¹ “Yu kem dumuhu setwoli ne kem mau,” mon Pol, “hol hnungol ye balau du yóm tô nmò ye béléu ni.” ² Timbow gungol le mudél bè udél Hibru, tódô le gotu neb. Yó mon Pol, ³ “Tauhe Ju se dou, lemwóte bè syudad Tarsus, yóm benwu senakuf Silisya. Okóm mnagie bè ni bè Jirusalim, yó sem Gamaliyél yóm tehe tmolok dou. Tey meget ktoloken du dou yóm hlau Musis, yóm sana hlau yó kem teme u tekuy teganay. Tey mget se yóm dou klolò ke Dwata lómón se yóm kuy yóm kdê ye mdà bè ni nii. ⁴ Tey tehe gel kehesideku yó kem tau lemolò yóm lan deng lolou ni, kóyóu ke gotu hnatayu lu. Gotu kenfóu lu, libun duhen logi, ne tenesu lu lem blanggù. ⁵ Baluen ke snólók ye yóm hol geta bè yó kem gel demsù ebè Dwata, dalang se yó kem geta mogot kukum lem blóng tekuy, ke kéngu nim monu ni. Bè yóm tehe kógówu ebè syudad Damaskus, wen sulat hnihu bélê le mò nitu ebè yó kem dumu le bè yó mò sulatu kemfô kdéen tau hemtahu bè yó. Tahu se, mógówe ebè Damaskus anì kenfóu lu, ne anì nfétu lu, ne nwitu lu ebè ni bè Jirusalim anì tnafak lu.” ⁶ “Bè yóm kógów me yó,” mon Pol, “deng me gloni bè Damaskus ne, deng dô móyón talak kemdaw, tódô gedek lem uyohu se yóm tey layag temsang gu bè longit. ⁷  Ne tódóe glokob bè tonok, segeng gungolu se yóm mudél, monen, ‘Ó Sol, Sole, moen de ke kat hnayamen ou?’ ⁸ Yó balau du, monu, ‘Tau kóm de?’ Bud monen se, ‘Ou se yóm Jisas lemwót bè Nasarit, yóm tendo hnayamem.’ ⁹ Yó kem dumuhu mung do,” mon Pol, “ton le se kul yóm tey layag temsang gu bè longit, okóm là kô gungol le du kul yóm mudél ebéléu. ¹⁰ Ominu bud mon du, ‘Tedu se tô nmou du?’ Bud monen se kun, ‘Medai, ne hlósi ebè Damaskus. Ditu he gónóm temngón du yóm nmò deng olu Dwata etahem.’ ¹¹ Tahu se, mdae, okóm là kóe bud mton lemwót bè yóm tey layag yó koni. Tek sensalak le ou yó kem dumuhu hlós etu bè Damaskus. ¹² Wen sotu tau bè yóm syudad yó boluyen Ananiyas. Yóm tau ni, tey tedeng kloloen du yóm hlau tekuy, ne tey kadat le du yó kem dumuhen Ju nô bè yó. ¹³ Yóm knóu bè yó, tódô mógów ebéléu, mdà lohoku, monen mò do, ‘Ó Woli Sol, ni budi mton.’ Tahu se, tódô sen gengu se bud mton, ne temngele ebéléen. ¹⁴ Bud monen mò do, ‘Deng néléken uu yóm sana kul Dwata yó kem tehe teme tekuy anì tngónem yóm hol kun kóyô, ne anì tonem Jisas, yóm tey tedeng kmoen deng hógówen, ne anì gungolem udélen ebéléem. ¹⁵ Yake uu du fen hemtahu du bè kdéen tau yóm deng tonem ne yóm deng gungolem. ¹⁶ Ne,’ monen, ‘béi tlek ganggà. Géhéli hbabtays, ne mnihi bè Dwata anì hol kóhen béléem yó kem salaem.’ ” ¹⁷ “Bè yóm deng bud kuléku ebè Jirusalim,” mon Pol, “sotu kdaw mnihe lem Gónô Dwata. Bè yóm igou mni, tódô hegfan béléu Jisas, yóm hol gónó mogot. ¹⁸ Yó monen mò dou, monen, ‘Géhél tnagakem Jirusalim ne, abay se henda yó kem tau ke tô tulónem o bè ni.’ ¹⁹ Ne yó monu mò du, ‘Deng gotu tngón yó kem tau bè ni, yóm tehe gel nmou. Deng tódô ketu yó kem kul gónó gel stifun yó kem Ju, gel kemfô yó kem tau hemtahu béléem ne hensideku lu. ²⁰ Ne sotuhen, bè yóm kehatay le ke Stéfén, yóm tau tehe gel tmulón kóm, nóe bè yó, ne tey keheyu nawaw du yóm kehatay le du yó. Hyu ou mentey kgal yó kem tau semtudà du botu.’ ²¹ Bud mon yóm gónóhu mogot mò dou, ‘Lemwóti ne, abay se mayuk gónóhu e hógów kóm elem blóng yó kem tau là Ju le.’ ” ²² Tódô le gotu neb yó kem tau hemungol ke Pol efet gemonen yóm kehógów Dwata du elem blóng yó kem tau là Ju le. Bè yóm kungol le du yóm yó, tódô le gotu segeng hetê, mon le, “Bê ye htahà klowilen. Hnatay ye dé. Bê ye hlowil tau ke lómónen yó.” ²³ Ya tey sidek kehetê le, gotu diwel le eta kem nes le, lel kefung gotu sohul le. ²⁴ Omin yóm kmandér mdók yó kem sendaluhen anì nit le Pol husek elem kamfù le. “Hol nfes ye,” monen, “anì tulónen yóm hol lunon le du yó kem dumuhen Ju.” ²⁵ Tahu se, nfét le Pol anì hyu kfes le du. Bè yóm tolo kfét le du, mudél Pol ebè yóm kfitan mdà bè yó, monen, “Là mulé ye hlau kô ke kendel tódô nfes ye yóm tau Rom ke là deng tngón ye du salaen?” ²⁶ Timbow gungol yóm kfitan yóm udél Pol, tódô mógów ebè yóm kmandér, monen, “Ten gamahem kmoem du yóm tau yó, yake tauhen Rom.” ²⁷ Ominen kendel mógów ebè Pol yóm kmandér, monen mò du, “Tahuhi tau Rom kô?” Mon Pol, “Tahuhe tau Rom se dou.” ²⁸ Mon yóm kmandér, “Tauhe Rom snéen dou, bede tek benlihu yóm kbalingu tau Rom, ne tey mebtes keblihu du.” “Okóm dou,” mon Pol, “tódô lemwót bè ksutu yóm ktauhu Rom.” ²⁹ Tódô sentagak le bè yó Pol yó kem tau tô mfes du. Balù yóm kmandér, tey klikoen se kun, abay se tau Rom Pol, ne du hfét du kdina. ³⁰ Bong yóm kmandér, kóyóen ke hol tngónen yóm kat lunon le ke Pol yó kem dumuhen Ju. Yó gónóm mon, bè yóm deng hayahen bè yó, hkóhen yóm kdina fét Pol, ne gotu htabahen yó kem tau hol geta bè yó kem tau demsù ebè Dwata, dalang se yó kem tau hol geta mogot kukum lem blóng yó kem Ju. Ominen hangay ke Pol, ne hdaen bè solu le.