¹ To soojo no timpu, miglibulung o man o ka masulug no mo otow diyo to ki Hisus no warad o ogkoon. No in-umow ni Hisus ka tinuonan din hoy migkagiyan, ² “Noyid-u a to mo otow su natatoluwan kandan ka ogduma-ruma kanak no warad o ogkakoon. ³ No ko ogpoulion ku kandan no oggutasan, ogkakuyapan kandan diyo to doralanon su mariyu pad ka impuunan to duma.” ⁴ No migkagi ka mo tuonan din, “To, hondoi ki naan do iya ogpurut to kakoon no igpakoon to soini no mo otow to hoino ki po ma to awaaw no ingod?” ⁵ No mig-inso si Hisus kandan, “Pilaa no timman ka paan no duon to kaniyu?” ⁶ No migtabak kandan, “Pitu no timman.” No impapinnuu o ni Hisus ka mo otow diyo to tano, no ingkuwa rin ka pitu no timman no paan hoy impasalamatan din ka Magbobayjo. Nataman, impanopik-topik din ka paan hoy impamohoy rin diyo to mo tinuonan din oyjow igpasondad diyo to mo otow. No insondad dan o sooyjo diyo to mo otow. ⁷ No duon doma doisok no ngalap to woyig no pila-pila ro iya woy impasalamatan din sooyjo. No migsuhu si Hisus no igbehey dod doma sooyjo diyo to mo otow. ⁸ Nigkoon kandan hoy nonahantoy , hoy duon pad nalimud dan no nasamo no nakaponu to pitu no liyang. ⁹ Mo hop-atan no libu (4,000) ka kasulug to mo otow. Nataman, impouli on ni Hisus ka mo otow. ¹⁰ No duon-duon no mig-untud kandin to balangoy duma to mo tinuonan din hoy miggondiyo to ingod no Dalmanuta. ¹¹ Pogkoimpus, duon mo Parisiyu no migginguma hoy migpakig-apul ki Hisus. Migbuyu kandan to ogpapitawon to koin-inuwan no ogpuun to langit oyjow to pog-olog-olog kandin. ¹² No miggohoyinawa si Hisus to maralom hoy migkagi, “Maniyo to ogbuyju to koin-inuwan ka mo otow to kuntoon no timpu? Ognangonan ku sikaniyu to malohot: War koin-inuwan n igpakapakita kandan!” ¹³ No mig-ongkoran o kandan ni Hisus hoy mig-untud o man-o to balangoy pohondiyo to doyipag to lanow. ¹⁴ Nalingow ka mo tinuonan no og-alap to kakoon gawas to sagbuka no paan no diya to balangey. ¹⁵ No migkagihan kandan ni Hisus no migkagi, “Tantanuri now hoy bantoy kow to igpatulin to paan to mo Parisiyu hoy ni Hirudis.” ¹⁶ No migmalalagoy on ka mo tinuonan din no migkagi, “Kagi din sika su waro ki ma naka alap to paan.” ¹⁷ Nataga si Hisus ko nokoy ka igkawangal dan, sikan naa mig-insaan din kandan, “Maniyu to ogkalagow kow to waro paan now? Waro now ba nakasabuti? Makohal bos ka mo ulu niyu? ¹⁸ Duon mo mata niyu di kono kow ogpakakita, no duon mo talinga niyu di kono kow ogpakadinog. ¹⁹ Waro niyu nasuman-suman ka pogpanopik-topik ku to lalimma no buuk no paan no impakoon ku to lalimma ne libu (5,000) no mo otow? No pilaa no liyang ka naponu to nalimud niyu no ogkakoon no nasamo to mo otow?” No migtabak kandan, “Sampulu hoy daruwa (12) no liyang.” ²⁰ “No ka pitu no paan no impakoon ku to hop-at no libu (4,000) no mo otow, pilaan liyang ka naponu to nalimud niyu no ogkakoon no nasamo to mo otow?” No migtabak kandan, “Pitu no