¹ Makaruwa naan do no ogkatuman on ka pista to mo Hudiyu no ogngaranan to pista to Pogligad to Anghel hoy pista to waro patubu no paan. Ka mo agalon to mo pari hoy kam talagpanulu nigsumansuman no himatayjan si Hisus. No nigsumansuman kandan ko ogmonuwon to pogdakop si Hisus no kon ogkatagahan to moo tow. ² Nigkagi kandan, “Kono ta oghimuwon ko pista, su atuk ko ogkaguliyang ka mo otow.” ³ To diyad si Hisus to lunsud to Bitanya, to pogkoon ni Hisus diyo to baloy ni Simun duon malaw-oy no dalu, no duon sagboka no nokouma. No duon nig-alap no mahalon no tibud no duon to solod no pohomut. No sikan pohomut puun to tanom no ogngaranan to “Nardu.” Pogdani rin ki Hisus nig-abliyan din ka tibud hoy in-ug-ug to ulu ni Hisus. ⁴ Diyo duon mo otow no nanabbolu no nigkagi, “Mania to ogdaat-daatan ka pohomut? ⁵ Igkabaligya man poron sikan to kantidad to songo tuid no sildu hoy ka halin igmakabogoy man poron to moo tow no ogkawaro-waro.” Hoy naboluan dan ka malitan. ⁶ Di nighonduon si Hisus kandan, “Mania to ogsasawon now kandin? Hagtongi now no duon kandin. Maroyjow soini no inhimu rin koddi. ⁷ Ka igkawaro dan dumaha now agad hondoi kow ogparolog hoy agad nokoy orasa tabangi now, di koddi kono a now ungod ogkaruma. Su soin no malitan nighimu ka taman to ogkohimu koddi. ⁸ Nig-ug-ugan to pohomut ka lawba ku nataga no iglobong ad. ⁹ Ka tutuu, agad hondoi iglalag kayi to ingod soin maroyjow no lalagon, ka nighimu koddi igkalalag dan no sumsumanon kandin.” ¹⁰ Su Hudas Iskaryuti no sagboka to daruwan pulu no tinounan nighondiyo to agalon to mo pari oyjow ogpakiglalag ko igbalagad on si Hisus kandan. ¹¹ To pogkarinog to mo agalon to mo pari ko nokoy ka tuud ni Hudas, naliyag amana kandan hoy nigpataantog bogoy kandin to salapi: Puun to sikan, namitow to timpu ko kon-u ran ogkapurut si Hisus. ¹² Poghinguma to an-anayjan no pista to paan no kono ogdakol. Iyan sikan aldow no igtalapag ka mo karniru no ogkoonon to mo Diwata. Hoy nanginso ka mo tinuonan ni Hisus kandin, “Nokoy ka ogkoupian nu no ogpanagana koy to paniyapun to pogligad to Diwata?” ¹³ Nigsugu din ka daruwa no tinuonan, “Hondiyo kow to banwa to Hirusalim. Ko ogmokouma kow diyo duon ogtomu kaniyu no og-alap to banga no duon woyig alunduga now kandin. ¹⁴ Ko hondoi no baloy kandan ogsolod, hoy ilalag now soin to tagbanwa, nanginso ka talagpanulu ko hondoi ka salapi no koonanan din duma to mo tinuonan to kahulugan to pista to pogligad to Diwata. ¹⁵ Human igpakita kaniyu ka dakol no salapi diyo to ampow no tibo duon ka mo agad nokoy tibo on. Diyo kow tagana to paniyapun.” ¹⁶ Nangipanow ka daruwa no nigsugu, hoy to poghinguma ran diyo to lunsud nigkita ran ka agad nokoy no innangon ni Hisus kandan. Hoy nigtagana ran on ka paniyapun to pista. ¹⁷ To balu-o ogmarusilom, nokoumoon si Hisus duma to sapulu no mo tinounan din. ¹⁸ Tagood to nangoon kandan diyo to lamisa, nigkagi si Hisus, “Ogkagiyan kow to tutuu, no sagboka to duma now kayi to og-amul koddi.” ¹⁹ To sikan ka narinog to mo tinounan, natalong amana kandan hoy nigsusubalsubal kandan ka nigkagi, “Kono no koddi ha?” ²⁰ Nigkagi si Hisus kandan, “Ka og-amul koddi sagboka ro kaniyu to sabokan pulu hoy daruwa ka nig-olod to paan no ogduma koddi. ²¹ Kanak no anak to otow oghimatayjan anat to nasulat to kasulatan, di mokohoy-u-hoy-u ka otow no nig-amul koddi. Sulamig pad no waro on kandin nootow.” ²² Tagood to nigkoon kandan, nigpurut si Hisus to paan. Nigpasalamatan din to Magbabayjo hoy nigporipori din soin. Pogkaponga inlogbo din ka mo tinounan din ka nigkagi, “Koona now iyan soin