¹ Yóm tehe yu teganay, lemwót bè yóm là kimón ye ke Dwata ne bè yóm kwen sidek gel nmò ye, yó se gónó ye deng gogow elem hatay laen dù sónen. ² Bè yóm kdaw yó, tódô lolò ye yóm sidek kul gel nmò yó kem tau là hemtahuhen bè Dwata. Tódô nimón ye Seitan, yóm gónó le kmulu yóm kdéen mtulus gu talak kmawang. Bud du se yóm gel malak yó kem tau là mimón ke Dwata. ³ Bè ketahuhen, lómón yó se tehe kut kmò teganay yóm kdê tekuy. Tódô nemung tekuy yóm kenóyô tekuy. Balù kihu knóyô lówó tekuy ne kenbeyen nawa tekuy, tódô nemò tekuy. Yó se gónó tekuy gomong bè yóm kedéen tau deng golu elem tafak Dwata. ⁴ Okóm yóm Dwata, tey kekoduhen tekuy, ne tey kebong nawahen tekuy. ⁵ Igò tekuy sem deng gogow elem hatay lemwót bè yóm là kimón tekuy, gloken tódô bud hlowil tekuy ebè yóm klowil laen dù tul sónen, homongen tekuy bè yóm tehe le kehlowilen ke Krays gu lem hatay. Tódô lemwót bè yóm kun tóbóng Dwata yóm kehewaen tekuy yó. ⁶ Lemwót bè yóm deng kesesotu tekuy bè Krays Jisas, deng homong Dwata tekuy ne bè yóm le klowilen du gu lem hatay, ne bud homongen tekuy snéen bè yóm deng kehegetahen du ditu bè longit mò mogot klamangen. ⁷ Yó gónón mò du nim ni mò gónón hegefan du bè kdéen tau yóm tey ketóbóngen tekuy, ne yóm tey nawahen ebélê tekuy hlanen bè Krays Jisas. ⁸ - ⁹ Yakà lemwóten bè kun tóbóng Dwata yóm gónó tekuy gewà gu lem hatay lan tekuy hemtahu bè Krays. Là kóen lemwót bè nmò tekuy gónó tekuy gewà, kaem tódô lemwót bè yóm kun tóbóng Dwata. Laen kô bang gónó tekuy hegmón du nim ni. ¹⁰ Yakà Dwata du yóm deng hmomi tekuy. Ne lemwót bè yóm deng kesesotu tekuy ke Krays Jisas, deng henbalingen tekuy ne tau mò du yóm heyu. Ne yóm heyu gel nemò tekuy ni kmoen ni, deng tehe eles kem hendem Dwata ne teganay yóm kmò tekuy du. ¹¹ Yu kem tau là Ju le, bê ye kelifót yóm tehe kuy kmò teganay. Là kô ye semfu bè kem tau Ju se kuy, ne gel taba le kuy kem tau là tnulì. a Tey hetonsalu le du yóm deng ketulì le yó, igoen tek olon mlan te kulit kmò le du, là kóen mlan bè but blutut le. ¹² Bè yóm kedaw yó, tey ye mayuk bè Krays. Tólóng ye tau se kuy, là gomong ye bè yó kem tau tehe nélék Dwata mò hol kun tau. Ne laen kô dù kuy du yó kem tehe fasad Dwata kul. Olo ye kem beyen tau nô talak tonok yó dum kuy. Laen kô dù hendón nefet nawa ye, abay se là kô deng tengón ye ke Dwata. ¹³ Okóm nim kmoen ni, tey bong stólóng. Lemwót bè yóm kessotu ye bè Krays Jisas, là kô ye bud glayuk bè Dwata ne, deng ye hol moni béléen lemwót bè tum litô gamà Krays bè yóm tehe katayen. ¹⁴ Yakà du yóm fen semfyu tekuy kem tau Ju ne kem tau là Ju le, ne sensotuhen tekuy. Bè yóm katayen bè kros, deng gónón gembà du yóm seng gónó tekuy tehe sfohon. ¹⁵ Gotu kóhen yóm tey dê lolò me mi kem tau Ju anì baling tekuy sesotu, balù yóm kestólóng tekuy tau. Là bud tekuy sefatay ne. ¹⁶ Bè yóm tehe le katay Krays bè kros, yó se gónón gesón yóm tehe kesefatay tekuy. Ne lemwót bè yóm katayen yó, deng gotu sensotuhen tekuy, balù yóm kestólóng kebut ktau tekuy, ne gotu niten tekuy mulék ebè Dwata. ¹⁷ Duhen yó, yó gónón sut Krays anì hetengónen tekuy yóm Tulón Hyu mò lan tekuy mit sefyu ebè Dwata. Hetengónen kuy yu kem tau là Ju le, kem tau tehe mayuk bè Dwata. Bud hetngónen kum mi kem tau Ju, kem tau tehe moni béléen. ¹⁸ Lemwót bè yóm deng nemò Krays gónón wen lan tekuy hloni ebè Dwata yóm kdê tekuy, kem tau Ju ne kem tau là Ju le. Yóm keheloni tekuy ebéléen yó, helanen bè yóm Tulus Dwata deng suen bélê tekuy. ¹⁹ Yó gónóm mon, bélê ye kuy yu kem tau là Ju le, là bud ye tólóng tau ne nim kmoen ni, deng ye gotu baling sdumu bè yó kem tau nogot Dwata, ne deng ye baling kem kun fes lówó Dwata senéen. ²⁰ Bè yóm deng kehetahu ye, lómón ke deng ye baling ngom bè yóm gónô hdà Dwata. Yó heheken yóm gónô yó, duhen yó kem aposol  ne yó kem tehe tugoden. Bede yó hol tud blóngónen, duhen Krays Jisas. ²¹ Lemwót bè yóm tud blóngónen, yó gónón hol mbegel yóm gónô yó. Ngangen ne efet gónô knóón mò gónóhen nô yóm gónó tekuy mogot. ²² Lemwót bè yóm deng kessotu ye béléen, yó se gónó ye baling ngom bè nim gónô monu ni. Tódô ye gomong bè yó kem dumu ngomen efet tekuy baling gónô gónóhen nô Dwata, helanen bè yóm kun Tulus deng nô bélê tekuy.