¹ Bè yóm kdà Pol bè solu yó kem tau mogot kukum, nen ne temngel ebélê le, ominen mon du mò kul, “Kem dou dumu tau Israél, bè dou kegnóm du, laen kô du tngónu ke mò blóngu ebè Dwata efet nim kmoen ni.” ² Bè yóm kungol Ananiyas, yóm tau hol geta bè yó kem gel demsù ebè Dwata, yóm udél Pol yó, botong monen ebè yó kem tau mdà klohok Pol, “Hol tenufê ye sumóngen dé.” ³ Ne yó se kun balà du Pol, monen, “Enget Dwata he tmufê kóm, tau ge hemtedeng knô. Yó tô nmoem bè yóm keyónem yó, kenukumem ou hlanem bè yóm hlau tekuy. Igoem se deng mem mulé du se kóm yóm hlau bè yóm lanem hetufê dou.” ⁴ Yó udél yó kem tau medà kelohok Pol, mon le, “Tô natuem kô yóm tau hol geta bè yó kem gel demsù ebè Dwata?” ⁵ Benalà Pol se lu, monen, “Tey, kem dou dumu tau Israél, là kô tengónu du ke du yóm hol geta bè yó kem gel demsù ebè Dwata. Ke tngónu, là kô nemou du, abay se monen bè udél Dwata, ‘Béi mudél sidek ebè yóm tau gónó ye galak.’ ” ⁶ Timbow dilô Pol wen se Sadyusi ne wen se kem Farisi bè yó kem tau mogot kukum, ominen hegel udélen, monen, “Kem dou dumu tau Israél, ou snéen sotu Farisi. Dalang se yó kem tehe fuu, Farisi le snéen kul. Ni se duón yóm kekukum ye dou ni abay se hentahuhu yóm angat klowil tau.” ⁷ Bè yóm kungol le du nim mon Pol ni, deng le mem gotu sekaf mon yó kem Farisi ne yó kem Sadyusi, ne deng mem gotu megewu nawa yó kem tau kemukum bè yó. ⁸ Abay se yó kem Sadyusi, là kô hentahu le du ke wen bud angat klowil tau. Ne là hentahu le du snéen ke wen hógów Dwata gu bè longit, duhen ke wen lóyóf tau. Okóm yó kem Farisi, fen hentahu le kul yó kem telu yó. ⁹ Ngang le mò du yóm sekuya mon yó koni efet le mem gotu sefetê. Ominen wen bè yó kem Farisi ge temolok hlau mdà lem blóng le, ne hegel le udél le, mon le, “Laen dù salà ton me béléen nim tau ni” mò ke Pol. “Déke wen tahu hógów Dwata gu bè longit stulón du, duhen ke wen dumu nemò Dwata mò lanen stulón du.” ¹⁰ Deng mem lenwê le yóm kat keseftê le yó. Botong tafa nawa yóm komandér, hendemen ke senketeng le Pol yó kem tau, ngem ke skó lówóhen lem blóng le. Tódô kendel dóken yó kem sendaluhen anì géhél na le e nangay Pol anì nit le mulék ebè kamfù le. ¹¹ Bè yóm kifu yó, tódô hegefan bè Pol Jisas, yóm gónóhen mogot. Mdà lohoken, monen mò du, “Hegelem nawahem, Pol. Deng tulónem o se bè ni bè Jirusalim. Senged se angat nmoem ditu bè Rom.” ¹² Timbow hayahen bè yó, stifun yó kem dumu Ju sensatul le yóm kmò kehatay le ke Pol. Heyu deng eles senfasad le, mung du safà le, yóm là tagad keken le ne là kinum le ke là deng gehatay le ke Pol. ¹³ Wen dô mukas fat folò kwen le semsatul du. ¹⁴ Omin le mógów ebè yó kem tau hol geta bè yó kem ge demsù ebè Dwata ne ebè yó kem tuha gónó le ge galak, yó mon le mò kul, “Deng wen tey senfasad me, mung du safà me. Yó senfasad me yóm là tagad keken me ke là deng gehatay me ke Pol. ¹⁵ Yó tô atul me,” mon le, “yu ne yó kem tau mogot kukum, fen ye kut teminok ebè yóm kemandér, anì nen ne bud hógów edini Pol, abay se heningón wen tô bud snólók ye béléen. Lemwót yó nim kum, fen bnentey me bè lan.” ¹⁶ Okóm wen ngà fen hemungul du nim