ka lawa ku.” ²³ Hoy nigpurut to inumon, nigpasalamat to Magbabayjo, hoy inbogoy kandan. Hoy nanginum kandan. ²⁴ Nigkagi si Hisus, “Iyan soin langosa no ig-ulo to mo otow. Soin ka tus no duon on bag-u no sabut ka Magbabayjlo to mo otow. ²⁵ Ka tutuu kona ad og-inum oglibod to soin no inumon no puun to ubas parolog to aldow no og-inum a to bag-u no agad nokoy no inumon diyo to inharian to Diyus.” ²⁶ Hoy nigkanta kandan to pogsayjo to Diyus. Pogkoipus nangondiyo kandan to kohilawan to mo Ulibu. ²⁷ Nigkagi si Hisus kandan, “Tibo kow ongkod koddi, su ka Diyus nigkagi duon to kasulatan, ‘Oghimatayjan ku ka talagtamong hoy ogmomokogsuwoy-suwoy on ka mo karniru.” ²⁸ Di to pogkouyjag ku, oghun-a ad kaniyu diyo to Galiliya.” ²⁹ Nigkagi si Pidru ki Hisus, “Agad tibo pad og-ongkod koykow, koddi kona ad iyan.” ³⁰ Nigtabak si Hisus kandin, “Ka tutuu, kuntoon karusilomi, to kono pad og-ukalo ka manuk to kararuwa, iholos anu to katatolu.” ³¹ Di nigkagi pad iyan si Pidru, “Kono kud iyan igholos sikoykow agad pad himatayyan apad duma koykow.” Iyan dod iyan innangon to mo tinounan din. ³² Hoy nangondiyo kandan to Gitsimani. To poghinguma ran diyo nigkagi si Hisus to mo tinounan din. “Maminnuu kow tagood to ogpanubad a.” ³³ Nig-alap din si Pidru, Santiyagu hoy si Huwan diyo to ogkohunaan. ³⁴ Natalong amana si Hisus hoy nigkagi diyo to kandan, “Inat to ogkamatoy ad to katalong ku. Pagaat kow kayi hoy kono kow hidhirogo.” ³⁵ Hoy nighondiyo pad iyan kandin to ogkohunaan, niglukbo kandin diyo to tano ka nigpanubad. ³⁶ Nanubad kandin, “Amoy, ka tibo no kamanggaran ogkoyimu nu. Koy naan ka kono nud ipohinguma ka pogbayjad-bayjad no oghinguma koddi. Koy naan ko koddi ka ogboboot kono ogkatuman ko kono koykow ro iyan.” ³⁷ To poglibod din diyo to tatolu no tinounan din, noumaan din no nokohirogo kandan. Nigkagi kandin ki Pidru, “Simun, nokohirogo ka? Kono ogkabaluy ko oggimata kow agad songo uras do.” ³⁸ Hoy nigkagi iyan kandin kandan, “Onow kow, hoy panubad no kono kow ogkaroog to maroot. Sugu to Ispiritu now ogpanubad din malotoy ka lawba now. ³⁹ Nighipanow mando si Hisus diyo to ogkohunnaan no niglibod no nigpanubad. ⁴⁰ Pogkaponga niglibod mando si Hisus diyo to mo tinounan din hoy nasaab din mando no nonokohirogo kandan. Su ogpomokohirogo iyan kandan. ⁴¹ Hoy waro kandan nataga ko nokoy ka igtabak dan. To igkatolu no poglibod din kandan nigkagi kandin, “Nangirogo kow mando hoy nangimoloy? Tumanan on! Iyan on soin panahon no koddi anak to otow igbalagad diyo to makasasalo. ⁴² Diyo kid! Pitawba, soinid ka otow no og-amul koddi.” ⁴³ To pogkagi ni Hisus nokouma si Hudas no sagboka to sampulu hoy daruwa no tinounan. Duma rin ka mo otow no duon mo kampila hoy mo lampos. Nigsugu kandan to mo agalon to mo Pari, mo talagpanulu, hoy mo agalon to mo Hudiyu. ⁴⁴ Nigtahanan on nangoni ruo to og-amul no si Hudas ka ogdakop ki Hisus ko nokoy ka oghimuwon no alati, “Ka otow no ogharokan ku iyan sika ogpamangngoon. Dakopa now hoy bantayji now no kono ogmakasabuk. ⁴⁵ To poghinguma ni Hudas, nigparagas diyo ki Hisus ka nigkagi, “Talagpanulu!” Hoy nigharokan din. ⁴⁶ Hoy human darakopa si Hisus. ⁴⁷ Di duon sagbuka no migsasindog dutu no miggulabut to kampilan din hoy intibbas din ka uripon to Labow no Talagpanubad, hoy natampod on ka talinga. ⁴⁸ Nigkagiyan ni Hisus ka nandakop kandin, “Kona a man no tulisan. Maniya to nig-alap kow to mo pangariban to pogdakop koddi? ⁴⁹ Adlow-aldow aman ogpanudlu diyo to timpulu di mani to kuntoon a now pad ogdakopa. Di kinangolan no ogkoyitabu ka nakasulat diyo to kasulatan