¹ Omin Agripa mon du mò ke Pol, “Yó kun, benalaem yóm tifù le kóm.” Tahu se, medà Pol, benalaen lu, monen, ² “Datù Agripa, tey bong keheyu nawahu bè nim kedau bè soluhem ni anì henungolem balau du yó kem dê tolon le dou yó kem dumuhu Ju. ³ Tódô kem tngónem ne kóm yóm adat tekuy kem Ju ne yóm gónón gel mególól nawa tekuy. Ni nam henklingu ou likót. ⁴ Tódô gotu tngón yó kem dou dumu Ju yóm dou klowil mbut bè hanà kegenu udì, kewóten bè yóm tehe knóu bè yóm dou benwu efet yóm knóu bè Jirusalim. ⁵ Ke yó dum tulón le yóm ktahuhen, deng hónô tngón le ou se sotu bè yó kem Farisi, tey nelem lemolò yóm hlau Musis. ⁶ Yó gónóhu mdà bè soluhem ni, duón le dou yóm alì kegtud nawahu yóm tehe fasad Dwata yó kem tehe fù tekuy tganay, duhen yóm angat bud klowil tau. ⁷ Bud ni snéen gentud nawa tekuy kem Ju nim kmoen ni. Yó gónó tekuy tendo tmaba ebè Dwata, kemdaw ne kifu. Ni se, Datù, alì duón le dou yó kem dumuhu Ju. ⁸ Moen de yóm kdê ye sbung bè ni ni ke alì mgel bélê ye hemtahu du ke gbek Dwata hlowil du yóm tau deng matay? ⁹ Tehe yu teganay,” mon Pol, “tey kekebéu du se dou yó kem tau hemtahu bè Jisas, yóm tau tehe lemwót bè Nasarit. ¹⁰ Bè yóm tehe knóu bè Jirusalim, benlay le ou kegebek yó kem geta bè yó kem tau gel demsù ebè Dwata anì gbeku heblanggù yó kem tau Dwata. Tahu se, tey deng dê ne tau heblangguu. Ne ke yó kóyô yó kem tau mogot kukum ke hfatay le lu, tey bong óyóu snéen dou. ¹¹ Tey deng dê duléku ne hemsidek kul lem yó kem kul gónó gel stifun yó kem Ju. Yó hol kóyóu ke tebel le yóm kul kehetahu bè Jisas. Lemwót bè yóm kat kebutu kul gloku mebel kul ebè dumu benwu.” ¹² Yó se tehe tô hendufu bè yóm tehe kógówu ebè Damaskus,” mon Pol, “new e tô nebel ditu yó kem tau hemtahu bè Jisas. Glok le hemwit dou sulat yó kem geta bè yó kem gel demsù ebè Dwata anì wen kegebeko mò du yóm tô nmou yó. ¹³ Timbow deng móyónen gtungu kdaw bè yóm kógówu yó, Datù, tódô gedek lem uyoho yóm tey layag temsang gu bè longit, botong kéng nóng kdaw. Yóm layag yó, tódô olohen temfeng dou ne yó kem dumuhu. ¹⁴ Tódô me gotu gdouf bè tonok yóm kdê me. Ne gungolu se yóm mudél ebéléu bè udél Hibru, monen, ‘Ó Sol, Ó Sol, moen de ke alì hnayamem ou? Là kô gbekem tô matù du yóm dou knóyô.’ ¹⁵ Ne monu se, ‘Mau kóm de?’ Bnalaen se ou, monen, ‘Ou se Jisas, yóm alì hnayamem. ¹⁶ Mdai ne,’ monen. ‘Yó gónóhu hegfan béléem ni, abay se deng néléku uu mò gel hógówu. Angat tulónem bè dumu tau yóm deng tonem kemdaw ni, ne yóm angat bud gel hegfanu béléem hulin kdaw. ¹⁷ Bè yóm angat gel khógówu kóm,’ monen, ‘sok wen gfaem lem blóng yó kem dumuhem Ju, dalang se lem blóng yó kem tau là Ju le, angat bud gel lenwau uu he. ¹⁸ Lemwót bè yóm enget ktolokem kul,’ monen, ‘enget mkó bélê le kbutô le. Enget tnagak le yóm gónón kmifu, ne mili le elem yóm gónón lemayag. Enget le gewà gu lem tdok Seitan, ne mili le elem hólól Dwata. Lemwót bè yóm kehetahu le béléu, enget hnifót Dwata salà le, ne baling le tau Dwata se kul.’ ” ¹⁹ Bud mon Pol, “Yóm deng hegfan Dwata béléu ni, Datù Agripa, hol là gbeku du ke là nimónu du. ²⁰ Bè syudad Damaskus yóm hol tanay benwu gónóhu tmolok, ominu bud tmolok bè Jirusalim, efet lenngebu klamangen benwu yó kem tau Israél, ngangen ne efete tmolok lem blóng yó kem tau là Ju le. Yó gel monu bè yóm ktoloku, ‘Hegsel ye ne, ne nimón ye Dwata. Hdilô ye bè kmò ye yóm deng kehegsel ye.’ ²¹ Bè nim gel nmou ni, Sér, ni se lemwót gónó le kemfô do lem Gónô Dwata yó kem dou dumu Ju, ne gónó le tô hmatay dou. ²² Bede sal gel tnóbóng Dwata ou, efet nim kdaw ni. Yó gónóhu mdà bè ni lem blóng ye. Yóm toloku yó, yó se toloku bè kdéen tau, bè yó kem tau leneken kkólen bè yó kem tau lebangen. Kdê yó kem dou tolok, sal gel segtón ebè yóm kul gel tulón yó kem gna tugod Dwata teganay, dalang se yóm kun tehe tulón Musis. Yó tehe gel tulón le, ²³ mon le nen na glayam he yóm Misaya, yóm deng nélék Dwata mò hkamalen yóm hugoten, ne nan matay, okóm bud mowil. Du se hol tanay hlowilen laen tul bud katayen mò gónón hton du bè kdéen tau yóm lan le gmuta du yóm klowil laen dù sónen, tau Ju kkólen bè yó kem tau là Ju le.” ²⁴ Yóm igò Pol tolo mudél, tódô hetê Fistus, monen, “Lengel matahem yóm uu, Pol, abay se gedlug hennagiem.” ²⁵ Mon Pol, “Là, Sér. Là kóen lengel matahu. Hol tahu duhen nim tulónu ni.” ²⁶ Omin Pol beklil ebè Agripa, monen, “Senged se kóm, Sér, là kóe ne e likò tmulón du kóm ni kem ni. Kegnómu du deng gotu tngónem kóm nim monu ni, abay se laen kô dù tau bè benwu tekuy ke là tngónen du. ²⁷ Hentahuhem kô kóm, Sér, yóm tehe gel mon yó kem gna tugod Dwata? Tngónu,” mon Pol, “hentahuhem.” ²⁸ Bnalà Agripa Pol, monen, “Yó kô hendemem ke kendel tô henbalingem ou tau hemtahu bè Jisas?” ²⁹ Bud mon Pol se, “Kihu ke kendeli hemtahu ni, duhen ke nan legen he, hol hnihu uu bè Dwata, Sér, senged se ni kem dumu tau hmungol do ni, anì mkél ye béléu bè yóm dou kehtahu bè Jisas, ya ke là gbunù ye du ni du kfét le dou kdina ni.” ³⁰ Timbow deng kudél Pol, tódô mdà Agripa yóm tau hol geta, dalang se yóm gubérnor ne Birnis, ne yó kem dumu tau myón bè yó, gotu le lemwót. ³¹ Timbow le kól bè lewà, stulón yó kem tau, mon le, “Laen kô duón gónón matay tau tu, duhen ke gónón geblanggù.” ³² Mudél se Agripa ebè Fistus, monen, “Ke là yó du kóyóen hkukum bè Sisar, hyu ne ke tódô hewaem.”