¹ Hanà tek tlu kdaw Gubérnor Fistus gedek bè prubinsya Judiya, kendel lemwót bè yó bè Seseriya hlós ebè Jirusalim. ² Bè yóm kkólen bè yó, lemwót yó kem geta bè yó kem gel demsù ebè Dwata ne yó kem tau gónó le galak yó kem Ju, mógów le ebéléen na le e tulón du yóm duón le ke Pol. Ya tey kesefeni le du béléen ³ anì nangayen Pol ebè Jirusalim. Yakà deng eles sentelon le du yóm kmò kehékét le du bè lan. ⁴ Okóm mon Fistus mò kul, “Là. Tolo belanggù bè Seseriya he Pol ne móyóne mulék etu se dou. ⁵ Yake wen bè yó kem mogot kukum bélê ye mung dou anì ditu he gónó ye kmamo du ke wen salaen.” ⁶ Wen dô wolu duhen ke sefolò buteng Fistus nô bè Jirusalim, ominen bud mulék ebè Seseriya. Timbow hayahen bè yó, meyón bè gónó le gel sekukum, ne hangayen Pol. ⁷ Bè yóm kekól Pol bè yó, tódô gotu senibut yó kem Ju lemwót bè Jirusalim. Tey dê yó kem sidek tifù le du, okóm là sem medengen gónó le hegefan du yóm ktahuhen yóm tifù le du yó. ⁸ Benalà Pol lu, monen, “Laen kô deng gónóhu mulé du yóm sana kum hlau mi kem Ju, duhen ke deng nuléhu yóm kum helau bè Gónô Dwata, duhen ke udin yóm tau hol geta bè Rom, laen kô deng gónóhu mulé du.” ⁹ Okóm ke Fistus kun, kóyóen ke hyu nawa le ebéléen yó kem Ju, yó gónón mon du mò ke Pol, “Móyói kô ke nitu uu ebè Jirusalim anì senkukum tekuy ditu nim kenukum ni?” ¹⁰ Okóm mon Pol, “Ni denge medà bè gónóen kemukum yóm tau henged lówó yóm tau hol geta bè Rom. Hyu ke bè ni ne gónó ye kmukum dou. Tódô tngónem se kóm, Amo, laen kô dù salau bè yó kem dumuhu Ju. ¹¹ Ke deng wen gónóhu mulé udin, ne ke wen nmou mò bang gónóhu matay, bong knóón ke mataye. Okóm ke là tahuhen nim duón le dou ni, là kukum du ke tô blayem ou elem tedok le. Yó kóyóu ni,” mon Pol, “ke Sisar kemukum dou, yóm hol geta bélê tekuy.” ¹² Bè yóm kungol Fistus du yóm udél Pol yó, tódô ebè yó kem tau semgemung béléen, ominen mon du mò ke Pol, monen, “Ke móyói ke Sisar fen kmukum kóm, hewitu uu etu sen ebéléen.” ¹³ Deng malù legen bè yó, gedek bè Seseriya Agripa, yóm sotu tau hol geta mogot benwu, mung du libunen Birnis. Yó nógów le nan e heenódó Fistus bè yóm lomi kyónen bè gubérnor. ¹⁴ Timbow deng dô hilu kdaw le ne kól bè yó, omin Fistus temulón ke Pol bè Agripa, monen, “Wen tau bè ni boluyen Pol, tódô tebel Filik lem blanggù. ¹⁵ Bè yóm tehe le kógówu ebè Jirusalim, gotu klamo le béléu nim tau ni yó kem geta gel demsù ebè Dwata ne yó kem tuha gel malak bè yó. Tey keni le du béléu anì tódô tô hefatayu. ¹⁶ Okóm monu mò kul là kum udin du kem tau Rom ke kendel tódô hfatay me yóm sotu tau tenifù ke là na knukum du anì gungol balaen du yó kem tifù le du. ¹⁷ Glok le gotu mógów edini yó kem tau kmamo du. Hayahen bè yó, meyóne bè yóm gónó kmukum, ne ominu hangay ke Pol. ¹⁸ Gena le mudél yó kem tau kmamo du. Ofo do ke wen hol sidek luhón le du, okóm là. ¹⁹ Sotu sotugungolu bè yóm gónó le seglius, tódô lemwót bè yóm kul kehtahu, ne bè yóm sotu tau boluyen Jisas. Deng tehe matay yóm tau yó, okóm kun kmon du Pol deng bud mowil. ²⁰ Là tengónu du dou mò kehedeng du yóm sentulón yó. Yó gónóhu smólók ke Pol ke móyô mógów ebè Jirusalim anì knukum ditu. ²¹ Okóm là móyóen. Mom yó kóyóen ke na le bnentey bè ni anì Sisar fen hemdeng kmukum du. Ne yó se nemou, wen gel kebenteyu du bè ni efet kól bè yóm kdaw kehewitu du ebè Sisar bè Rom.” ²² Mon Agripa mò ke Fistus, “Móyóe se dou mungol du udélen yóm tau yó.” “Haya he,” mon Fistus, “kungolem du.” ²³ Tahu se. Timbow hayahen bè yó lemwót Agripa lewu le libunen, mógów le ebè yóm gónô gónó le gel skukum. Tey dê bè yó kem tau hol geta bè yó kem sendalù mung kul, dalang se yó kem tau genlal bè yóm syudad yó. Tódô kdê le gotu lemsek du yóm nes alì tilob. Omin Fistus hangay ke Pol. ²⁴ Tahu se, gdek bè yó Pol. Omin Fistus medà, monen, “Datù Agripa, ne yó kem dumu tau nô bélê me bè ni. Ni se yóm tau tey klamo yó kem Ju bè Jirusalim, dalang se yó kem Ju bè ni bè Seseriya. Sónmò le gel hetê, gel mon le, ‘Tódô géhél hnatay ye’ mò ke Pol. ²⁵ Okóm yóm dou kesólók du, laen kô bang salà tonu béléen ke gónón matay. Ne kun kóyô nim tau ni ke Sisar fen kmukum du, ne tódô nemungu yóm kóyóen, enget hwitu ebè Sisar. ²⁶ Okóm,” mon Fistus, “ke hkukumu ditu yóm tau ni, laen dù bang udel lem sulatu ebè Sisar se ke wen salaen. Yó gónóm mon, hedau lem blóng ye nim tau ni, hol néen bè soluhem, Datù Agripa. Déke wen snólók ye béléen yóm mò bang udel lem sulat. ²⁷ Abay se bè dou kmò kehedem du, là kô naw e tódô hewit du etu hekawang nim tau belanggù ni, ke là senulatu du yóm hol duón le du.”