sensatul le ni, bede ngà libun Pol logi. Tódô mógów ebè kamfù yóm ngà logi yó koni, ne tulónen ke Pol yóm deng gungolen. ¹⁷ Timbow gungol Pol se kun, ominen temaba yóm sotu kefitan, monen mò du, “Yake nitem nim ngà nii ebè yóm kemandér, yakà wen tulónen du.” ¹⁸ Tahu se, niten etu, ne monen bè yóm kemandér, “Hemung yóm tau blanggù nim ngà logi ni, wen tulónen kóm kun.” ¹⁹ Omin yóm kmandér malak bè sigel yóm ngà logi yó koni, lifut snólóken béléen, monen, “Tedu de yóm tô tulónem dou?” ²⁰ Monen se, “Ó Sér, deng sensatul le Pol yó kem Ju wen glalen, heni le béléem kun ke haya anì hewitem etu bélê le, ne bud hedà le lem blóng yó kem tau hol geta mogot kukum. Heningón wen tô bud snólók le béléen kun. ²¹ Okóm béem abay hewit etu bélê le, abay se deng wen mukas fat folò bméntéy du bè lan anì hnatay le. Hyu deng wen senfasad le, mung du safà le, là tagad le meken ne minum ke là deng gehatay le du. Deng le gotu hékét ne yó kem tau yó, nangat le yóm kehógówem du etu.” ²² Yó mon yóm kemandér, monen mò du, “Hol béem abay tulón yóm deng tulon dou ni.” Ominen hulék yóm ngà logi yó. ²³ Timbow deng mulék yóm ngà logi yó koni, omin yóm kmandér temaba lewu kefitan, monen mò kul, “Matul ye lewu latu sendalu mò fen mógów tmonok ebè Seseriya, ne hitu folò fen kmudà, ne lewu latu tau hulung mogot buyus. Kifu ni kedeng kewót ye, wen dô senga bong tau, ne ye e nomung Pol etu bè Gubérnor Filik. ²⁴ Matul ye kem kudà mò todo sentufì snakay Pol. Hol benentey ye do anì laen dù gefaen bè lan.” ²⁵ Ne wen sulat hwit yóm kmandér ebè Gubérnor Filik, yó monen, ²⁶ “Ou Klodyus Lisiyas semulat du nim sulat ni mò hewitu ebéléem, Gubérnor Filik. ²⁷ Ó Amo, nim tau hwitu ebéléem ni, kenfô yó kem Ju, tô henatay le. Timbow tengónu tau Rom nim tau ni, yó gónóhu halaw du yó kem sendaluu lem hólól le. ²⁸ Deng hedau lem blóng yó kem Ju mogot kukum anì tengónu yóm hol duón le du. ²⁹ Okóm bè yóm dou kmò kilô du, laen kô dù salà tonu béléen nim tau ni ke lewót gónó hmatay du duhen ke mò gónó blanggù du. Tódô lemwót bè ku là kesegtud nawa lemolò yóm ku hlau nim gónón gemdà bè kukum ni. ³⁰ Timbow wen mseb du dou yóm deng sentulon le hmatay du yó kem Ju, yó gónóhu kendel hemwit du edyó béléem. Deng tulónu yó kem tau kat dmuón du hyu ke dyó béléem gónó le kmamo du.” ³¹ Tahu se, tódô lolò yó kem sendalù yóm dók yóm kmandér, nangay le Pol yóm kifu yó, ne omin le lemwót. Ngang le mógów efet le kól bè syudad Antipatris. ³² Timbów hayahen bè yó, omin le gotu bud beklil mulék yó kem sendalù mógów temonok, fen le helós mung ke Pol yó kem sendalù smakay kudà. ³³ Bè yóm kegefet le bè Seseriya, ogu le bè yóm gubérnor yóm sulat, ne tebel le bè yó Pol. Omin le bud lemwót mulék se kul. ³⁴ Timbow deng senfala Filik yóm sulat, ominen smólók ke Pol ke tedu yóm kun prubinsya gónó lemwót? Timbow getukulen lemwót bè Silisya, sotu kun benwu snakuf, ³⁵ yó gónón mon du, “Hnungolu he yóm duón le kóm ke deng le sut bè ni yó kem tau kemamo kóm.” Ominen yó medók yó kem sendaluhen anì nwit le Pol ebè yóm sotu gónô tehe hdà yóm tehe Hirod anì ditu gónón hebentey du kul.