moyitongod koddi.” ⁵⁰ Hoy nig-ongkoran to mo tinounan si Hisus hoy nanlonus nangipanow kandan. ⁵¹ No duon lukos no migsinsinundul ki Hisus no waro migkukumbalo su migkukuyumbu do to hinabol. ⁵² Ogdorakopon dan on porom sikandin di iyan dan do nagon-gonan ka ingkukuyumbu din, no nakapallahuy sikandin no migpalawas naan do. ⁵³ Nataman, in-uyan dan on si Hisus diyo to baloy to Labow no Talagpanubad. No diyo nanlibulung ka tibo no pangulu to talagpanubad, ka mo igbuyag to mo Hudiyu, hoy ka mo talagpanulu to Balaud to Manama. ⁵⁴ No migsinundul dogma si Pidru ki Hisus no migpadpariyu do taman diyo to lama to Labow no Talagpanubad. No diyo sikandin migpinnuu duma to mo talagtamong ka ogginarang. ⁵⁵ No migpammitow ka mo pangulu to mo talagpanubad hoy ka sakup to mo Talaggukum to mo Hudiyu to igbayung dan ki Hisus oyjow ogpoyimatayan dan sikandin, ⁵⁶ piru waro nakita ran. Masulug no mo oyjow ka migpangguhud to ubat moyitongod ki Hisus piru waro nokog-iling ka guhuron dan. ⁵⁷ No duon duma no migsasindog hoy migpangguhud to ubat moyitongod ki Hisus no migkahi. ⁵⁸ “Narinog noy sikandin no migkahi, ‘Ogguhuson ku soini so timpulu no innimu ro to otow. No igpasasindog ku rod man-n soini solod to tatolu no aldow no konad no hinimuwan to otow.” ⁵⁹ Di minsan pad dutu, waro nokog-iling ka guhuron dan. ⁶⁰ No migsasindog ka Labow ne Talagpanubad diyo to tangkaan to tibo no oyjow hoy mig-inso ki Hisus, “Na, waro igkatabak nu to mo sumbung moyitongod koykow?" ⁶¹ Di migpoonong-onong do si Hisus hoy waro migtabak. No mig-abayan on man-on sikandin insoi to Labow no Talagpanubad, “Sikoykow naa iya ka Kristu no Anak to Ogdoyrayon no Manama?” ⁶² No migtabak si Hisus, “Kanak iya, hoy ogkitoon niyu angkuwa ka Anak to Otow no ogpinnuu diyo to igkakawanan to Maroson no Manama. No ogginguma sikandin no ogdumaan to gapun diyo to langit.” ⁶³ To pogkarinog dutu to Labow no Talagpanubad, inggisi din ka kumbalo din hoy migkagi, “Maniyo to ogkoilangan ki pad no ogkuwa to mo talagpamalohot to narinog niyud ma ka pogbaloy-baloy rin to Magbabayja? ⁶⁴ Na, nokoy to suman-suman niyu?” No dutu, mig-uuyunan dan tibo no olog no oggimatayan si Hisus. ⁶⁵ Nataman, in-iiloban on to duma no otow si Hisus hoy imbagkosan dan ka mata rin hoy impandabi ran on sikandin. No migkahi sikandan, “No la, antuki nu ko hontow-a ka migpasakit koykow?” No in-angoy on si Hisus to mo talagbantoy hoy impanagpi dan sikandin. ⁶⁶ No tahood to diyo pad si Pidru to lama, duon miglihad no malitan no sagbuka to mo suluhuanon to Labow no Talagpanubad. ⁶⁷ To pogkakita rin ki Pidru no migginarang, immomotmotan din sikandin hoy migkahiyan, “Hoy, duma ka iya ni Hisus no matig-Nasarit.” ⁶⁸ Di migpahunwaro si Pidru no migkahi, “Wara a nakataha wey nakasabut ko nokoy ka impanlalag nu.” No miggondiyad sikandin to kasunguwan to alad. No dutu, duon manuk no mig-ukale. ⁶⁹ To nakito on man-on si Pidru to suluhuanon no malitan, migkahiyan din on ka mo otow no nanasindog diyo, “Duma ran iya ka sika no otow. ”Piru migpahunwaro dod man-on si Pidru. ⁷⁰ Waro do naluhoy, migkahiyan on man-on si Pidru to mo otow no nanasindog dutu, “Malohot iya no duma ka nikandan su matig-Galiliya ko ma.” ⁷¹ Di migpahunlibot iya si Pidru no migkahi, “Mongoyibot iya to pogkootow ku, wara a iya nokoila to sika no otow no ogkahiyon nu minsan pad ogpatoy a!” ⁷² No duo-dajun no mig-ukalo on man-o ka manuk hoy nasuman-suman ni Pidru ka ingkahi ni Hisus kandin, “To kon pad og-ukalo ka manuk to kararuwa, katatolu ad nikokow igpahunware.” No dutu, migpanaman-taman on migsinohow si Pidru.