¹ To ogpakarani-rani on kandan to Hirusalim, ingimuma on kandan to Bitpahi hoy Bitanya no diyi to Bubungan to Ulibu. Ka daruwa to mo tinuonan din ² hoy migkahigan, “Hondiyo kow diyo to kowun-aan no bariyu. To pogginguma niyu, duon ogkakita niyu no nati to asnu no inhikot diyo no waro pad nounturi. Hokari niyu naa sooyo hoy uyana niyu kayi. ³ No ko duon inso kaniyu, ‘Maniyu to og-angayon niyu sikan?’ tabaka niyu no, ‘Ingkoilangan soini to Magbabayja hoy mahaan din do ig-uli.’ ” ⁴ Sikan naa, nangipanow on ka daruwa no tinuonan hoy to pogginguma ran diyo to bariyu, nakita ran iya ka nati to asnu no diyo to dalan no inhikot diyo to gumawan to sagbuka no baloy. ⁵ No mighokaran dan on ka nati. No duon mo otow no nanasindog diyo no mig-inso kandan, “Hoy, maniyu to oghokaran niyu sikan?” ⁶ No intabak dan ka mo otow sumalo to ingkahi ni Hisus, sooyo naan imbalahad on kandan to mo otow. ⁷ in-uyan dan on diyo to ki Hisus ka asnu hoy inhapinan dan to mo kinabo dan, hoy mig-untud on si Hisus. ⁸ Duon masulug no otow no inbobolat to mo kinabo dan diyo to dalan, hoy ka duma nanompug to mo dorowunon diyo to mo uma hoy intalagtag dan diyo to dalan no ogbayaan ni Hisus. ⁹ No migpangiyak ka miggun-a ki Hisus hoy ka migsinundul no migkagi, “Ogdayanon ka Magbabayja! Ogpanalanginan kandin so ipohondini to Magbabayja kanta! ¹⁰ Ogpanalanginan ka ogginguma no ogharian to apu ta no si Dabid! Ogdayanon ka Magababayja no diyo to langit!" ¹¹ Pogginguma ni Hisus diyo to Hirusalim, migsolod kandin diyo to timpulu hoy intongtongan din ka tibo. Tapus, miglihawang on kandin ligkat su mahaan on sooyo ogkasagkup hoy miggodiyad on to Bitanya duma to sampulu hoy daruwa (12) no tinuonan din. ¹² Pogkapawo, migligkat on kandan ligkat to Bitanya hoy dutu miggutasan on si Hisus. ¹³ No duon nakita rin diyo to mariyu no kayu no malapung so dowun no ogngaranan to iggira. Inparani kandin to kayu oyow ogpitawon ko duon bohas. To pogginguma rin diyo, waro nakita rin no bohas su noolin do dowun tongod su kono pad sooyo timpu to pogpamohas to sooyo no kayu. ¹⁴ No migkahigan ni Hisus ka kayu, “Ligkat kuntoo, warad otow no ogpakakoon pad man-o to bohas nu!” No narinog sooyo to mo tinuonan din. ¹⁵ Pogginguma ran diyo to Hirusalim, migsolod si Hisus diyo to timplu hoy impandoldol rin ka ogmamboboli hoy ogmanitinda. Impamalintuad din ka mo lamisa to ogmanaliyu to solopi hoy ka pinnuuwan to ogmamoligyo to mo soloppati. ¹⁶ No waro din tuhuti no ogbayo diyo to timpulu sooyo so og-uyan to minsan nokoy. ¹⁷ No impanulu din on ka mo otow to migkagi, “Nasulat on diyo to Kasulatan, ‘Ka baloy ku ogngaranan to baloy no ampuanan to tibo no nasud’; di innimu niyud on soini no holosanan to mo takawon!” ¹⁸ To pogkarinog dutu to pangulu to mo talagpanubad woy to mo talagpanulu to Balaud to Magbabayja, migpammitow on kandan to paahi oyow oggimatayan dan si Hisus. Di naaldok sikandan ki Hisus tongod su nana-naayan ka susuluhi no otow to pogpanulu din. ¹⁹ To ogkasagkup on, mig-awo onsi Hisus diyo to siyudad. ²⁰ To napawo on, nangipanow on kandan hoy naliharan dan ka kayu no iggira hoy nakita ran no nahangu on, minsan ka mo dalid. ²¹ Nasuman-suman ni Pidru ka noyitabu hoy migkahiyan din on si Hisus, “Talagpanulu, pitawa nu ka kayu no indilus nu, nahangu on!” ²² No migkagiyan kandan ni Hisus, “Koilangan no duon pogpalintutuu niyu to Magbabayja. ²³ Ogkagihan ku sikaniyu to malohot: ka minsan hontow no ogsuhu to sikan no bubungan ‘Koonat ka hoy kaalin ka diyo to dahat’, no waro pogduwa-ruwa diyo to pusung din hoy migpalintutuu no ogkatuman ka ingkahi rin, ogkatuman iya soini. ²⁴ Koy naan ogkagihan ku kaniyu to minsan nokoy no ogbuyuon niyu te Magbabayja, palintutuuwi niyu no narawat niyud, hoy ogkarawat niyu iya. ²⁵ Ko og-ampu kow, pasayluwa niyu pa ko duon nakasalo kaniyu oyow ka Amoy niyu no diyo to langit, ogpasayluwon kow dogma to mo salo niyu.” ²⁶ (Ka karaan no kopya to soini no birsikulu in-awo) ²⁷ Tapus, nanlibod o man-o kandan diyo to Hirusalim. No tagood to miggiphipanow si Hisus diyo to solod to timpulu, migparani kandin ka mo pangulu to mo talagpanubad hoy ka mo talagpanulu to Balaud to Magbabayja hoy ka mo igbuyag to mo Hudiyu. ²⁸ No mig-insaan dan si Hisus, “Nokoy-a ka katongod nu to poggimu kayi? Hontow-a ka migbogoy koykow to katongod to poggimu kayi?” ³⁰ Migtabak si Hisus kandan, “Duon dogma inso ku kaniyu, no ko ogkatabak niyu soini, ogkagiyan ku dogma sikaniyu ko nokoy ka katongod ku to poggimu kayi. ²⁹ Kagihia ni kaniyu, hondoi migpuun ka katongod ni Huwan to pogpamowutismu? Diyo naa to Magbabayja hoy ko diyo to mo otow?” ³¹ No migpalalagoy kandan no migkagi, “Omun ko ogkagi ki, ‘Diyo migpuun to Magbabayja,’ koma ko ogkahiyan ki nikandin, ‘Na, maniyu to waro kow migpalintutuu ki Huwan?’ ³² Piru kono ki ogpakakahi, ‘Diyo migpuun to mo otow.’ ” (Naaldok kandan to mo otow su migpalintutuu kandan langun no malohot no prupita si Huwan.) ³³ Di migtabak kandan ki Hisus, “Waro koy nakataga!” No migkagiyan kandan ni Hisus, “Ko iling ma ruon, kono ku dogma ogkagihan kaniyu ko nokoy ka katongod ku to poggimu kayi.”