¹ Lemwót bè yóm deng kbaling ye kem ngà hol gónóhen nô nawa Dwata, hol dnalang ye dé yóm kun kmò. ² Yóm gel kemò ye bè kem dumu ye, hol hewót ye bè yóm kesebong nawa. Henkena ye bè Krays dé bè yóm kebong nawahen tekuy. Gloken tódô hamà yóm kun klowil bélê tekuy mò dsuen ebè Dwata. Yóm dsuen yó, hol lómón ke yóm boo alì minggel mbel ebè Dwata, ne tey gsengel nawahen du. ³ Lemwót bè yóm deng kbaling ye kun tau Dwata, là kóen hyu ke mò ye samuk, duhen ke nmò ye yó kem dumu nmò gónó hemyak knô, duhen ke seglom ye. Balù olo bè kestulón du yó kem yó, bê tekuy abay gbót du. ⁴ Ne là kóen knóón bè kun tau Dwata ke là mólós ksumóngen. Bê tekuy nmò yóm kudél là madat, ne yóm hlowon sidek. Yake yóm udél gónón megdóyón Dwata yóm gel btang bè sumóng tekuy. ⁵ Ni mò hol hendem ye. Yóm tau gel mò samuk ne yóm tau gel hemyak knô, là kóen gomong bè yó kem tau nogot Krays ne Dwata. Senged se yóm tau seglom, abay se yóm gel sen‑glomen, yó se henged dwatahen. ⁶ Bê ye abay hegsukat bè yó kem tau gel smonol du yó kem monu yó koni. Lemwót bè yóm gel kmò le du, gnóm le he yóm tey kebut Dwata kul yó kem tau là mimón du. ⁷ Hol bê ye abay mung bélê le yó kem tau gel mò sidek yó. ⁸ Tehe yu teganay, deng gel nmò ye snéen kuy ni kem sidek ni, hol lómón ke tehe ye nô lem gónón kmifu. Okóm ni ne, deng ye baling kun tau yóm gónó tekuy mogot, lómón ke deng ye nô lem yóm gónón lemayag. Yó gónóm mon, nmò ye sen yóm nmò knóón bè yóm tau nô lem layag. ⁹ Wen tey bunguhen yóm deng knô tekuy lem layag yó, duhen yóm hyu kmò tekuy bè kem dumu tekuy, ne yóm ktedeng tekuy, ne yóm kimón tekuy du yóm ktahuhen. ¹⁰ Hol dnalang nmò ye yóm gónón hyu nawahen ebélê ye yóm gónó ye mogot. ¹¹ Bê ye abay genbóy kul kmò yó kem tau tolo nô bè gónón kmifu, yakem wen se gónón e kól yóm nemò le yó. Heyu dé ke nwit tekuy lu elem yóm gónón lemayag. ¹² Yóm nemò gel lenimun le yó kem tau yó, tey bong kenyak semtulón du. ¹³ Okóm ke deng le kól lem layag, yó he kegfanen bélê le ksideken yóm gel nmò le. ¹⁴ Okóm ke wen hlayag kul, yó se gónó le baling layag se kul. Tahu yóm gel mon le, “Btiki ne, tau tungô. Mowili dé, tau matay. Wen Krays fen hlayag kóm.” ¹⁵ Duhen yó, hol gel tenngel ye kmò ye. Hol dnalang ye kmò yóm tau hulung hedem. Bê ye lolò kul kmò yó kem tau là hulungen hedem. ¹⁶ Tnana ye hemlel mò du yóm heyu nim igoen tolo wen kdaw ye mò du, abay se tey dê tau mò sidek ni kmoen ni. ¹⁷ Bê ye hungel dé. Hol henebel ye yóm kóyóen bélê ye yóm gónó ye mogot. ¹⁸ Hol bê ye abay nemò yóm hlengel minum, yó se hemsidek klowil ye. Yó dé tles nmò ye, halak ye bè yóm Tulus Dwata. ¹⁹ Ke gel ye stulón, gel hmung ye dé yóm udél nô bè bok Lingón dalang se yó kem sngal Dwata. Senged se ke gel ye semngal ebè yóm gónó tekuy mogot, hol hemung ye senéen ni kem ni, mung du yóm gel kdóyón ye du. ²⁰ Balù kihu sut bélê tekuy, hol todo gel dóyón tekuy dé Dwata, yóm Mà tekuy, hlan tekuy bè boluy yóm gónó tekuy mogot Jisas Krays. ²¹ Hol tekuy hefulung heglaan bè kem dumu tekuy lemwót bè kadat tekuy ke Krays. ²² Yu kem libun deng myehen, hol ye gel heglaan bè yó kem tuha logi ye, lómón se yóm keheglaan ye bè yóm gónó tekuy mogot. ²³ Kaem yóm logi, du se kulu yóm tuha libunen. Lómón ke Krays, du se fen kulu yó kem hemtahu béléen, yó kem tau mò lówóhen, ne du se fen lemwà kul gu lem hatay. ²⁴ Duhen yó, yake hol le heglaan bè tuha logi le yó kem libun, lómón yóm keheglaan le bè Krays yó kem tau hemtahu béléen. ²⁵ Ne yu kem logi deng myehen, hol kenbong ye nawa yó kem kuy tuha libun, lómón yóm kebong nawa Krays yó kem hemtahu béléen. Gloken tódô hamà yóm kun klowil bélê le. ²⁶ Yó gónón matay anì wen lanen hembaling tekuy tau Dwata. Hólósen tekuy hlanen bè udélen ne bè yóm kehebabtays tekuy, ²⁷ anì hol tahu minggel ketonen tekuy kem tau deng hemtahu béléen. Bè ketonen tekuy, deng tekuy baling heyu, ne laen dù belen tekuy, bà udì ke wen gónó tekuy là ket. ²⁸ Ne yó kem logi, hol kenbong le nawa yó kem kul tuha libun, lómón se yóm kebong nawa le yóm kul knô. Yóm tau ke kenbong nawahen yóm kun tuha libun, hol lómón ke kun kenô yóm kenbong nawahen. ²⁹ Laen kô dù tau se ke knutó nawahen yóm kun lówó, kaem sónmoen hemken du ne semgifà du. Lómón yó se gel kemò kesgifà Krays yó kem hemtahu béléen, ³⁰ yakà deng tekuy baling hol kun lówó. ³¹ Hol lómón yóm deng monen bè Sulat Dwata bè yóm tau syehen, yóm monen, “Yó gónóm mon, tódô tnagak yóm logi yóm maen ne yéen, ne setenù le yóm kun tuha libun ne tódô le baling sesotu yóm lewu le.” f ³² Yóm kesesotu lówó le yó, laen kô dù tau gembek tmulón du yóm hol lanen, bede tengón tekuy yóm ktahuhen lemwót bè Sulat Dwata. Bè dou kehedem du, henléden yóm deng kbaling le ssotu bè Krays yó kem tau hemtahu béléen. ³³ Okóm gbak ebè yó kem tau syehen snéen. Ket logi, yake hol kenbong nawahen yóm kun tuha libun, lómón se yó nem kebong nawahen yóm kun knô. Ne yu kem libun, hol nadat ye yóm kuy tuha logi.