liyang.” ²¹ No migkahigan kandan ni Hisus, “Waro kow naan pad man-o nakasabut?” ²² To pogginguma ran to Bitsayda, duon butud no in-uyan to mo otow duon ki Hisus, hoy migpoyid-u-hid-u kandan no ogsamsamon din ka otow. ²³ No ingkitkit ni Hisus ka otow diyo to mariyu o to bariyu. Nataman, in-iloban din on ka mata tobutud hoy intol-oban din to bolad din, hoy mig-insaan din on, “Duon nakita nu?” ²⁴ No migtonggak ka otow no migkahi, “Nakakita ad on to mo otow, di ogpokoiling kandan to mo kayu no ogmangipanow.” ²⁵ No intol-oban on man-o ni Hisus to bolad din ka mata to butud. No migmomotmot inpitow ka butud hoy ogpakakita rin on hoy ogkamolmolohan din on ka tibo. ²⁶ No impouli on ni Hisus ka mo otow diyo to ugpaan din hoy migkahigan, “Kono kad en bayo dutun to bariyu.” ²⁷ No migpabulus si Hisus duma to mo tinuonan din diyo to mo bariyu no sakup to Sisarya Pilipus. To sasangan pad kandan no ogmanghipanow, mig-inso ni Hisus to mo hibateen din, “Hontow a kun naa sumalo to mo otow?” ²⁸ No migtabak kandan, “Migkagi ka duma no koy kow kun si Huwan no Talagbowutismu. Ka duma dogma migkagi no koy kow kun si Ilyas, di duma migkagi no sagbuka ka kun to mo prupita." ²⁹ No mig-inso si Hisus kandan, “Di kaniyu ka ogpakagihon, hontow on naa iya?” No migtabak si Pidru, “Koykow iyan ka Kristu.” ³⁰ No migkagihan kandan ni Hisus no kono ogkagi to minsan sin-u mohitungod kandin. ³¹ Tapus, migbunsud on si Hisus ka migpanulu kandan no ka Anak to Otow koilangan no og-antus to igmoulaula kandin, hoy ogsamsamilian kandin to pangulu to mo Hudiyu, hoy to mo pangulu to mo talagpanubad hoy to mo talagpanulu to Balaud to Magbabayja. Oggimatayan dan kandin hoy ogkouyag dod to igkatolu no aldow. ³² No inkagihan ni Hisus sooyo diyo to mo tinuonana din to waro pogkoho. Tongod dutu, impasuwoy on ni Pidru si Hisus hoy insaparan din. ³³ Di migbalikid si Hisus hoy migtongtongan din ka mo tinuonan din, no insaparan din on si Pidru to migkagi, “Awo ka duon Satanas! Su kono no Magbabayja ka indapihan nu, di, ka mo otow!” ³⁴ No impoparani ni Hisus ka mo otow duma to mo tinuonan din hoy migkahigan, “Ko hontow ka ogkaliyag no og-ikul kanak, koilangan no og-ongkod to kandin no igkaliyag hoy ogtiang to kandin no krus hoy og-ikul kanak. ³⁵ 35 Su ka ogkaliyag no ogluwas to umul din, nasi ogkawaroi, di ka ogkawaraan to umul din tongod kanak hoy to Marojow no Kagihonon, ogpakarawat to umul no waro katapusan. ³⁶ Nokoy naa ka ogkapurut to otow ko ogkapurut din ka tibo no tahu kayi to ampow to tano, koy naan ko ogkawaro ka umul din? ³⁷ Waro on iya! Su waro igkabogoy to otow oyjow ogkapurut din ka kandin no umul. ³⁸ Su ko igkohilow a duma to kagi ku to minsan hontow ligkat to mo otow kuntoon no amani no makasosalo hoy konad ogpalintutuu to Magbabayja, igkohilow ku dogma kandin to timpu no oglibod on ka Anak to Otow duma to katolosan to Amoy rin hoy to matulus no mo panalihan.”