¹ Isulat soin para to Diwata to iglisya to Sardis. “Soin ka inkagi to niggun-gun to pitu no Ispiritu to Diyus hoy to pitu no bituon. Nataga a to koykow no inhimo hoy nataga a no nabantug ka no nauyjag agad to namatoy kad! ² Koy na-an gimata hoy hirosona ka duon to koykow oyjow kono og kamatoy su nakita ko no ka koykow no nohimo kono pad no malugot to tangkaan to Diyus ko. ³ Koy na-an sumsumana sooyjow inpanulu ko no nadinog no tumana soin pangayjompoi ka mo salo no. Ko kono ka og gimata, honduon a koykow anat to sagboka no takawon hoy kono ka og kataga to kun-o a ogpoko-uma. ⁴ Di waro namusungi ka kinabo duon to Sardis. Ogduma kandan kanak no inkinabu-an to maputi su litos man kandan. ⁵ Ka ogduug ogkinabu-an to maputi iling to soin. Hoy kono ko og awwo-on ka ngaran dan diyo to libru to mo nauyjag to tangkaan to Amoy ko hoy to mo Diwata rin igpapitow ko no kandan mo kaot-otawan ko. ⁶ Koy na-an ko duon talinga no paminoga ka inkagi to Ispiritu diyo to mo Iglisya. ⁷ Isulat soin to mo Diwata to iglisya to Piladilpiya. Soin ka lalag no inkagi to balaan hoy malugot no niggun-gun to yabi ni Dabid. Waro og pakalukob to kandin no intukasan hoy waro og makatukas to kandan no inlukoban. ⁸ Nataga a to koykow no hinimuwan hoy no duon malintuk no guhum. Intuman no ka kanak no pogtulun-an hoy waro a no inlimud. Pitawa, intukasan ko para koykow ka sagboka no lukub hoy waro ogpakalukub to soin. ⁹ Sikan no sakup ni Tanas no nigpaka-Hudiyu no ubaton. Paranihon ko kandan koykow oyjow paluhudun hoy ogtatagad koykow oyjow kataga kiandan no inguynawaan ko koykow. ¹⁰ Tongod so intuman no iyan ka kanak no sugu, no nigpailubka, igpaawo ko koykow to mo kalisod no og uma to ingod oyjow pog anti to tibo no mo otow. ¹¹ Oghanduon a dayjon pitawa no kono ogkaamono soikan ingungunan no oyjow waro ogpakaagow to koykow no kuruna to kaduugan. ¹² Ka ogpakaduug oghimuun ko no suluy to timpulu to Diyus ka hoy og palingaat iyan soin igsulat ko duon kandin ka ngaran to kanak no Diyus hoy ka ngaran to siyudad to kanak no Diyus no iyan ka bag-o no Hirusalim no og lunu to langit ligkat to kanak no Diyus. Igsulat ka da-an dayjon ka bag-o ko no0 ngaran. ¹³ Koy na-an ko duon talinga no, paminoga ka inkagi to Ispiritu diyo to simbahan! ¹⁴ Isulat soin para to Diwata to simbahan to Lawdisya.” Soin ka inkagi to Amin, ka kasaligan hoy tutu-u no tistigus no iyan ka bunsuran to tibo no inhimo to Diyus. ¹⁵ Nataga a to koykow no inhimuan: Kono ka no mahagsil hoy hono ka da-an moinit. Kaliyag a porom no mahagsil ka nandu iyan ka moinit do iyan! ¹⁶ Di tongod so koykow moinit-init mandu, kono iyan moinit hoy kono d-an mahagsil, ig-ilub ko koykow! ¹⁷ Nigkagi ka, doto a hoy maroyjow no pogkabutang hoy waro natumil kanak. Di waro ka nataga no alaot hu makahihid-u ka amana! Ay-ayjo ka, nalubasan hoy butud. ¹⁸ Koy na-an ogsambagan ko koykow to pogbuli ligkat kanak hoy bulawan no intunow pinabayjo to hapuy oyjow ogkadatu ka. Buli ka da-an to maputi no tinabu no og saluubun no oyjow ogkatambuan ka koykow no makasisikow no pogkalubas, buli ka da-an to tumbal no igtambal to koykow no mata oyjow no ogpakakita ka. ¹⁹ Insaparan hoy indisiplina ko ka tibo no kanak no inguynawaan. Koy na-an ogmatinuuhon hoy pamuyjo I to pasaylo ka kaniyo no mo salo. ²⁰ Nigsasindog a to gumawan, ogsulud a to kandin no baloy hoy pakigsalo kandin hoy ogkoon kandin to duma kanak. ²¹ Ka ogduug ogpasukudon ko pog-ingkud to kanak turunu anata no igpasukud a tupad to kanak no Amoy duon to kandin no turunu tongod su nigduug a man. ²² “Koy na-an ko duon talinga no, paminoga ka inkagi to ispiritu diyo to mo simbahan!