gebelanggù lanu gel lemolò ke Krays Jisas, ne lanu gel temolok lem belóng ye yu kem tau là Ju le. ² Déke deng gungol ye ne yóm deng ksigang Dwata du tahu nim nmò ni mò gónóhen tmóbóng kuy. ³ Deng hegefan Dwata béléu ne nim atul tehe bunihen bè kem tau gnan ekni, ne deng hol hetengonen béléu se. Ni se koni yóm deng snulatu, bede là tahaen. ⁴ Ke senfala ye, tngón ye snéen kuy yóm deng tengonu gbak ebè Krays, yóm tehe buni Dwata teganay. ⁵ Tehe yu ekni, là kô tngón kem tau gnan du yóm bunihen yó. Okóm nim kmoen ni, deng hegefan Dwata bè yó kem aposol ne bè yó kem tau gel tugoden, hlanen bè Tulusen. ⁶ Ni se hol lemen yóm tehe bunihen yó, duhen yóm kehelan Dwata du bè yóm Tulón Heyu yóm kehomongen kuy yu kem tau là Juhen bè yó kem heyu blayen bè yó kem Ju. Deng ye tahu baling kun fes lówó Dwata snéen kuy, ne wen kuy du snéen yóm tehe fasad Dwata bè yó kem Ju helanen bè Krays Jisas. ⁷ Béléu do, deng henbaling Dwata ou sotu tóbóng lówóhen mò mit yóm Tulón Heyu. Lemwót bè yóm kenhulung blayen dou, yó gónón smigang du tahu yóm Tulón Heyu monu ni koni, helanen bè yóm tey kefasangen béléu. ⁸ Ou se yóm hol glaan bè yóm kdéen tau Dwata, okóm deng mem sigang Dwata tahu nim tey heyu hmoen dou ni, duhen yóm kwitu du elem belóng yó kem tau là Ju le. Yó hol lemen nim Tulón Heyu ni, duhen yóm tey keheyuhen yóm tóbóng Krays, yóm keheyu là gbek tekuy hmingón du. ⁹ Bud sigangen tahu senéen yóm kmò kwit Dwata du yóm tehe atul bunihen teganay. Deng tehe bunihen nim ni lemwót bè hol kbuten, yó se kun kmò kehlan du Dwata, yóm tehe dmimun yóm kentihen. ¹⁰ Okóm ni kmoen ni, hegfanen yóm tehe bunihen, helanen bè yó kem tau hemtahu bè Krays, anì hol gfan bè kedéen mfasang wen glalen ditu bè longit yóm tey kehulungen hedem Dwata bè kdê nmoen. ¹¹ Yóm nmò Dwata yó, deng eles hendemen ne ekni lemwót bè hol tekang kebuten, ne tódô hlanen bè yóm gónó tekuy mogot Krays Jisas. ¹² Lemwót bè yóm deng kesesotu tekuy bè Krays ne bè yóm kehetahu tekuy béléen, là bud tekuy likò ne hloni ebè Dwata ni kmoen ni, deng tey megel nawa tekuy du ne yóm ketóbóngen tekuy. ¹³ Duhen yó, hol bê ye mem kenblat nawa nim fen keglayamu bélê ye ni. Hono bè kuy keheyu se ni kem ni. ¹⁴ Duhen yó, botonge metud bukol bè solu yóm Mà tekuy. ¹⁵ Du se gónó le menmà yóm kdéen tau hemtahu deng nô bè longit dalang se yó kem tolo nô te tonok. ¹⁶ Lemwót bè yóm tey kegbek Dwata tmóbóng tekuy, yó hol hnihu béléen anì tendo ten‑gelen nawa ye hlanen bè kun kfasang yóm kun Tulus deng nô bélê ye. ¹⁷ Ne sotu hnihu anì hol tendo nô bélê ye Krays lemwót bè yóm ksalig ye béléen. Bud hnihu snéen anì hol mbegel kdolilen yóm ketngón ye du yóm tey kbong nawa Dwata, ¹⁸ anì hol glileb ye snéen yóm kbong nawa Krays tekuy yóm kdê tekuy kem kun tau Dwata. Yóm nawahen tekuy yó, udì tonok ne longit. ¹⁹ Kóyóu ke hol gnóm ye yóm tey kbong nawahen kuy. Ewenem yóm nawahen tekuy yó, là kô hol glileb tekuy du yóm mò kmoen. Ke deng tahu gnóm tekuy nim ni, hol lómón ke deng tekuy skél bè yóm kun kmò Dwata. ²⁰ Duhen yó, hol gel dóyón tekuy dé Dwata, lemwót bè yóm alì kegbeken bélê tekuy, tey bong he yóm kun kegbek tmóbóng tekuy senta yóm gel hni tekuy béléen, ne senta yóm gel hendem tekuy snéen. ²¹ Yake hol megdóyón dé Dwata lemwót bélê tekuy kem tau hemtahu béléen, ne bud megdóyón snéen lemwót bè Krays Jisas. Yóm kegdóyónen yó, yake béen abay wen sónen.