¹ “Isulat soin para to Diwata to simbahan to Ipisu.” Iyan soin ka lalagon ligkat kandin no nig-gungun to pitu no bituon to kandin kalintu-u no bolad hoy nighipanow to liwaraan to bulan no taguanan to salong. ² Natagahan ko ka koykow no nohimo, ka koykow no pogkabugul hoy ka koykow no poilob. Natagahan ko da-an no kono ka og kaliyag to maroot no mo otow hoy insumit-sumit no soikan nigpakaapostul hoy nabatugan no nu kandan mo konon tutu-u. ³ Nataga a no nigpoilob ka hoy in antus no ka mo kasakitan tongod kanak hoy waro ka nigmalutoy. ⁴ Di ka ikasawuy ko koykow iyan no waro kad nig guynawa kanak iling to bunsuran. ⁵ Koy na-an sumsumana ko nokoy ka salo no. Pamoyjo to pasaylo hoy himua ka inhimu no to bunsuran. Di ka kono ogpamuyjo to pasaylo, oghondoon a koykow hoy puruton ko ka koykow no tagu-anan to salung ligkat to nataguan to soini. ⁶ Di ka karoyjow koykow iyan no insaligan no ka inhimo to mo nikulaita iling to kanak no pogkasilag to soin. ⁷ Koy na-an duon talinga ka, paminoga ka inkagi to Ispiritu diyo to mo simbahan!” Soikan pakadung ogtalaran ko to katongod to pogkoon to unud to kayju no nigbugoy to kinabuyi no duon to tanaman to Diyus. ⁸ Isulat soin para to Diwata to simbahan to Smirna: Iyan soin ka lalagon ligkat kandin no iyan ka bunsuran hoy ka katamanan, ka namatoy hoy nabuhi pog dayjon. ⁹ Nataga a to koykow no mo in antus hoy to koykow no kohoy-u di ka tutu-u datu ka! Nataga a da-an to mo intumutumnan koykow to soikan nigpaka-Hudiyu di mo sakup manaan ni Tanas! ¹⁰ Kono no kahaldoki ka agad nokoy no og antuson no. Pirisuhan to yawa ka pila kaniyo oyjow to pog anti kaniyo hoy og vlibwas to sampulu no aldow ka koyko0w no kasakitan. Ogmatinuohon handtud to kamatayjon hoy igtalad ka koykow ka kurunu to kinabuwi. ¹¹ Koy na-an ka duon talinga now, pamminoga ka inkagi to ispiritu diyo to mo simbahan!” Ka ogduug kono og pakatagamtam to ikadaruwa no kamatayjon. ¹² Isulat soin para to Diwata to simbahan to Pirgamu: Iyan soin inkagi to nig-gungun to magalang no kampilan no duon daruwa no galang. ¹³ Nataga a no duon ka og ugpo to rapit no inharian to tanas. Nigmatinumanon ka kanak hoy nigparayjon pogtu-u kanak agad to panahon no si Antipas, ka matarong ko no saksi, inhimatayjan ta rapit no in igpaan ni tanas. ¹⁴ Di duon pila no butang no ikasawuy ko koykow duon pila koykow no duon nig-amut to pogtulun-an ni Balaan no nigpanulu ki Balak no pogbaglo to kaotawan to Israil oyjow pakasalo pinabayjo to pogkoon to intalapag diyo to mo diyus-diyus hoy pinabayjo to pakig-dulug. ¹⁵ Duon pila da-an koykow duon no nigsunud to pogtulun-an to mo ni kulaita. ¹⁶ Koy na-an pamuyjo ka to pasaylo to koykow no mo salo! Ko kono ka og[pamujo to pasaylo, oghondiyo a koykow to marali no pakig-usig a kandan gamiton ka kampilan no ligkat to bubu ku. ¹⁷ Koy na-an ko duon talinga no, paminoga ka inkagi to ispiritu diyo to mo simbahan!” Para to soikan ugdunng igtalad ko ka pila to mo hinolos no kabilin. Talaran ko da-an ka matag-sagboka kandan hoy maputi no bato no duon insulat ka bag-o no mo ngaran no kono og kabasa ni agad hontow gawwas to marawat to soin. ¹⁸ Isulat soin para to Diwata to simbahan to Tiyatira.” Iyan soin ka inkagi to Anak to Diyus no anat to mo mata no nigkalab no hapuy hoy ki agad nokoy no mo paa iling to pinasinow no brunsi. ¹⁹ Nataga a to koykow no hinimuan, to koykow no goynawa, to koykow no pogkumatinumanon, ka koykow no pog-alagad hoy to koykow no pogpoilob. Nataga a da-an no labow pad ka koykow no inhimo kuntoon to soikan. ²⁰ Di ka igkasawuy ko koykow iyan no waro no sapari ka malitan no si Jisibil no nigpakapurupita to Diyus no nigpanulu hoy in-usung to kanak no mo sulugu-anon oyjow to poghimo to maduot no pog-dulug hoy pogkoon to intalapag diyo to mo diyus-diyus. ²¹ Intalaron ka kandin to panuhun to pogpamuyjo to pasaylo di waro kandin namuju to pasaylo to kandin no batasan. ²² Koy na-an indagsang ko kandin to hibatanan no duon kandin hoy soikan no nan-ampow duma kandin og aguwanta amana to mo kasakit. Himoon ko iyan soin gawwas ko kandan ogpamuyjo to pasaylo to maroot dan hinimuwan. ²³ Himatayjan ku ka kandin mo anak hoy hangkuwan ka tibo no simbahan mokoila no kanak iyan ka nataga to sumansuman hoy to goynawa to otow. Balusan ko ka matag-sagboka kaniyo sumalo to kaniyo no hinimuwan. ²⁴ “Di ka duma kaniyo to tiyatira waro nigsundul to soin maroot no pogtulun-an. Waro kow nataga to inkagi no malisod ogsaboton no mo sikiritu ni Tanas! Kagihan ko kaniyo no kono ko igpatiang kaniyo ka loin pad no tiangonon. ²⁵ Di kinangolan no gungunan now amana ka duon on kaniyo hantud to pog-uma ko. ²⁶ Para to pakaduug hoy ogparayjon poghimo to kanak no pogbuot hantud to katamanan, talaran ko kandan to guhom to pogmando to mo nasud. ²⁷ Oghari kandan no malogot iyan hoy luputun dan ka mo nasud iling to kulun. Talaran ko kandan to guhum anat no kanak no nakarawat to guhum ligkat to kanak no Amoy. ²⁸ Igbugoy ko da-an kandan ka bituon no kohon-in. ²⁹ Ko duon talinga no paminoga ka inkagi to Ispiritu diyo to mo simbahan!