¹ To poglihawang ni Hisus to timpulu, duon sagbuka no tinuonan din no migkagi kandin, “Talagpanulu, pitawa nu ma sika so mo batu no amani no dorakol no inggamit to poggimu to timpulu! Amani no matolos ka pogpasasindog kayi!” ² No migkagihan ni Hisus sikandin, “Nakita nu soini so dakol no baloy? Di kouromo, waro minsan sagbuka no batu no ogkasamo diyo to nounturan din, ogkahuhus iya ka tibo.” ³ Tahood to migpinpinnuu si Hisus diyo to Bubungan to Ulibu no ogkatangkaan to timpulu, mig-insaa onsi Pidru, Santiyagu, Huwan hoy Andris. Migkagi sikandan, ⁴ “Kagihi koy ko kon-u ogkohitabu soini, hoy nokoy-a ka ilhanan no ogkatuman on soini tibo?" ⁵ No migtabak si Hisus kandan, “Bantoy kow no kono kow ogkouyan to kono no malohot no talagpanulu. ⁶ Su masulug ka oggondini no ogpoila no sikandan kun ka Kristu, hoy masulug ka ogkouyan dan. ⁷ No kono kow kaaldok ko ogpakarinog kow to ogmabunbunuoy duon to marani niyu, hoy to mo batbatonon mohitongod to ogmabunbunuoy diyo to mariyu. Su koilangan iya no ogkohitabu sikan, piru kono pad no sikan ka katammanan. ⁸ Ogpakig-away on ka sagbuka no nasud to loin no nasud hoy ogpakig-away ka sagbuka no tribu to loin no tribu. Ogginguma ka mo linug hoy bitil to minsan hondoi no ingod. Di sikan tibo, bunsuranan pad to kasakitan iling to oglosutan no ogbalotikan ⁹ “Di bantoy kow su og-uyanon kow nikandan diyo to hukumanan hoy ogpanlamposan kow diyo to solod to simbaan to mo Hudiyu. Ogpaatubangon kow diyo to mo gubirnadur hoy to mo Hari tongod kanak oyjow ogkagi kow to Marojow no Batbatonon diyo to kandan. ¹⁰ Koilangan no iggun-a igwali ka Marojow no Batbatonon diyo to langun no mo nasud to kono pad ogginguma ka katammanan. ¹¹ No omun ko og-uyanon kow on nikandan hoy igbohoy diyo to hukumanan, kono kow kalaggow ko nokoy ka kagihonon niyu. Ikagi niyu ko nokoy ka igpanulu kaniyu to Magbabayja to sika no timpu su konad on no sikaniyu pad ka ogkagi, su ka Panisingan to Magbabayja. ¹² Duon mo otow no iyan mismu oggimatoy to mo sulod dan. No duon mo amo no oggimatay to mo anak dan, no duon dogma mo anak no ogkuntoro to mo amo hoy inoy ran hoy oggimatoy kandan. ¹³ Ogdumutan kow to tibo no otow tongod kanak. Di sooyo so ogpabulus og-ikul kanak taman to katamanan iyan ogkaluwas. ¹⁴ No migpabulus si Hisus no migkahi, “Ko ogkitoon ‘talagdoroot no lilinditi diyo to tangkaan to Magbabayja’ no diyo ogsasindog to kono no olog kandin, (koilangan no ogsabuton soini to talagbasa), sooyo so mo otow no diyo to Hudiya, koilangan no og-aput diyo to mo bubungan. ¹⁵ No sooyo so otow no diyo to atop to baloy rin, koilangan no konad on ogpamanoug oyjow ogkuwa to mo kasangkapan din diyo to solod. ¹⁶ No sooyo so diyo to kamot, koilangan no konad og-uli oyow ogkuwa to kumbalo din. ¹⁷ Mokoyid-u-hid-u to sooyo no mo timpu ka ogkongaboros hoy ka ogmasusu pad to mo anak dan. ¹⁸ Ampu kow no kono ogkohitabu sika to tingmaagsil. ¹⁹ Su ogginguma to sooyo no timpu ka makabayad-bayad no pog-antus no waro pad noyitabu puun to poggimu to kalibutan taman kuntoon, hoy konad on soini ogkohitabu pad man-o. ²⁰ Omun ko waro pad hilopoti to Magbabayja ka sooyo no timpu, ogkahulo iya ogpamatoy ka mo otow. Di tongod to mo otow no in-alam din, innilopotan din ka sooyo no timpu. ²¹ “No omun ko duon ogkahi kaniyu, ‘Pitow kow, kayi ka Kristu!’ hoy ko ‘Pitow kow, diyo sikandin!’ kono kow on iya palintutuu. ²² Su oglopow ka kono mo malohot no mo Kristu hoy kono no malohot no mo prupita. Oggimu sikandan to mo timaan hoy mo koin-inuwan oyjow ogkouyan ka mo otow, ko ogkaayun, minsan sooyo so in-alam to Magbabayja. ²³ Purisu bantoy kow su tapoy kud sikaniyu panpanayi to langun-langun. ²⁴ “Omun ko ogkapongo on ka mo pog-antus to sooyo timpu, ogmarusilom on ka aldow hoy konad on oglayjag ka bulan, ²⁵ hoy ogkongoulug on ka mo bituon puun to langit hoy ogkawolwol ka mo tahu diyo to langit. ²⁶ No ogkataman, ogkakita ran on ka Anak to Otow no oglopow diyo to gapun duma to dakol no gahum hoy katolosan. ²⁷ No igpohondiyo din ka mo panalihan din diyo to langun no ingod kayi to ampow to tano oyjow to poglibulung to kootawan n in-alam din. ²⁸ “Na, sumsumana niyu ka kayu no iggira hoy himuwa niyu no ilinganan. Omun ko ogtunasan on ka mo sugpang din, sika ka palinnou no mahaan on ka tingmoinit. ²⁹ Iling naan dod dogma duon, omun ogkakita niyud no ogkohitabu on soini, ogkatahaan niyud no marani on sikandin, oggigumoon on. ³⁰ Ogkagihan ku sikaniyu to malohot: ogkatuman on sikan tibo to kono pad ogkamatoy ka mo otow to kuntoon no timpu. ³¹ Ogkaawo ka langit hoy ka tano, di ka koddi no batbatonon kono iya ogkaawo. ³² “Di waro minsan sagbuka no nakataha to aldow hoy to uras ko kon-u sooyo ogkohitabu, minsan ka mo panalihan diyo to langit hoy ka Anak, su iyan do nakataha ka Amoy. ³³ Di bantoy kow hoy tanud-tanud kow su waro kow nakataha ko kon-u sika ogkohitabu. Ogpokoiling soini to otow no oggipanow diyo to mariyu no ingod. ³⁴ To waro pad sikandin migligkat, ogpamohayan din to mo himu ka tagso uripon din, hoy impanagtahaan din ka talagbantoy to gumawan to koilangan no ogbantoy. ³⁵ Sikan naa, bantoy kow su waro kow nakataha ko kon-u oglibod ka kamunoy to baloy: ko ogpangilumkilum naa, hoy ko goliwaro naa to marusilom, hoy ko og-ukalo naan on ka manuk, hoy ko masolom naan on iya. ³⁶ Koma ko sahuhuno no ogginguma sikandin hoy ogkoumaan kow no nanliporong. ³⁷ Ka ignangon ku kaniyu, ignangon ku dogma diyo to langun no otow: bantoy kow!”