¹ Timbow deng limu buteng Pol kól bè Seseriya, kemtes se Ananiyas, yóm hol geta bè yó kem gel demsù ebè Dwata, mung du yó kem tuha gónó le gel galak yó kem Ju. Wen sotu begadu mung kul snéen boluyen Tertulus. Mógów le ebè Gubérnor Filik. ² Omin Filik hetaba ke Pol. Ne nebut Tertulus bè yó se mudél, tulónen yóm duón le ke Pol, monen, “Ó Gubérnor, tey menek kebenwu me yóm klawihem mogot benwu. Tey wen kayen yóm benwu me lemwót bè yóm tóbóngem kum. ³ Tey keheyu nawa me du yóm tóbóngem kum yó, tey bong keslamat me béléem. ⁴ Okóm ni, là móyóe gemanggà kóm. Hol henkodu me béléem anì nem hnungol nim udì tulón me kóm. ⁵ Nim Pol ni,” monen, “són sembeweg kem tau menwu nemoen. Sónmoen todo hesbeweg kehedem kedéen Ju bè klamangen benwu. Du se ge malak yó kem tau lemolò du yóm kun tolok yóm tehe tau lemwót gu bè Nasarit. ⁶ Sotuhen,” mon yóm begadu, “tô nuléhen yóm kum helau bè gónô Dwata. Yó gónó me kemfô du, ne tô helan me bè kum hlau yóm tô kekukum me du. ⁷ Mem tódô nalaw yó kem sendalù Kmandér Lisiyas bélê me, ⁸ ne monen mò kum, ‘Sekukum ye ditu bè solu gubérnor.’ Ke snólókem nim Pol ni, tódô tengónem béléen yóm kedê duón me du.” ⁹ Timbow deng kudél yóm begadu, omin le gebót dmelem se kul yó kem dumu Ju, ne bud mon le, “Là kóen kéng yóm udél begadu yó dé.” ¹⁰ Omin Filik hudél ke Pol. Ne mudél se Pol, monen, “Deng tey kegenem ne mogot kukum lem blóng me, Gubérnor, yó gónón hyu nawahu ke bnalau lu bè ni bè soluhem. ¹¹ Deng sefolò lewu butengen ni ne,” mon Pol, “yóm kógówu ebè Jirusalim naw e tô temaba bè Dwata bè yó. Baluen ke senólókem yó kem dumu tau yóm kógówu etu yó. ¹² Ni kem tau kemamo dou ni, là kô ton le du béléu ke new e mit sekuyangen mon lem Gónô Dwata, duhen ke senbewegu yó kem tau bè yó. Laen dù kô tau senbewegu bè yó kem kul gónó gel setifun yó kem Ju le snéen. Laen se dù tau senbewegu balù kihu gónóhu nô bè yó bè Jirusalim. ¹³ Kedê ni kem tifù le dou ni, laen dù gónó le hegfan du yóm hol ktahuhen. ¹⁴ Là kóe meyak tmulón du kóm, Amo, yóm kelolou yóm sana Dwata lolò yó kem tehe teme me tganay, tódô lolou bè yóm kun kehelan du Jisas, yóm deng men le tolok sekeban. Okóm yóm kdê senulat bè hlau Musis, gotu hentahuhu se dou. Dalang se kdê yó kem senulat yó kem tehe gena tugod Dwata teganay, gotu hentahuhu snéen. ¹⁵ Ni kem tau kmamo dou ni,” men Pol, “tódô senged se yóm hendón nefet nawa me, duhen yóm enget bud klowil Dwata kdéen tau, tau heyu nmò le senged se ke tau sidek nmò le. ¹⁶ Yó gónóm men, tódô hotuhu gelu dou mò du yóm tedeng anì laen dù belóngu ebè Dwata duhen ke ebè kem dumuhu tau. ¹⁷ Deng tey hilu halayu ne là bud gemdà bè Jirusalim,” men Pol. “Bè yóm lomi kógówu new e eted yóm filak mò belay bè yó kem tau élél bè yó, ne wen tô hedsuu ebè Dwata. ¹⁸ Bè yóm tolo kemou du nim ni, wen kem tau Ju meton do lem Gónô Dwata, deng deng ne klolou du yó kem hlau lemwót bè khólós me. Laen dù tau sebung klohoku, ne laen se dù gungolu tau hebnes. ¹⁹ Okóm wen bè yó kem Ju lemwót ditu bè prubinsya Asya ne bè yó. Yake lu dé mógów edini ne kemamo dou bè soluhem ke wen tô tifù le dou. ²⁰ Sotuhen, ni kem tau medà gu bè ni ni, mò le là tmulón du bè ni du ke wen se salà tehe ton le béléu bè yóm tanay kehedà le dou bè solu yó kem tau hol geta mogot kukum bè yó kem Ju. ²¹ Déke yó duón le do bè yóm tehe kehegelu udélu lem belóng le, yóm kmonu du. ‘Hentahuhu yóm enget bud klowil tau hulin kdaw.’ Dô ni se duón le dou, Amo,” mon Pol. ²² Bong ke Gubérnor Filik kun, deng hónô tngónen ne yóm mò klan yóm ktolok Jisas, yó gónón henetok du yóm udél Pol, yó monen, “Bê tekuy tagad hendeng he. Na kuy hangat Kumandér Lisiyas sok kól dini.” ²³ Ominen medók yóm sotu kefitan anì hlós kbentey le ke Pol, okóm là kenbéen du ke wen wè Pol mógów ebéléen mò fen bemlay du yóm wen muhen du. ²⁴ Sotu kdaw bè yó, bud mógów ebè yó Gubérnor Filik, mung du tuha libunen boluyen Jusila. Libun Ju se kun nim Jusila ni. Omin Filik hangay ke Pol anì henungol le yóm tulónen bè yóm kehetahu bè Krays Jisas. ²⁵ Bè yóm igò Pol mudél, wen ebè yóm kebtol nawa, ne bè yóm kehulung mafas nawa, ne yóm angat kehdà Dwata kdéen tau bè soluhen. Botong likò Filik bè yóm kungolen du, tódô tenfloken kudél Pol, monen, “Nen eblà yó he. Tódô bud tinoku uu he ke wen urasu.” ²⁶ Ket kiwól Filik mangay ke Pol ne stulón du. Yó hol nô bè nawahen ke wen filak belay Pol du. ²⁷ Bè yóm gewu halay Pol nô bè yó, tólóng tau ne teles gubérnor, boluyen Porsyus Fistus. Okóm ke Filik kun, kóyóen ke hol hyu nawa le ebéléen yó kem Ju, yó gónón là hewà ke Pol.